الذّاریَات

51 : 1 Чексиз ырайым кылуучу, сурабастан берүүчү (жана) кайра-кайра ырайым кылуучу Алланын аты менен.

51 : 2 (Урукту) чачуучуларга касам!

51 : 3 Анан жүктү көтөрүүчүлөргө.

51 : 4 Анан жеӊил гана жүрүүчүлөргө.

51 : 5 Анан кандайдыр бир олуттуу ишти бөлүштүрүүчүлөргө.

51 : 6 Силерге убада кылына турган нерсе гана албетте, ырас.

51 : 7 Жаза-сыйлык күнү, албетте, аткарылуучу.

51 : 8 Жолдорго ээ болгон асманга касам!

51 : 9 Албетте, силер бир карама-каршылыкка ээ болгон кеп-сөзгө кирептерсиӊер.

51 : 10 Андан кайтарыла турган гана кайтарылат.

51 : 11 Негизсиз кептерди сүйлөөчүлөр жок болушту –

51 : 12 (Тактап айтканда) өз бейкапарлыктарында адашып жүргөндөр.

51 : 13 Алар: «Жаза-сыйлык күнү качан болот?» - деп сурашат.

51 : 14 Алар от үстүндө бышырылып жаткан күнү.

51 : 15 (Аларга айтылат): «Өз чагымчылдыгыӊардын даамын таткыла. Силер тез талап кылган нерсе – мына ушул».

51 : 16 Албетте, такыбалар бактар жана булактардын ортосунда болушат.

51 : 17 Алардын Раббиси аларга бере турган нерсени кабыл кылып жаткан болушат. Албетте, мындан илгери алар абдан жакшы амалдарды кылуучулар эле.

51 : 18 Алар түнкүсүн аз гана уктоочу эле.

51 : 19 Жана таӊкысын дагы алар кечирим тилеп турар эле.

51 : 20 Ошондой эле алардын мал-мүлкүндө суроочулар жана собол бербей турган муктаждар үчүн бир акы бар болчу.

51 : 21 Ишене тургандар үчүн жерде бир канча аят-белгилер бар.

51 : 22 Жана өзүӊөрдө дагы. Демек, силер көрбөйсүӊөрбү?

51 : 23 Асманда силердин ырыскыӊар да бар, силерге убада кылына турган нерсе да бар.

51 : 24 Ырас, асман жана жердин Раббисине касам! Кудум силер (өз ара) сүйлөп жатканыӊардай, албетте, бул дагы чындык.

51 : 25 Ибраахиймдин урматтуу меймандарынын кабары сага жетип келдиби?

51 : 26 Алар анын жанына келгендеринде: «Салам!» - дешти. Ал да: «Салам!» - деди. (Ал өзүнө-өзү айтты): «Бейтааныш кишилер (көрүнүп жатат)».

51 : 27 Ал дароо өз үйдөгүлөрүнүн алдына барды жана бир семиз (бышырылган) музоо(нун эти)н келтирди.

51 : 28 Анан аны аларга сунуштады (жана) сурады: «Эмне, жебейсиӊерби?»

51 : 29 Анан алардан кооптонду. Алар айтышты: «Коркпо!» Алар ага бир илимдүү уулдан куш кабар беришти.

51 : 30 Ошондо анын аялы кыйкырык көтөргөн бойдон жакын келди жана жүзүнө уруп айтты: «(Мен) төрөбөгөн кемпир(мин)».

51 : 31 Алар айтышты: «Раббиӊ айткандай (болот). Албетте, Ал гана акылмандык ээси (жана) дайыма билүүчү».

51 : 32 Ал (Ибраахийм) айтты: «Эй, элчилер! Мүдөөӊөр эмне?»

51 : 33 Алар айтышты: «Албетте, биз бир күнөөкөр коомго жөнөтүлгөнбүз –

51 : 34 Алардын үстүнө ылайдан болгон таштарды жаадыруу үчүн.

51 : 35 Алар Раббиӊ тарабынан чектен ашуучулар үчүн белгиленип коюлган».

51 : 36 Анан Биз анда болгон бардык момундарды чыгарып алдык.

51 : 37 Ошентип, Биз анда бой сунуучулардын болгону бир гана үйүн таптык.

51 : 38 Жана Биз анда оор азаптан корко тургандар үчүн бир бийик (ибараттуу) аят-белги калтырдык.

51 : 39 Жана Муса(нын окуясын)да (дагы кудум ушундай бир аят-белги бар эле), качан Биз аны Фараондун алдына бир ачык-айкын далил менен жибердик.

51 : 40 Анан ал өз төбөлдөрү менен жүз бурду жана: «Бул – болгону бир сыйкырчы же жинди», - деди.

51 : 41 Ошондо Биз аны жана анын кошуунун кармадык жана аларды деӊизге таштап жибердик. Ал жемеге ылайыктуу болчу.

51 : 42 Жана Аадда (дагы бир аят-белги бар эле). Качан Биз алардын үстүнө бир ойрондотуучу шамалды жөнөттүк.

51 : 43 Ал эмненин үстүнөн өткөн болсо, анын эчтекесин калтырбайт эле жана аны сасыган нерседей кылып коёр эле.

51 : 44 Жана Самудда (дагы бир аят-белги бар эле. Качан аларга айтылды: «Бир мөөнөткө чейин пайдаланып калгыла».

51 : 45 Анан алар Раббисинин буйругуна баш ийбестик кылышты. Ошондуктан, аларды чагылган тутуп алды. Алар болсо, бакырайган бойдон калышты.

51 : 46 Ошондо, аларда турууга дагы күч калбады жана алар өч алууга дагы кудуреттүү эмес эле.

51 : 47 Жана мындан мурун Нух коому дагы (бир ибараттуу аят-белги болчу). Албетте, ал бир фасык коом эле.

51 : 48 Биз асманды бир өзгөчө кудурет менен пайда кылганбыз. Албетте, Биз кеӊчилик тартуулоочубуз.

51 : 49 Жана жерди Биз тегиз кылып койдук. Ошентип, Биз канчалык кооз төшөөчүбүз!

51 : 50 Жана силер насаат алышыӊар үчүн Биз бардык нерсени жуп-жуп кылып жараттык.

51 : 51 «Ошентип, тездик менен Алла тарапка жүгүргүлө. Албетте, мен Ал тарабынан силерге бир ачыктан-ачык кулактандыруучумун.

51 : 52 Жана Алла менен башка бир нерсени кудай тутпагыла. Албетте, мен Ал тарабынан силерге бир ачыктан-ачык кулактандыруучумун».

51 : 53 Ушундай булардан мурунку адамдарга келген ар бир пайгамбарга алар: «(Бул) – бир сыйкырчы же жинди», - дешти.

51 : 54 Алар мына ушул нерсени гана бири-бирине насаат кылышабы? Жок, булар бир баш ийбес коом.

51 : 55 Ошондуктан, булардан жүз бур. Сен эч кандай жемеге алынбайсыӊ.

51 : 56 Жана сен насаат кыла бер. Албетте, насаат момундарга пайда келтирет.

51 : 57 Мен бардык жин жана адамдарды Мага ибадат кылуулары үчүн гана жараттым.

51 : 58 Мен алардан эч бир ырыскы тилебеймин жана Мени тамактандырууларын дагы арзуу кылбаймын.

51 : 59 Алла гана эӊ көп ырыскы берүүчү, эӊ кудуреттүү (жана) күчтүү сапаттардын ээси.

51 : 60 Албетте, зулумдук кылгандарга зулумдуктун жазасынан кудум шериктеринин үлүшү сыӊары үлүш бар. Ошондуктан, алар (аны) тездетүүнү Менден талап кылбастыктары керек.

51 : 61 Ошентип, каапырлык кылгандарга аларга убада кылынып жаткан күнү өлүм болот.