-
18:100وَ تَرَکۡنَا بَعۡضَہُمۡ یَوۡمَئِذٍ یَّمُوۡجُ فِیۡ بَعۡضٍ وَّ نُفِخَ فِی الصُّوۡرِ فَجَمَعۡنٰہُمۡ جَمۡعًا ﴿ۙ۱۰۰﴾Atë ditë Ne do të lëmë disa prej tyre të dallgëzojnë mbi disa të tjerë, do t’i fryhet bririt dhe do t’i tubojmë që të gjithë.Shpjegime
Në kohën e ngritjes së Jexhuxhëve dhe të Mexhuxhëve, të gjithë popujt e botës do të bashkoheshin, por jo dhe zemrat e tyre. Ky bashkim do të ishte vetëm me anë të teknologjisë. E gjithë bota do të bëhej si një qytet i vetëm. Dhe sipas Biblës, “do të ngrihet një popull kundër një populli tjetër e një mbretëri kundër një mbretërie tjetër e do të ketë uri e tërmete në vende të ndryshme” (Bibla, Mateu 24:7), urrejtja dhe paudhësia do të përhapet në masë. Duket qartë se profecia në fjalë i referohet epokës së sotme. Profeti Muhammed s.a.v.s. bëri profecinë se koha e Mesihut të Premtuar do të jetë ajo kur do të shfaqen Jexhuxhët dhe Mexhuxhët. Këto emërtime rrjedhin nga rrënja exh-xhe dhe exhixhen d.m.th. flakë, afshi i zjarrit, djegie e fuqishme (Lisanul-Arab, zëri ). Ky emërtim tregon se këto vende do të përdornin shumë zjarrin apo energjinë dhe luftërat e tyre do të bëheshin përmes armëve zjarri të fuqishme. Siç ndodhi në të dy luftërat botërore kur u lëshua një ferr i vërtetë mbi botën, dhe imagjinata njerëzore dridhet nga shkatërrimi që mund të shkaktojë një luftë e tretë botërore. Emërtimet jexhuxhë dhe mexhuxhë tregojnë se edhe mjetet e transportit të kësaj kohe do të punonin pikërisht përmes zjarrit ose lëndëve të ndryshme djegëse. Popujt që do t’i shpiknin këto mjete dhe që do t’i përdornin ato më shumë se kushdo tjetër, u quajtën jexhuxhë e mexhuxhë. Shkurt, ishte e parashikuar prej shekujsh që Mesihu i Premtuar do të shfaqej pikërisht në këtë kohë. Në Kuran dhe në hadithe gjithashtu përmendet që në kohën e Mesihut të Premtuar devetë dhe kafshët e tjera që përdoreshin për transport, do të dilnin jashtë përdorimit (81:5). Edhe kjo tregon se do të dilnin mjetet më të shpejta të transportit që do t’i zëvendësonin ato. Edhe gomari i Dexhallit qartazi këtë rol do të luante, pra, një gomar që nuk do të hante bar, por zjarr, dhe që do të udhëtonte në tokë, në det dhe në ajër duke mbartur njerëz brenda, me shpejtësi të atillë që jo vetëm popujt e kohës së Profetit Muhammed s.a.v.s., por as ata që ishin dy shekuj para nesh, as nuk mund ta imagjinonin dot. Lexoni edhe 21:97, si dhe suren 81.