الهُمَزة

Surja El-Humeze është mekase dhe, bashkë me bismil-lahin, ka dhjetë ajete.

Pas sures El-Asr vjen surja El-Humeze. Ndër të gjitha paralajmërimet që deri më tani u janë dhënë njerëzve që lakmojnë vetëm botën materiale, kjo sure bën paralajmërimin më të fortë. Kjo sure bën profeci duke thënë: Njeriu “i fortë” i kohës së vonshme do të mendojë se ka mbledhur pasuri të madhe, të cilën ai do ta shpenzojë kaq shumë për mbrojtjen e vet, saqë do të ndiejë veten me një hegjemoni të pavdekshme. Por do të ndodhë e kundërta! Ai do të hidhet në hutame, pra, në një zjarr që do të jetë i mbyllur në grimcat më të vogla. E si mund ta dish ti se ç’zjarr është ky?!

Kjo pyetje vjen e natyrshme, sepse askush nuk mund të konceptonte dot se si mund të mbyllet zjarri në grimca të vogla. Por ky zjarr është ai që është i kyçur në atome. Edhe fjalët hutam dhe atom sa afër tingëlluakan! Ky është ai zjarr që do të sulmojë befasisht zemrat. Dhe për këtë sulm ndaj tyre, ai është i kyçur në disa shtylla, të cilat do të zgjaten në momentin e shpërthimit.

Për ta kuptuar këtë sure, lexuesi duhet ta dijë procesin që ndodh gjatë shpërthimit të një bombe atomike. Lënda në të cilën është i kyçur ky “zjarr atomik”, përpara se të shpërthejë merr pamjen e kolonave të zgjatura. Pra, për shkak të presionit gjithnjë në rritje, formohen kolonat dhe ato vijojnë të zgjaten. Ky zjarr është i tillë që përpara se t’i djegë trupin njeriut, ia godet zemrën në mënyrë fatale. Sipas shkencëtarëve kjo është pikërisht ajo që ndodh me shpërthimin e një bombe atomike. Përpara se të arrijnë rrezet që djegin trupin dhe gjithçka, valët radioaktive të bombës atomike godasin zemrat e njerëzve, duke ua marrë jetën.

Ka edhe një kuptim tjetër të kësaj sureje: një zjarr është i fshehur në grimcat e trupit të njeriut, i cili kur të lëshohet, do ta sulmojë zemrën e njeriut duke e sakatuar krejtësisht.