-
35:2اَلۡحَمۡدُ لِلّٰہِ فَاطِرِ السَّمٰوٰتِ وَ الۡاَرۡضِ جَاعِلِ الۡمَلٰٓئِکَۃِ رُسُلًا اُولِیۡۤ اَجۡنِحَۃٍ مَّثۡنٰی وَ ثُلٰثَ وَ رُبٰعَ ؕ یَزِیۡدُ فِی الۡخَلۡقِ مَا یَشَآءُ ؕ اِنَّ اللّٰہَ عَلٰی کُلِّ شَیۡءٍ قَدِیۡرٌ ﴿۲﴾Lavdia është e Allahut, Krijuesit të qiejve e të tokës, Bërësit të engjëjve si lajmëtarë, me nga dy, tre e katër krahë. Ai shton në krijim çfarë të dojë. Pa dyshim, Allahu është i Plotfuqishëm për çdo gjë.Shpjegime
Sipas fjalorit, krahët janë një simbol i fuqive dhe i aftësive. Kështu që, ajeti tregon se engjëjt zotërojnë fuqi dhe cilësi në shkallë të ndryshme dhe në përputhje me rëndësinë e punës që i besohet secilit prej tyre. Disa pyesin – Pse Zoti ka nevojë për engjëjt, sikurse mbretërit e kësaj bote që kanë nevojë për parinë e tyre që e ndihmojnë? Zoti i Madhërishëm nuk ka nevojë për asgjë, as për engjëjt, as për diellin, as për hënën, as për yjet. Por Ai kështu deshi krijimin e Tij, në mënyrë që fuqitë e Tij të njihen nëpërmjet mjeteve të ndryshme dhe nga kjo metodë, njeriu të shtojë urtësinë dhe dijen e vet. Po të mos ishte mediumi i mjeteve në mes, nuk do të kishim në botë as shkencën e astronomisë, as fizikën, as mjekësinë, as biologjinë e as ndonjë dije tjetër. Janë pikërisht mjetet që lindën dijen. Pra, urtësia absolute e Zotit deshi të krijonte mjete nga më të ndryshmet për rritjen dhe edukimin trupor të njeriut, dhe krijoi ndikues të llojllojshëm të botës lëndore, në mënyrë që ata të bëjnë ndikime në mënyra të ndryshme në trupin njerëzor. Dhe po Ai i Adhurueshmi i Vetëm, i cili edhe në punët e Tij ka njëshmërinë dhe harmoninë, deshi që edhe edukimin shpirtëror të njeriut ta bëjë në të njëjtën formë dhe me të njëjtin lloj sistemi. Ai kështu bëri, në mënyrë që të dyja sistemet, pra sistemi i botës lëndore dhe ai i botës së padukshme, ose sistemi fizik dhe sistemi shpirtëror, me njëtrajtshmërinë dhe harmoninë e tyre të dëshmojnë ekzistencën e Krijuesit të Vetëm dhe të provojnë se Ai është Organizatori që përdor vullnetin e Tij.