61 : 10 - Kurani shqip dhe arabisht. Lexo Online Kuranin, përkthim e komentim
Me emrin e Allahut, të Gjithëmëshirshmit, Mëshirëbërësit.
Nuk ka të adhurueshëm tjetër përveç Allahut, Muhammedi është i Dërguari i Allahut.
Muslimanët që besojnë se Hazret Mirza Ghulam Ahmedi a.s.,
është Imam Mehdiu dhe Mesihu i Premtuar.
  • ہُوَ الَّذِیۡۤ اَرۡسَلَ رَسُوۡلَہٗ بِالۡہُدٰی وَ دِیۡنِ الۡحَقِّ لِیُظۡہِرَہٗ عَلَی الدِّیۡنِ کُلِّہٖ وَ لَوۡ کَرِہَ الۡمُشۡرِکُوۡنَ ٪﴿۱۰﴾
    61 : 10 Është Ai që dërgoi të Dërguarin e Tij me udhëzimin dhe fenë e vërtetë, që ta bëjë atë t’i mbizotërojë të gjitha fetë, edhe sikur idhujtarët ta urrejnë (këtë).
    Shpjegime

    Zoti i Madhërishëm në Kuranin e Shenjtë përmend dy misione të ndryshme të Profetit Muhammed s.a.v.s.: 1) Kompletimin e Librit, gjë që përfundoi me sukses që gjatë jetës së tij dhe vetë Zoti pohoi: “Sot, kam përsosur fenë tuaj për ju …” (5:4) dhe 2) Përhapjen e mësimeve të Librit të Shenjtë në të gjithë botën, gjë që e thotë në këtë ajet duke pohuar “që ta bëjë atë t’i mbizotërojë të gjitha fetë” (61:10). Komentuesit e mëparshëm të Kuranit pohojnë se kjo profeci e dytë është e lidhur me ardhjen e Mesihut të Premtuar, sepse në kohën e tij Islami do të triumfojë mbi të gjitha fetë e tjera (lexoni Tefsir Kurtubij, Tefsir Taberi, etj., nën ajetin 61:09). Kjo sepse në kohën e Profetit Muhammed s.a.v.s. rrugët nuk ishin të hapura, mjetet e komunikimit nuk ishin në shkallën botërore, popujt nuk ishin njohur me njëri-tjetrin, madje një pjesë e botës as nuk ishte zbuluar. Kurse, koha në të cilën do të vinte Mesihu i Premtuar do të ishte kohë e globalizmit dhe e teknologjisë, kur jo vetëm që të gjitha fetë do të ishin të pranishme në arenë për të luftuar përmes argumenteve, por edhe ithtarët e çdo feje do të kishin edhe mundësinë dhe lehtësinë për të treguar pikëpamjet dhe argumentet e tyre. Kjo do të ishte koha kur e gjithë bota do të quhej një fshat global, siç nënkuptohet nga fjalët e këtij ajeti ku thotë “që ta bëjë fenë e vërtetë t’i mbizotërojë të gjitha fetë”. (Lexoni edhe suren 81). Shkurt, kjo kohë jona do të ishte pikërisht koha kur duhej të vinte Imam Mehdiu dhe Mesihu i Premtuar. (Më shumë për këtë temë, lexoni 32:6).

    Në këtë ajet (61:10), Allahu i Madhërishëm ka përdorur dy fjalë “udhëzimi” (arab. “huda”) dhe “e vërteta” (arab. “hak”). Udhëzim do të thotë se ai (pra, i Dërguari) së pari do të ndreqë gabimet e brendshme të umetit të muslimanëve përmes dritës dhe urtësisë me të cilën vjen prej Zotit, dhe kjo pikërisht ishte detyrë e Mehdiut (i Udhëzuari), kurse “e vërteta” nënkupton që ai do ta mundë gënjeshtrën që qëndron jashtë umetit, siç për Profetin s.a.v.s.,  në një ajet tjetër thotë “erdhi e vërteta dhe u zhduk e rrema” (17:82). Kështu, edhe këtu Zoti pohon që ky i Dërguar vjen për t’i sjellë fitore së vërtetës. Por këtë fitore ai nuk do ta arrijë përmes shpatës apo pushkës, por përmes argumentit dhe lutjes. Ata që presin një Mehdi gjakatar se gjoja do t’u sjellë muslimanëve triumf përmes luftës me armë, janë në gabim të hapët dhe në kundërshtim me Kuranin që thotë “nuk ka imponim në fe” (2:257).

Shpërndaje
Na kontaktoni ne Whatsapp :)
Shtypni këtu ju lutemWhatsApp