- فَلَا تَعۡلَمُ نَفۡسٌ مَّاۤ اُخۡفِیَ لَہُمۡ مِّنۡ قُرَّۃِ اَعۡیُنٍ ۚ جَزَآءًۢ بِمَا کَانُوۡا یَعۡمَلُوۡنَ ﴿۱۸﴾32 : 18 Asnjë shpirt nuk di se çfarë është mbajtur e fshehtë për t’ia qetësuar syrin; si shpërblim i asaj që ata bënin.Shpjegime
Zoti i cilësoi të fshehta të gjitha bekimet e xhenetit, saqë nuk mund t’ua gjesh shembullin në bekimet e kësaj bote. Dihet që bekimet e kësaj bote nuk janë të fshehta për ne. Ne njohim qumështin, shegën, rrushin etj., dhe ato i konsumojmë përditë. Kjo tregon se bekimet e botës tjetër janë të tjera, të cilat me bekimet e kësaj bote ngjajnë vetëm në emërtime. Andaj, ai që mendon se parajsa është një koleksion bekimesh të kësaj bote, nuk ka kuptuar asnjë shkronjë të Kuranit të Shenjtë. Kjo përputhet edhe me fjalën e Udhëheqësit dhe Profetit tonë, i Dërguari i Allahut s.a.v.s., ku ai thotë se xheneti dhe bekimet e tij janë gjëra që as nuk i ka parë ndonjë sy, as nuk i ka dëgjuar ndonjë vesh dhe as nuk i ka ndier ndonjë zemër (Buhari, nr. 3244). Kurse ne i shohim me sytë tanë bekimet e kësaj bote, i dëgjojmë me veshët tanë dhe i ndiejmë në zemër. Kështu që, pavarësisht se këto ushqime janë përmendur me terma fizikë, njëkohësisht është sqaruar se burimi i tyre është shpirti dhe drejtësia. Ata që kanë ngrënë ushqimin e dashurisë së Zotit në këtë botë, të njëjtin ushqim do ta gjejnë në një formë fizike edhe në botën tjetër. Dhe ngaqë ata do ta kenë shijuar këtë dashuri dhe mirësjellje Hyjnore, do ta njohin edhe atje (2:26). Për këtë arsye, shpirtrat e tyre do ta kujtojnë kohën kur ata kalonin në vetmi, nëpër qoshe dhe në errësira të natës kur përkujtonin me mall të Dashurin e Vërtetë dhe gjenin kënaqësi nga ky përkujtim. Lexoni edhe 2:26; 47:16.