Judenjtë ia dolën mirë në mërgim. Iu ripërtërinë besimi e përkushtimi fetar;  studiuan literaturën e Mbretërisë, e përshtatën sipas nevojave të komunitetit të tyre të ringjallur dhe nxitën shpresën e rikthimit në Palestinë. Rreth vitit 545 p.e.s., kjo aspiratë mori një formë më të qartë. Bënë një marrëveshje të fshehtë me Kirin, Mbretin e Medias dhe të Persisë, dhe e ndihmuan atë të pushtonte Babiloninë. Babilonia iu dorëzua ushtrisë së tij pa rezistencë në korrik të vitit 539 p.e.s. Si shpërblim për shërbimet e tyre, Kiri i lejoi hebrenjtë të ktheheshin në Jerusalem dhe gjithashtu i ndihmoi të rindërtonin Tempullin (The Historians’ History of the World, vëll. II, f. 126; Jew. Enc., vëll. 7, nën “Jerusalem”; Enc. Bib., nën “Cirus” dhe Bibla, 2 i Kronikave 36:‌22-23). Një pjesë e madhe e mërgimtarëve u kthyen në Jerusalem (Esdra 1:3-5). Punimet e rindërtimit të Tempullit përparuan në mënyrë të qëndrueshme dhe përfunduan në vitin 516 p.e.s.. Këtyre ngjarjeve dhe prosperitetit të mëvonshëm të hebrenjve u referohet ajeti në koment. E gjithë kjo, megjithatë, u parashikua nga Hazret Musai ^a.s. shumë kohë përpara se të ndodhte (Bibla, Ligji i Përtërirë 30:‌1-5). Lexoni edhe 2:103.