Ajetet 230-231: Një pjesë e madhe e dijetarëve të sotëm besojnë se ai që i tha me gojë tri herë fjalën divorc (talak) gruas së tij, i ka konsumuar të tria mundësitë për t’i dhënë divorc dhe si i tillë, ai nuk mund të rimartohet me të, përpara se ajo të martohet me një burrë tjetër dhe të jetë ndarë prej tij. Por kjo nuk është e saktë. Kurani i Shenjtë qartazi pohon në këtë ajet “Divorci (talak) bëhet dy herë.” Domethënë divorci që nuk është i pakthyeshëm (talaku bain), mund të bëhet dy herë. Domethënë, pas divorcit të parë, burri ose do ta kthejë divorcin duke u pajtuar me gruan brenda afatit, ose nëse mbaron afati, ta kthejë divorcin duke bërë nikah të ri. Pas kësaj nëse sërish nuk pajtohet, i jep divorc. Pra, divorci i tillë nëse bëhet të paktën dy herë, nuk lind fare mundësia për t’i dhënë divorc tri herë njëkohësisht. Divorci i pakthyeshëm, pra i treti, është vetëm ai që tri herë kalon nga procesi i lartpërmendur. Pas kësaj, sipas Kuranit, ajo grua nuk është më e lejuar për të, derisa ajo të martohet me një burrë tjetër dhe pas mospajtimit mes tyre, të jetë ndarë prej tij. Ka nga ata që në mënyrë të poshtëruar bëjnë një zakon që e quajnë halala, pra martesë të përkohshme, për t’u rimartuar me gruan të cilën e kanë divorcuar tri herë. Halala nuk ka vend në fenë Islame.