Байъаттын максат-мүдөөлөрү

Ошол жерде 1888-жылы 4-март күнү бир жарыясында Байъаттын максат-мүдөөлөрүн түшүндүрүп жатып, мындай деп жазган: «Такыбалардын ушундай чоң тайпасы дүйнөгө өзүнүн жакшы таасирин тийгизсин жана алардын ынтымактуулугу Ислам үчүн береке, бийиктик жана жакшы натыйжалар куралы болсун үчүн ушул Байъат алуунун максаты – бул такыбалар тайпасын пайда кылуу, тагыраак айтканда, такыба жашоосун кечире турган адамдар жамаатын чогултуу. Ошондой эле алар ынтымактуулуктун берекеси менен Исламдын ыйык, таза кызматтарына тезирээк салым кошсун. Алар жалкоо, сараң жана пайдасыз мусулман болбосун. Алар өзүнүн бөлүнүү жана ынтымаксыздыгы айынан Исламга чоң зыян келтирген жана анын сулуу жүзүн өзүнүн баш ийбестиктери себебинен булгаган адамдар сыяктуу болбосун. Ошондой эле Исламдын керектөөлөрүнөн бүтүндөй кабарсыз болгон бейкабар дербиштер жана көз ачыктар сыяктуу да болушпасын. Анткени алар өз туугандарына да боорукер эмес, адамзаттын жакшылыгы үчүн да аларда эч кандай шыктануу жок. Жок, алар коомго ушунчалык боорукер болуулары керек: алар кедейлерге баш паанек болсун жана жетимдерге аталардай болсун. Ислам кызматтарын аткаруу үчүн алар берилген ашыктардай курман болууга даяр турсун. Алардын жалпы берекелери дүйнөдө таралуусу үчүн аракеттенүүлөрү лаазым. Кудайга болгон сүйүү жана Кудайдын пенделерине карата боорукерликтен турган таза булак ар бир жүрөктөн чыгып, бир жерге чогулуп, бир дарыя катары акканы көрүнүп турушу керек… Дүйнөгө Илахий махабат, чыныгы тобо, тазалык, нукура жакшылык, тынчтык, жаратмандык жана адамзатка болгон боорукерликти таркатып жиберүү үчүн Кудай Таала Өзүнүн жүзүн ачыкка чыгаруу жана Өз кудуретин көрсөтүп, аны өнүктүрүү максатында ушул тайпаны чыгарган. Ошентип, бул тайпа Анын өзгөчө тайпасы болот. Ал Зат[1] аларды Өзүнүн Руху менен колдойт жана аларды ыплас жашоодон тазартат. Ошондой эле алардын жашоосун таза өзгөрүү менен өзгөртөт. Ал Өзүнүн таза алдын-ала кабарларында убада бергендей, ушул тайпаны абдан көбөйтөт жана миңдеген чынчылдарды ага киргизет. Ал Өзү аны сугарат жана өстүрөт. А түгүл алардын арбындыгы жана берекеси көздөргө ажайып-таң калыштуу болуп көрүнөт. Алар өйдө коюлган чырак сыяктуу дүйнөнүн төрт тарабына өз жарыгын чачышат жана Ислам берекелери үчүн үлгү болушат. Ал (Алла) ушул Жамаатты толук бойдон ээрчигендерге ар түрдүү береке боюнча башка жамааттардын үстүнөн жеңиш насип кылат. Ошондой эле дайыма Алла Таалага жакын жана Анын жардамына татыктуу адамдар кыямат күнүнө чейин ушул Жамааттан пайда болушат. Ал Улук Алла ушуну эле каалаган. Ал Кудуреттүү, Ал Өзү каалаганын кылат. Ар бир күч-кубат жана кудурет Ага гана таандык». («Мажмуъа-э-иштихаараат», 1-том, 196-198-бет)

Ушул эле Иштихаарда[2] ал (алайхиссалаам): «Байъат кыла тургандар 20-марттан кийин Лудхияна шаарына барсын», – деп насаат кылган.

[1] Кудай Таала.

[2][2] «Жарыя» же «кулактандыруу».