Силер Алла Тааланын акыркы Жамаатысыңар
Азирети Масийхи Мавъуд (алайхиссалаам) Алла Таала менен бекем алаканы орнотуу үчүн өз Жамаатына насаат кылып жатып мындай айтат:
«Илгерки момундар сыноодон өткөрүлгөнү сыяктуу эле түрдүү кайгы-капа жана кырсык-балээлер аркылуу силер да сөзсүз сыноодон өткөрүлөсүңөр. Ошондуктан, сак болгула! Адашып калбагыла. Эгер силер асман менен бекем алакада болсоңор, жер силерге кенедей да зыян келтире албайт. Качан өзүңөргө зыян келтирсеңер, ал душмандын колунан эмес, өз колдоруңардан гана келтиресиңер. Эгер силердин жердеги бардык ызаатыңар кетип калса да, Алла Таала силерге асманда бир түбөлүктүү сый-урмат тартуулайт. Ошондуктан, силер Аны эч таштабагыла. Силер сөзсүз азап чектирилесиңер жана бир топ үмүт-тилектериңерден куру калтырыласыңар. Демек, ошондой жагдай-кырдаалдарда эч кайгырбагыла, себеби силердин Кудайыңар: «Силер Анын жолунда туруктуусуңарбы, жокпу?» – деп силерди сынайт. Эгер силер: «Асманда периштелер дагы бизге мактоо-алкоо айтсын», – деп кааласаңар, анда келтек да жегиле, бирок ыраазы болгула; сөгүнүүлөрдү уккула, (бирок) шүгүр кылгыла; ийгиликсиздикти көргүлө, бирок алакаңарды үзбөгүлө. Силер Алла Тааланын акыркы Жамаатысыңар, ошондуктан жетилүү жагынан өзүнүн туу чокусуна жеткен жакшы амалдарды көрсөткүлө. Араңардан жалкоолонуп кеткен бирөө ыпылас нерсе сыяктуу Жамааттан чыгарылып ташталат. Ал өкүнүч менен өлөт жана Алла Таалага кенедей да зыян келтире албайт. Карагыла, мен өтө кубаныч менен кабар беремин: силердин Кудайыңар чындыгында бар. Бардык адамдар Анын жаратылганы болсо да, бирок ким Аны тандаса, Ал да аны тандайт. Ким Анын алдына келсе, Ал да ага барат. Ким Ага сый-урмат көрсөтсө, Ал да ага ызаат тартуулайт». («Руханий хазаайин», 19-том, «Кашти-э-Нух», 15-бет)
Дагы мындай деп айтат:
«Биз Алла Тааланы ыраазы кылышыбыз керек, бул үчүн ыкыластуулук, чынчылдык жана туруктуулук керек болот, куру сөздөрдөн эле турган иш-чарабыз такыр пайда келтирбейт. Биз Алла Тааланы ыраазы кылганыбызда, Алла Таала да береке тартуулайт жана Өз айкөлдүктөрү менен берекелеринин эшиктерин ачып коёт … Ушул – чындык менен туруктуулуктун тар эшигинен өтүү оңой эмес. «Түш жана аян келе баштады, ошондуктан колго кол коюп отура беришибиз жана Мужаахадалардан[1] баш тартышыбыз керек» деген нерсе менен биз эч качан сыймыктанбайбыз. Алла Таала муну жактырбайт». («Ал-Бадр», газетасы, 3-том, 18-19-сан, 1904-жыл, 8-16-май, 10-бет)
Ал (алайхиссалаам) дагы мындай дейт:
«Ар бир момундун ахвалы ушундай болот: эгер ал ыкыластуулук жана туруктуулук менен Алланыкы болуп калса, анда Алла Таала ага дос болуп калат. Бирок, эгер ыймандын имараты чириген болсо, анда сөзсүз коркунуч бар. Биз эч кимдин жүрөгүнүн ахвалын билбейбиз. … Бирок (адам) толук бойдон Алла Тааланыкы болуп калса, Алла Таала аны өзгөчө коргойт. Ал баарынын Кудайы болгону менен, ким өзүн өзгөчө тутса, аларга өзгөчө жарык чачат. Кудай таала үчүн өзгөчөлөнүү – напсисинин толук бойдон майдаланып жок болуусу. Ошондуктан, мен кайра-кайра Жамаатка: «Байъат менен эч сыймыктанбагыла», – деп айтамын. Эгер жүрөк таза болбосо, колго кол коюп отура берүүнүн пайдасы эмне? …Бирок кимде-ким чын дилден кабыл кылса, анын чоң-чоң күнөөлөрү кечирилет жана ага бир жаңы жашоо тартууланат». («Малфузаат», жаңы басылыш, 3-том, 65-бет)
[1] Аракеттенүү, эмгек кылуу; Алла Тааланын ибадаты менен алектенүү.