Баш сөз

Бул – Сүйүктүү Пайгамбарыбыз Мухаммад (саллаллааху алайхи ва саллам)дын[1] алдын ала кабарларына ылайык келген Масийхи Мавъуд[2] жана Махдийи Маъхуд[3] Азирети Мырза Гулам Ахмад Кадияний (алайхиссалаам)ды[4] таануу жана аны кабыл алуу мүмкүнчүлүгүн берген Алланын бизге карата мээримдүүлүгү жана берешендиги. Фал-хамду лиллаахи ъалаа заалик.[5] Ал (алайхиссалаам) Алла Таала тарабынан Байъат[6] алууга буюрулганда, ал Байъат кыла тургандар үчүн 1889-жылы 12-январь күнү жарыяланган «Такмийли таблийг»[7] жарыясында он Байъат шартын белгиледи. Хузур (алайхиссалаам)дын Жамаатына кире турган ар бир киши ошол шарттарга амал кылууга убада берет. Ошол шарттарды кеңири билүү жана аларга амал кылууга аракеттенүү баарыбыз үчүн өтө зарыл.

Амийрул-Му‘минийн[8] – Азирети Мырза Масрур Ахмад Халифатул-Масийхил-Хаамис[9] аййадахуллааху таъала би–насрихил ъазиз[10] бизге багыт берүү үчүн жана жеңил түшүндүрүү үчүн ар түрдүү кайрылуусунда жана жума кутбаларында Курани Карим, Пайгамбар Мухаммад (саллаллааху алайхи ва саллам)дын хадистери жана Азирети Масийхи Мавъуд (алайхиссалаам)дын сөздөрүнүн негизинде ошол Байъат шарттарын абдан жеткиликтүү жана кеңири чечмелеген. Аны Хузур^АБА[11] 2003-жылы 27-июлда Жалса Салаанадагы[12] соңку кайрылуусунда баштаган. Анда он Байъат шарттарынан алгач үчөөнү кеңири баяндаган. Ал эми 2003-жылы 24-август күнү Германиядагы Жалса Салаанада Хузур^АБА өзүнүн соңку кайрылуусунда төртүнчү, бешинчи жана алтынчы Байъат шартын кеңири чагылдырды. Анан 29-август күнү Германиядагы Франкфурт шаарына караштуу Шеврт Хаале шаарындагы жума кутбасында жетинчи жана сегизинчи Байъат шартын кеңири баяндап берди. Тогузунчу шартты 2003-жылы 12-сентябрь күнү Лондон шаарындагы «Фазл» мечитинде берген кутбасында, онунчу Байъат шартын Лондондогу «Фазл» мечитинде 2003-жылы 19-сентябрь күнү окуган кутбасында кеңири баяндап берди.

Бул китеп 2004-жылы алгачкы ирет урду тилинде Англияда басылган. Мына ушул басылышта Хузур^АБАдин ошол темага тиешелүү 2003-жылдын 26-сентябрында Лондондогу «Фазл» мечитинде, 2003-жылдын 10-октябрында Лондон шаарындагы «Байтул-Футух» мечитинде, анан 2003-жылы 17-октябрь күнү Лондондогу «Фазл» мечитинде окуган үч кутбасы да кошулду. Ушул кутбаларда Хузур^АБА Азирети Масийхи Мавъуд^АСдын Байъатына кошулган ыйыктарда жүз берген таза руханий өзгөрүүлөрдү айкындап көрсөттү.

Айрым жайларда Хузур^АБАдин уруксаты жана көрсөтмөлөрү боюнча аз гана өзгөртүүлөр киргизилди. Ал эми бул китепчедеги бардык түшүндүрмөлөр (сноска) котормочу тарабынан берилди.

Ушул кайрылуулар жана кутбаларды кайрадан карап чыккан соң, окурмандардын пайдасы үчүн китеп катары басмадан чыгаруу бактысыга ээ болуудабыз. Алла Тааладан мына ушул шарттарды туура түшүнүүгө жана аларга жакшы амал кылууга күч-кубат берүүсүн суранабыз. Ошондой эле Азирети Масийхи Мавъуд^АС арзуу кылгандай, биздин чыныгы жана нукура Ахмадий болуубузга да Алла Таала мүмкүнчүлүк берсин. Аамийн!

Ушул китепчеде Азирети Масийхи Мавъуд (алайхиссалаам)дын «Малфузаатынан»[13] айрым үзүндүлөр келтирилип, ал жерде «жаңы басылыш» деген сөз жазылган эмес. Ошондой жерлерде 1984-жылы Англияда басылган «Руханий хазаайин» менен «Малфузаат» көздөлгөн. «Жаңы басылыш» дегендин мааниси – беш томдон турган «Малфузааттын» басылышы.

МУНИР-УД-ДИН ШАМС

Эдишнал Вакилут–Тасниф

Лондон

[1] «Саллаллааху алайхи ва саллам» (ага Алла Тааланын тынчтыгы жана ырайымы болсун) дегендин кыскартмасы.

[2] «Убада кылынган Масийх».

[3] «Убада кылынган Махдий»

[4] «Алайхиссалаам» (ага тынчтык болсун) дегендин кыскартмасы.

[5] Бул үчүн бардык мактоо-алкоо Алла Таалага гана таандык.

[6] «Ант берүү, убада кылуу жана сөз берүү».

[7] «Даъват-үгүттүн толукталгандыгы».

[8] «Момун-мусулмандардын Жетекчиси».

[9] Азирети Масийхи Мавъуд^АСдын бешинчи Халифасы.

[10] «Алла Таала Өзүнүн жеңүүчү жардамы менен аны колдосун.

[11] «Аййадахуллааху таъала би насрихил ъазиз» дегендин кыскартмасы.

[12] Жылдык Жыйын.

[13] Азирети Мырза Гулам Ахмад^АСдын сөздөрүнүн жыйындысы «Малфузаат» деп аталат.