Бүлүк салуудан сактангыла
Дагы фитна-чагымчылык тууралуу Алла Таала мындай айтат:وَ ابۡتَغِ فِیۡمَاۤ اٰتٰٮکَ اللّٰہُ الدَّارَ الۡاٰخِرَۃَ وَ لَا تَنۡسَ نَصِیۡبَکَ مِنَ الدُّنۡیَا وَ اَحۡسِنۡ کَمَاۤ اَحۡسَنَ اللّٰہُ اِلَیۡکَ وَ لَا تَبۡغِ الۡفَسَادَ فِی الۡاَرۡضِ ؕ اِنَّ اللّٰہَ لَا یُحِبُّ الۡمُفۡسِدِیۡنَКотормосу: Жана Алла сага тартуулаган нерселер аркылуу акырет мекенине ээ болууну ойло жана дүйнөдөн дагы бир белгилүү үлүшүңө кош көңүл болбо! Ошондой эле Алла сага жакшылык кылган сыяктуу сен дагы жакшылык кыл жана жерде бузгунчулук (кылуу)ну жактырба! Албетте, Алла бузгунчулук кылуучуларды жактырбайт. («Ал-Касас» сүрөөсү: 78)
Азирети Муъааз бин Жабал (разияллааху анху) Сүйүктүү Пайгамбарыбыз Мухаммад (саллаллааху алайхи ва саллам)дын мындай деп айтканын рабаят этет: «Согуш эки түрдүү болот: биринде Алла Тааланын ыраазычылыгы үчүн Имамга баш ийилет. Ошондой адам өзүнүн жакшы мал-мүлкүн Алланын жолунда сарп кылат, өзүнүн сапарлаш жолдошу үчүн жеңилдикти жаратат жана бүлүктөн оолак болот. Демек, ошондой адамдын уйку-соосунун баары соопко татыктуу болот. Дагы бир киши мактануу, кожо көрсүн жана өзүнүн эрдемсинген кыссаларын айтуу үчүн согушат. Ошондой адам Имамга баш ийбестик кылат жана жерде бүлүк салат. Демек, ушундай адам жогоруда айтылган киши менен бирдей болуп кайтпайт». («Сунан Аби Давуд», Китаабул-Жихад, Баабу фий ман йагзу ва йал-тамиссид-Дунйа)
Азирети Асмаа (разияллааху анху) бинти Язийд Сүйүктүү Пайгамбарыбыз Мухаммад (саллаллааху алайхи ва саллам)дын мындай деп айтканын рабаят этет: «Мен араларыңардагы эң жакшы адамдар жөнүндө айтып берейинби?» Сахаабалар: «Ооба, эй, Алланын Пайгамбары!» – деп жооп беришти. Ошондо Сүйүктүү Пайгамбарыбыз Мухаммад (саллаллааху алайхи ва саллам): «Алар кандайдыр бир көркөм көрүнүштү көрүшкөндө, Алла Тааланы эске ала башташат», – деп айтты. Анан мындай айтты: «Мен силерге эң жаман адамдардан кабар берейинби? Ушак айтуу ниетинде чуркап жүргөндөр эң жаман адамдар. Алар сүйүшкөндөрдүн арасында жарака салышат. Алар баш ийүүчү адамдардын күнөөгө батуусун каалашат». («Муснад Ахмад бин Ханбал», 6-том, 459-бет, Бейрут)
Азирети Масийхи Мавъуд (алайхиссалаам) мындай дейт:
«Силердин Алла Таала негиз салган Жамаатка киргениңер үчүн эле силерди таштай турган жана силерден ажырап кете тургандар менен жаңжалдашпагыла же бүлүк салбагыла, тескерисинче, Алла Таала силерге Өзүнүн берешендиги себебинен тартуулаган акыл-парасат менен илим-билимди Алла Таала аларга да берсин деп алар үчүн жашыруун дуба кылгыла. Силер жакшы жолду тандаганыңарды өзүңөрдүн таза үлгү жана эң сонун жүрүш-турушуңарды көрсөтүү жолу менен далилдегиле. Карагыла, мен силерге кайра-кайра төмөндөгүдөй насаат кылууга буюрулганмын: ар кандай бүлүк жана ызы-чуулуу жайлардан абайлагыла жана сөгүнүүлөрдү угуп да сабыр кылгыла. Жаманчылыкка жакшылык менен жооп кайтаргыла. Эгер кимдир бирөө бүлүк салууну кааласа, ошол жерден акырын кетип калышыңар абзелирээк. Силер жумшактык-сылыктык менен жооп кайтаргыла… Качан мен баланча ушул Жамааттан болуп туруп, кимдир бирөө менен жаңжалдашты деп уксам, ал ыкманы мен такыр жактырбаймын. Ошондой эле дүйнөдө үлгү боло турган Жамааттын такыба жолунан башка жолдон баруусун Алла Таала да жактырбайт. Тескерисинче, Алла Таала ушул нерсеге баса белгилегенин да мен силерге айтып бермекчимин: кимдир бирөө ушул Жамааттан болуп туруп да, сабыр кылбаса жана чыдабаса, ал ушул Жамаатка кирбегенин билип койсун. Мага бериле турган сөгүштөр силердин ачууңар жана толкундооңорго себеп болушу мүмкүн, силер ушул мамилени Алла Таалага тапшырып койгула. Силер аны чече албайсыңар. Менин мамилемди Алла Таалага калтыргыла. Силер ушул сөгүнүүлөрдү угуп да, сабыр кылгыла жана чыдагыла». («Малфузаат», жаңы басылыш, 4-том, 157-бет)