Humanity First Germany shpërndan mish kurbani për mbi 210 familje në Tiranë dhe Librazhd

Nga data 5 deri më 9 qershor 2025, Fondacioni Xhemati Musliman Ahmedia i Shqipërisë realizoi shpërndarjen e mishit të Kurbanit mes njerëzve në nevojë me rastin e Kurban Bajramit, elhamdulilah (Lavdi Zotit). Projekti u financua nga Humanity First Germany dhe u realizua në bashkëpunim me Bashkinë e Tiranës dhe Bashkinë e Librazhdit.

Gjatë këtij projekti, më shumë se 210 familje përfituan mish të freskët kurbani në disa zona të ndryshme brenda Bashkisë së Tiranës dhe Bashkisë së Librazhdit. Projekti u realizua me ndihmën e vullnetarëve lokalë dhe në koordinim me institucionet vendore, me qëllim që ndihma të arrinte tek familjet më në nevojë gjatë ditëve të Bajramit.

Përfaqësuesit e bashkive shprehën mirënjohjen dhe falënderimet e tyre ndaj Humanity First Germany për këtë iniciativë humanitare dhe për kujdesin e treguar ndaj komuniteteve në nevojë. Ata vlerësuan veçanërisht frymën e solidaritetit dhe bashkëpunimit që shoqëroi këtë aktivitet.

Ky projekt ishte një tjetër shembull i përkushtimit të Humanity First për të shërbyer njerëzimin dhe për të sjellë mbështetje, gëzim dhe shpresë tek familjet që kanë më shumë nevojë.