Ardhja e një Reformatori të madh Hyjnor në Ditët e Fundit është parashikuar në shkrimet e shenjta të feve të ndryshme. Këtu synoj të trajtoj një profeci jashtëzakonisht të rëndësishme të bërë nga prijësi dhe udhëheqësi ynë, Profeti i Shenjtë Muhammed s.a.v.s., profeci e cila e ndihmon kërkuesin e së vërtetës që ta njohë Imam Mehdiun. Sipas kësaj profecie:
Do të ndodhnin eklipsi i hënës dhe ai i diellit në datat e përcaktuara të muajit të Ramazanit, që do të shërbenin si shenja të ardhjes së Imam Mehdiut a.s..
Hazret Ali bin Umar el-Bagdadi ed-Darakutni, një autoritet i shquar në shkencën e Hadithit, i cili jetoi nga viti 918 deri në vitin 995 të erës sonë, përkatësisht nga viti 306 deri në vitin 385 hixhri, ka shënuar Hadithin e mëposhtëm, të transmetuar nga Hazret Imam Bakir Muhammed bin Aliu, i biri i Hazret Imam Zejnul Abidinit, Allahu i mëshiroftë:
عَنْ مُحَمَّدِ بْنِ عَلِيٍّ قَالَ: إِنَّ لِمَهْدِيِّنَا آيَتَيْنِ لَمْ تَكُونَا مُنْذُ خَلْقِ السَّمَاوَاتِ وَالْأَرْضِ: تَنْكَسِفُ الْقَمَرُ لِأَوَّلِ لَيْلَةٍ مِنْ رَمَضَانَ، وَتَنْكَسِفُ الشَّمْسُ فِي النِّصْفِ مِنْهُ، وَلَمْ تَكُونَا مُنْذُ خَلَقَ اللَّهُ السَّمَاوَاتِ وَالْأَرْضَ.
“Për Mehdiun Tonë do të ketë dy shenja, të cilat nuk janë shfaqur kurrë më parë që nga krijimi i qiejve dhe i tokës. Hëna do të eklipsohet në natën e parë të Ramazanit, [domethënë në të parën nga netët në të cilat mund të ndodhë një eklips hënor], ndërsa dielli do të eklipsohet në ditën e mesme, [domethënë në të mesmen nga ditët në të cilat mund të ndodhë një eklips diellor]. Këto shenja nuk janë shfaqur [për askënd], që kur Zoti krijoi qiejt dhe tokën.”
(Sunan Darakutni, Kitabul-Idejn, kapitulli: Salatul-Kusuf uel-Husuf ue Hej’etuhuma)
Këto shenja përmenden në përmbledhjet e Haditheve si të myslimanëve sunitë, ashtu edhe të atyre shiitë. Dijetarë të shquar myslimanë i kanë cituar këto shenja në librat e tyre. Kjo profeci është shënuar në disa libra fetarë me autoritet, disa prej të cilëve përmenden më poshtë:
- Fetaua Hadithijje, nga dijetari Shejh Ahmed Shihabuddin Ibn Haxher el-Hejthemi
- Ikmalud-Din
- Biharul-Enuar
- Huxhexhul-Kerame, nga Navab Siddik Hasan Khan
- Mektubati Imam Rabbani Muxheddid Elf-i Thani
- Kijamet Name Farsi, nga Hazret Shah Rafiuddin Muhaddith Dehlavi
- Akaidul-Islam, nga Maulana Abdul Hak Muhaddith Dehlavi
- Iktirabus-Sa’ah, nga Navab Siddik Hasan Khan
- Ahualul-Ahiret, nga Hafiz Muhammedi i Lahokes, etj.
Hadithi përforcohet edhe nga fakti se Kurani i Shenjtë i përmend eklipset si shenja të rëndësishme të afrimit të Kiametit. Kurani i Shenjtë thotë:
“kur të eklipsohet hëna; dhe kur të bashkohen dielli e hëna.”(El-Kijame, 75:9-10)
Pra, burimi themelor i kësaj profecie gjendet në Kuranin e Shenjtë, ndërsa Hadithi i shpjegon këto ajete dhe jep hollësi të çmuara.
Në Dhiatën e Re, Hazret Isai a.s., duke përshkruar shenjat e ardhjes së tij të dytë, tha:
“Tani, fill pas pikëllimit të atyre ditëve, dielli do të erret dhe hëna nuk do të japë dritën e vet.”(Mateu, 24:29)
Mahatma Surdasxhi ka përmendur profecinë se, kur të shfaqej Kalki Avatari, hëna dhe dielli do të eklipsoheshin. Ai shkroi:
“Si hëna, ashtu edhe dielli do të eklipsohen dhe do të ketë shumë dhunë e vdekje.”
Në librin e shenjtë të sikëve, Sri Guru Granth Sahib, shkruhet:
“Kur Maharaxhi të vijë si Nahkalank, dielli dhe hëna do të jenë ndihmësit e tij.”
Me pak fjalë, edhe librat e feve të tjera i përmendin shenjat e diellit dhe të hënës. Në Hadithin e Darakutniut, të cituar më lart, jepen shumë hollësi, të cilat do t’i shqyrtojmë në vijim.