Буюк Британиядаги Аҳмадия Мусулмон Жамоати номидан «Байтул-Футуҳ» масжидида сиёсий ва жамоат арбоблари, депутатлар, фуқаролик ва полиция ҳамда ҳарбий хизматчилар, шаҳар оқсоқоллари ва динлараро вакиллар шарафига катта ифторлик дастурхони тузалди.
Буюк Британиядаги Аҳмадия Мусулмон Жамоати қошида Аҳмадийлар масжидларида “Big Iftar” (Катта ифторлик) номли дастур ташкил этилиб, унга Рамазон ойининг аҳамияти, рўзанинг асл моҳияти ва масжидларнинг муқаддаслиги ҳақида маълумот бериш учун, шунингдек ҳақиқий Ислом таълимотларини ҳам таъкидлаш учун Жамоатимиздан бўлмаган меҳмонлар таклиф этиладилар.
2023-йил 15-апрел, шанба куни Британиядаги Жамоатимизнинг Амири – мукаррам Рафиқ Аҳмад Ҳаёт жанобларининг кўрсатмасига биноан Британиядаги Аҳмадия Мусулмон Жамаотининг миллий «Таблиғ» котиби – Муҳаммад Иброҳим Ахлаф жаноблари назоратида Лондон шаҳрида жойлашган «Байтул-Футуҳ» масжидига туташ «Тоҳир» ва «Носир» саройларида “Big Iftar” (Катта ифторлик) дастури ташкил этилди. Дастур босма ва ижтимоий тармоқлар орқали кенг ёритилган. «Суррей Комет» ва «Wимбледон Таймз» газеталари фотосуратлар билан мақолаларни чоп этди ва Покистоннинг турли телеканаллари ҳам ушбу воқеани ёритиб берди.
Меҳмонларни рўйхатга олиш ва кутиб олиш билан бирга улар кичик гуруҳларга бўлинган ҳолда «Байтул-Футуҳ» масжидининг янги қурилган гўзал биноси қисмларини зиёрат қилиш учун олиб борилдилар. «Байтул-Футуҳ» масжидининг марказий қисмида эркаклар ва аёллар намозгоҳлари ҳам намойиш этилди. Бу вақтда мезбонлар уларга масжиднинг аҳамияти, Рамазон рўзалари, саҳарлик ва ифторлик ҳамда ИсломАҳмадия ҳақида қисқача маълумот ҳам бердилар. Ушбу дастурга 350 нафар Аҳмадий биродарлардан ташқари, биз ИсломАҳмадияга даъват этиб келаётган ҳамда турли сиёсий ва диндорлардан иборат, Жамоатимизга аъзо бўлмаган 850 нафар кишилар ҳам иштирок этдилар. Жами иштирокчилар тахминан бир минг икки юз кишидан иборат эди.
«Носир» саройида бир гўзал кўргазма ҳам ташкил этилиб, унда Қуръони Каримнинг тарихий ва нодир нусхалари, гўзал хаттотлик асарларидан ташқари, Қуръони Каримнинг турли тиллардаги таржималари, «Руҳоний Хазоин»[1], «Малфузот»[2] ва «Саҳиҳ Бухорий»нинг барча жилдлари ҳам тақдим этилган эди. «Ривю Оф Релижанз»[3] ва «Роил Суррей» хайрия ташкилоти дўконлари ҳам ташкил этилган эди. Икки нафар воизимиз ташриф буюрган меҳмонларнинг бир нечтасига араб алифбосида исм-шарифларини ёзиб совға қилишди.
ДАСТУРНИНГ ОЧИЛИШИ ВА МАЪРУЗАЧИЛАРНИНГ ЎЙ-ФИКРЛАРИ
Расмий маросим Буюк Британиядаги Аҳмадия Мусулмон Жамоатининг Амир жаноблари раислигида соат 18:30 да бошланди. Инглиз тилидаги таржимаси билан Қуръони Карим тиловатидан сўнг Жамоатимиз воизи – Усмон Шаҳзод Батт жаноблари йиғилганларни қутлаб, ушбу дастурнинг мақсад ва муддаосини тушунтириб бердилар ҳамда саҳнадаги улуғ зотлар ва маърузачиларни таништирдилар ҳамда Аҳмадия Жамоатининг тарихи ва эътиқодларидан иборат бир қисқача видеони намойиш этдилар.
Кейинроқ сўзга чиққанлар ўз фикр-мулоҳазаларини билдириш учун таклиф қилиндилар. Митчам ва Морден депутати Шавон Макдўно хонимнинг айтишича, Аҳмадия Жамоати ҳар доим муҳтожларга ёрдам беришда биринчи ўринда туради. Ўтган йили Мертон Кенгаши ҳудудида газ портлаши оқибатида жабрланганлар орасида ҳам Аҳмадийлар озиқ-овқат ва бошқа материалларни тақсимлаган эдилар.
Шундан сўнг канслер Жереми Хант жаноблари ўзининг видеомурожаатида Аҳмадия Жамоати томонидан ўргатилган муҳаббат ва бағрикенглик таълимотигина Ислом динининг ҳақиқий даъвати эканлигини, унинг амалий намунаси Аҳмадия Жамоати шиорида ҳам ўз аксини топганлигини айтди.
Кейинроқ, молиявий ишлар бўйича миллий котиб Султон Лавн жаноблари молиявий қурбонликнинг аҳамияти ҳақида маъруза қилдилар ва «Байтул Футуҳ» масжиди тарихига бағишланган видеолавҳа ҳам ёрқин суратлар билан намойиш этилди. Шундан сўнг Буюк Британиядаги Аҳмадия Жамоатининг Амирининг ноиби – Муҳаммад Носирхон жаноблари иштирокчиларга «Байтул Футуҳ» масжидининг аҳамияти ва тарихи ҳақида баъзи муҳим маълумотларни бердилар.
Охирида муҳтарам Амир жаноблари ўзининг якуний нутқида инсоннинг маънавий камолоти, Аллоҳ таоло билан муносабати ва инсониятга хизмат қилишда Рамазон ойининг аҳамиятига алоҳида тўхталиб ўтдилар. У киши Россия ва Украина ўртасидаги уруш шароитида дунёдаги ҳозирги вазиятда Аҳмадия Мусулмон Жамоатининг Имоми – Ҳазрат Мирзо Масрур Аҳмад (аййадаҳуллоҳу таоло би-насриҳил-азиз)нинг тинчлик ўрнатиш учун қилган саъй-ҳаракатларидан сўз қилиб, тинчлик ўрнатиш зарурлигини таъкидладилар ва ўзаро муҳаббат, бағрикенглик ва ҳамкорлик орқали бир гўзал жамиятни яратишда ўз ролини ўйнаш муҳимлигини таъкидладилар. Тадбир жамоавий дуо билан якунланди.
Шом намозига азон айтилганида, ифторлик қилинди. Кейинчалик кўп сонли меҳмонлар нафақат намоз ўқилишини катта қизиқиш билан кузатишди, балки кўплаб меҳмонлар шом намозини ҳам ўқишди.
Намоздан сўнг маросим иштирокчилари дабдабали дастурхонга таклиф этилдилар. Хизмат иштиёқида турган Худдомлар Масийҳ ва Маҳдий (алайҳиссалом)нинг меҳмонларини шундай меҳр ва табассум билан кутиб олдиларки, меҳмонлар таъсирланмай қола олмадилар. Улар катта завқ билан овқатландилар ва бугунги ушбу гўзал ва муваффақиятли тадбир, самимий мезбонлик, Аҳмадия Жамоатининг инсониятга қилган хизматлари ва «Байтул Футуҳ» масжидининг муҳташам биноси ҳақида ўз фикр-мулоҳазаларини билдиришди. Таомдан сўнг муҳтарам Амир ҳазратлари бир неча махсус меҳмонларга совға-саломлар улашиб, уларни кузатиб қўйдилар.
МЕҲМОНЛАРНИНГ ФИКР-МУЛОҲАЗАЛАРИ
Дастурга турли миллатлардан кўп сонли ғайримусулмон меҳмонлар ташриф буюришди. Жамоатимиз аъзоси бўлмаган мусулмонлар орасида Жазоир, Марокаш, Миср, Ироқ ва бошқа баъзи араб давлатларидан келган меҳмонларнинг илиқ муносабати сезиларли бўлиб, уларнинг орасидаги бир сезиларли қисми Аҳмадияни қабул қилиш истагини ҳам билдиришган. Баъзи дўстлари билан дастурга ташриф буюрган африкалик бир мусулмон меҳмон дастлаб бефарқ бўлган бўлса-да, дастур охирида шундай таассурот қолдирдики, у саволларни ҳам бериб, ўзи билан бир қанча китобларни ҳам олиб кетди.
Худди шундай, бугунги ўзини-ўзи уламо деганларнинг сохта Ислом таълимотлари натижасида Ислом динидан юз ўгирган Жамоатимиз аъзоси бўлмаган бир мусулмон меҳмон бу дастурга нафақат рўза тутиб қўшилган, балки «Байтул Футуҳ» масжидида жамоат намозини ҳам ўқиган эди. Шарқий Лондондан келган Аҳмадий бўлмаган бир аёл Жамоатимиз ҳақида жуда салбий ўйларга эга эди ва бугун бунинг ҳаммасини ўз кўзи билан кўргани келган эди. Дастурни томоша қилиб, маърузаларни тинглаб, кўргазмани кўрди, сўнгра мезбонларнинг яхши хулқ-атворидан қойил қолиб, Аҳмадий имом орқасида жамоат намозини ҳам ўқиди, кейин жуда жўшкинлик билан: «Биз билан сизнинг ўртангизда ҳеч фарқ йўқ», – деди.
Яна бир аёл: «Мен Аҳмадий аёллар билан учрашдим ва шу дастур муҳитини кўриб, худди бирорта исломий мамлакатда бўлганимиздек бўлдик», – деди.
Ҳарбий денгиз флотининг фахрий капитани Дардона Ансорий хоним маросимнинг гўзаллиги, ажойиб меҳмондўстлиги, Қуръони Карим ва бошқа китоблар совға қилингани учун бир неча бор миннатдорчилик билдирди.
Кент олий шерифи Н. Аҳмад хоним бу ерда турли миллат ва дин вакиллари тўпланганини кўриш жуда қувонарли эканини, нутқлар ва видеолавҳалар орқали эшитилган ва кўрилганлар, сўнгра мезбонларнинг меҳрибонлиги ва ташкилотчиларнинг гўзал бошқаруви Ислом дини ҳақиқатан ҳам севги, тинчлик ва ҳамжиҳатлик дини эканлигини исботлаганини таъкидлади.
Вандсвортҳ кенгаши Жереми Амбаш жаноблари ўз фикрларини билдириб, бугунги тадбирда иштирок этганимдан жуда хурсандман ва «Аҳмадия Жамоати» томонидан йилнинг ҳар куни маҳаллий ҳамжамият халқига кўрсатаётган хизматларидан миннатдорман, – деди.
(Рожа Ато-ул Маннон, Жавод Аҳмад Қамар ва Али Аҳсан Холид кўмагида репортаж тайёрлаган: Латиф Аҳмад Шайх, халқаро «Ал-Фазл» вакили)
[1] Ҳазрат Имом Маҳдий (алайҳиссалом) ёзган 85га яқин асарлари тўплами «Руҳоний Хазоин» (маънавий хазиналар) деб аталади.
[2] Ҳазрат Имом Маҳдий (алайҳиссалом)нинг сўзлари, нутқлари ва маърузаларидан иборат тўплам «Малфузот» деб аталади.
[3] Буюк Британиядан инглиз тилида чиқадиган Аҳмадия Мусулмон Жамоатининг ойномаси (ойлик мажалласи).