2023-йил 30-август куни Бутунжаҳон Аҳмадия Мусулмон Жамоатининг Раҳбари, Ҳазрат Имом Маҳдий (алайҳиссалом)нинг Бешинчи Халифаси Ҳазрат Мирзо Масрур Аҳмад жаноблари Германиянинг Карбен шаҳридаги «Содиқ» масжиди очилишига бағишланган махсус қабулда асосий нутқ сўзладилар.
Амирул мўминин ҳазратлари тадбир олдидан эсдалик лавҳасини очиб, Аллоҳ таолога шукроналар айтиб, масжидни расман очдилар. Шундан сўнг Амирул мўминин жаноблари масжидда пешин ва аср намозларини ўқиб, янги бинони кўриб чиқдилар.
Кейинроқ, Карбен шаҳар ҳокимиятида бўлиб ўтган махсус тадбирга 90 дан ортиқ меҳмонлар, жумладан, нуфузли меҳмонлар, сиёсатчилар ва масжиднинг маҳаллий қўшнилари ташриф буюришди.
Амрул мўминин ҳазратлари ўзларининг асосий маърузаларида масжидларнинг аҳамияти ва Ислом дини муҳтожларга ёрдам беришга алоҳида урғу беришини айтиб ўтдилар.
Масжиднинг шаҳар маркази яқинида жойлашгани ҳақида гапирар экан, Ҳазрат Мирзо Масрур Аҳмад шундай дедилар:
«Бу масжид шаҳар марказида ва бу жуда яхши нарса, чунки шаҳарларда моддий манфаатдорлик учун қулайликлар мавжуд бўлган жойда Аллоҳни зикр қилишни истаганлар учун ҳам жой бўлиши керак, шунда улар йиғилиб, ягона Аллоҳга ибодат қилишлари мумкин. Шаҳарларда масжид, черков ва бошқа ибодат жойлари ҳам бўлиши керак. Барча эътиқодлар бирлашганда, динлар ўз издошларини бирлашишга ва бир-бирлари билан уйғунликда яшашга ўргатишлари маълум бўлади. Бирорта асосий диннинг Асосчиси ўз издошларини экстремист бўлишга ёки фитна-фасод барпо қилишга ўргатмаган».
Ҳазрат Мирзо Масрур Аҳмад жаноблари яна шундай дедилар:
«Бизнинг эътиқодимизга кўра, барча пайғамбарлар Аллоҳ таоло томонидан бўлиб, одамларга Аллоҳга ибодат қилиш ва бошқаларнинг ҳақ-ҳуқуқларини бажариш ҳақида хабар бериш таълимоти билан юборилган. Шу жиҳатдан атрофимиздаги одамларга Ислом динининг гўзал таълимотларидан хабардор қилишимиз учун шаҳар марказидан масжид учун жой топганимиз яхшироқдир».
Ислом дини бошқаларнинг ҳақ-ҳуқуқларини бажаришга урғу бераётгани ҳақида гапирар экан, Ҳазрат Мирзо Масрур Аҳмад жаноблари ўз ҳақ-ҳуқуқидан бошқаларнинг ҳақ-ҳуқуқларини устун қўйишнинг олтин тамойилини баён қилдилар.
Ҳазрат Мирзо Масрур Аҳмад айтдилар:
«Бошқаларнинг ҳақ-ҳуқуқларини бажариш Исломнинг асосий таълимотидир. Ислом дини сен фақат ўз ҳақинг учун ҳаракат қилишинг керак деб айтмайди. Ислом дини биз бошқаларнинг ҳақ-ҳуқуқларини адо этишимиз керак деб буюради. Сен бошқаларнинг ҳақ-ҳуқуқларини бажаришга ҳаракат қилганингда, дунёда тинчлик бўлади ҳамда ҳамжиҳатлик ва уйғунлик муҳити ҳукм суради. Бу бизнинг бугунги дунёмизга керак бўлган нарсадир».
Амирул мўминин ҳазратлари аввалги сўзга чиққан меҳмонлардан бирининг айтган сўзларига ишора қилиб, дунёнинг баъзи жойларида дин номидан ноҳақ адолатсизликлар амалга оширилаётгани ҳақида гапирдилар.
Ислом таълимотлари нуқтаи назаридан Аҳмадия Мусулмон Жамоати амалиётини ёритиб, Ҳазрат Мирзо Масрур Аҳмад жаноблари шундай дедилар:
«Дин ҳеч қачон одамларга қон тўкишига йўл қўймайди. Аксинча, дин одамларни бошқаларга хизмат қилишни буюради. Аҳмадия Мусулмон Жамоати қаерда ташкил этилмасин, биз одамларга эътиқодларидан қатъий назар хизмат қиламиз… Африкада биз мактаблар ва шифохоналарни очдик, шунингдек сув ва бошқа шарт-шароитлар билан таъминлаш учун намунавий қишлоқ лойиҳаларини яратдик. Бу ташаббуслардан фойда кўраётганларнинг камида 80 фоизи Аҳмадий мусулмонлар эмас».
Ҳазрат Мирзо Масрур Аҳмад жаноблари дунёнинг баъзи жойларида одамлар дуч келадиган қийинчиликлар ҳақида гапириб, шундай дедилар:
«Ривожланган дунёда ҳукумат сувдан эҳтиёткорлик билан фойдаланиш муҳимлигини мунтазам эслатиб турса-да, биз тоза сувнинг қадрини тушуна олмаймиз. (Ривожланаётган мамлакатларда) эса сувга эга бўлмаган одамлар бор ва шунинг учун уларнинг болалари сув олиш учун бир неча километр йўл босиб ўтишлари керак бўлади. Улар асосий эҳтиёжлари учун сувни челакларда бошларида ташиб юришади. Шундай қилиб, ана шундай одамларга енгилликлар яратиш мақсадида Аҳмадий мусулмон кўнгиллиларимиз мана шундай чекка жойларга бориб, қишлоқларда сув иншоотлари ўрнатадилар».
Одамлар сув билан таъминланганда, қандай ҳис-туйғуларни ҳис қилишларини тасвирлаб, Ҳазрат Мирзо Масрур Аҳмад жаноблари айтдилар:
«Одамлар остонасида тоза ичимлик суви олиш мумкин бўлган сув кранини кўрганларида, уларнинг қувончи чексиздир. Ривожланган мамлакатлардаги одамлар, ҳатто, катта миқдорда пул ютиб олишган тақдирда ҳам, ичимлик сувини кўрганларида, бу одамлар каби қувончни ҳис этмайдилар. Тупроқ аралашган, касалликларга сабабчи бўлган сув учун узоқ йўл босиб ўтишга ҳожат қолмаганидан улар ўзларини чексиз қувонтирадилар. Бунинг ўрнига эса улар остонасидаги тоза сув билан барака топишади».
У зот маърузачилардан бирининг Афғонистондаги аёлларга муносиб ҳақ-ҳуқуқлари берилмаётгани ҳақида айтган гапларига ҳам тўхталиб ўтдилар.
Ҳазрат Мирзо Масрур Аҳмад жаноблари Ислом таълимотига ойдинлик киритар экан, шундай дедилар:
«Ислом ва Қуръони Карим аёлларга меҳр-мурувват кўрсатишни ўргатади. Аслида аёлларга нисбатан энг олий ахлоқни кўрсатишни буюради. Ислом аёлларнинг ҳис-туйғулари ва ҳиссиётлари эркаклар каби бир хил эканлигини таъкидлайди ва шунинг учун эркаклар уларга ҳурмат билан қарашлари ва уларнинг эҳтиёжларини қондиришга ҳаракат қилишлари керак. Ислом таълимотига амал қилган ҳолда, аёллар эркинлик ва тенгликка эга. Кўпгина Аҳмадий мусулмон аёллар шифокорлар, муҳандислар, қишлоқ хўжалиги ходимлари, иқтисодчилар ва бошқа турли соҳаларда бўлиб, улар халққа хизмат қилиш учун борадилар, шунингдек инсоният хизмати учун вақт ва ҳаётларини сарфлашади. Ислом аёлларга барча ҳуқуқларни, жумладан, мерос ҳуқуқини ҳам берган».
Мурожаатдан аввал Германиядаги Аҳмадия Мусулмон Жамоатининг миллий Амири (раиси) Абдуллоҳ Вагизҳавзер масжид билан таништирдилар, Германия федерал парламенти аъзоси Натали Павлик, Ҳессен штати парламенти аъзоси Тобиас Уттер ва Карбен мэри Гвидо Раҳн жаноблари масжидни қадрлашлари ва Аҳмадия Мусулмон Жамоатининг маҳаллий жамоадаги саъй-ҳаракатларини эътироф этиш учун сўзга чиқдилар.