گروڤەیێت ڕاستبێژی یا مەسیحێ ژڤاندار (سلاڤێت خودێ لسەر بن)

هەمی ئەو پێپیڤێت د پێغەمبەرێت بەرێ دا هاتینە دیتن و مروڤا ب وان پێپیڤا راستبێژیا وان پێغەمبەرا زانی لدەف مەسیحێ ژڤاندار ژی(سلاڤێت خودێ لسەر بن) هاتنە دیتن، و ڕاستبێژیا وی بەهانەكا قیچ و حنێرەكا خویا بوو لسەر ڕاسبێژیا داخوازیا وی و ئەو تشتێت خودێ داینە ڤێ، و چونكو قورئانا ماندار شەنگستە یە بو زانینا ڤان پێپیڤان، ژبەر ڤێ چەندێ دێ زڤرینە قورئانا مەردین بو دیاركرنا وان پێپیڤان و بجهئینانا وان لسەر مەسیحێ ژڤاندار (سلاڤێت خودێ لسەر بن).

پیڤانووكێ ئێكێ:-

خودێ یێ مەزنتر ژ بو سەلماندنا راستبێژیا پێغەمبەرێ مە محەمەدی (سلاڤێت خودێ لسەر بن) دبێژیت {فَقَدْ لَبِثْتُ فِيكُمْ عُمُرًا مِنْ قَبْلِهِ أَفَلَا تَعْقِلُونَ} ئانكو: {بەری نوكە ئەز ژییەکێ درێژ دناڤ هەوە دا یێ ژییایم، ما هین بژیر ناكەڤن} (یونس: 17). دڤێ هەڤووكا پیروز دا چوار مەرج یێت هەین د هەر داخوازكارەكی دا هەبن، ئەو راستبێژە.

مەرجێ ئێكێ: بەری داخوازیا وی ئەو دناڤ مللەتێ خودا ژییابیت نە یێ بیانی بیت ژ وان.

مەرجێ دووێ: و نە چەند سالەكێ بتنێ د ناڤ وان دا ژییا بیت، نە، لێ ژییەكێ درێژ دناڤ وان دا بر بیت، و د قوناغا زاروكینیێ و سنێلە ییێ و گەنجینییێ و زەلامینیێ دا هاتبیتە سەلماندن كو مروڤەكێ راستبێژ بوو.

 مەرجێ سییێ: د ناڤ مللەتێ خودا یێ بەر نیاس بیت نە یێ نە نیاس بیت، چونكو دەمێ خودێ مەزنتر دبێژیت {عُمُرًا} (تنوین) ی َ ددانتە سەر ئەلیفێ (اً) ئەڤە نیشانا رێز و مەزناهیێ یە، و ئەگەر ئەڤ مروڤە كارەكێ نە مەیسیمێ خو بكەت، بەحسێ وی دێ ئێتە كرن و دەنگ و باسێت وی دێ زوی بەلاڤ بن.

مەرجێ چارێ: یا فەرە ئەڤ هەرسێ سالوخەتە، ئەڤێت مە د خالێت چوویی دا گووتین، بەری داخوازیا وی لدەف وی هەبن.

هەر داخوازكارەكێ ئەڤ چوار سالووخەتە لدەف هەبن، تڤیا ئەو یێ راستبێژ بیت، هەمی پێغەمبەرا ئەڤ سالووخەتە لدەف هەبوون، ژ بەر ڤێ چەندێ د هەڤووكا پیروز دا د گەل ژیردارا دئاخڤیت، و هەڤركیا وان دكەت و دبێژیت {ما هین بژیرناكەڤن} و یا ئاشكرایە دەمێ هەڤووكا پیرووز {عێلا خو یا نێزیك ئاگەهداركە} ئەوا لدەسپێكا داخوازكرنا پێغەمبەری (سلاڤێت خودێ لسەر بن) بو هاتیە خوارێ، بەری هەر تشتەكی پێغەمبەری (سلاڤێت خودێ لسەر بن) بریارپێدان و دیدەڤانی ژ مللەتێ خو وەرگرت كو ئەو راستبێژە، چوو چیایێ (صفا) و دگەل وان كووم بوو و بهەمی دەنگێ خو دگەل وان ئاخفت و ئەو مانە جوحونی و گوهێ وان ما لوی، گووتە وان {ئەگەر من گووتە هەوە لپشت ڤی چیای، لەشكەرەكێ مەزن یێ هەی، هین دێ باوەر ژ من كەن؟ وان بەرسڤا وی دا و گووتن {مە چ درەو ژ تە نە دیتینە} راستبێژیا پێغەمبەرا بەری پێغەمبەراتیێ گرووڤەكێ بهێزە لسەر راستبێژیا وان و ئەڤە تشتەكێ مەزنە و مەترسییا خو یا هەی، و چەند مروڤ دسەررا دچن بێ ی كو های ژێ هەبن و ترانێت خو پێدكەن و ئەڤ گروڤەیە یێ لسەر مەزنترین شەنگستە هاتینە ئاڤاكرن و هەمی زانست و زانین یێ لسەر ڤی شەنگستەی یێت هاتینە ئاڤاكرن، ئەو ژی شەنگستێ راخواندنێ یە (استقراء) و هەر كەسەكێ ڤی گروڤەیێ زانستی ئەوێ قورئانا ماندار دیاركری، درەو دەربێخیت، یا فەرە لسەر وی ئەو لاپەرێت دیروكێ و ژیانا هەمی مەزنا بخوینیت، دێ ئێك ژ وان ددیرووكێ دا بینیت كو ئەڤ هەر چوار سالووخەتێت مە گووتین لدەف هەبن و پاشی دیار بوویە كو ئەو درەوكەرە؟؟؟

بڤی گرووڤێ بهێز مەسیحێ ژڤاندار (سلاڤێت خودێ لسەر بن) بەرەڤانی ژ راستبێژیا خو كر و گووت: و ئەڤە وەرگێرانا ئاخفتنا وی یە ژ زمانێ ئوردی بو زمانێ كوردی {باوەربكەن، هین نەشێن درەوەكێ یان بوهتانەكێ یان فێلبازیەكێ دژیانا من یا چوویی دا ببینن، ڤێجا هین باوەردكەن كو مروڤەكێ هوسا یێ دژیانا خودا درەو و فێلبازی نە كربن دێ ژ نوی درەوا كەت و دێ ڤی تشتی ژ نك خو بێژیت؟ ئێك ژ هەوە هەیە بشێت نەكامیێ لسەر تشتەكی د ژیانا من یا بووری دا، بكەت؟ و ئەڤە قەنجییەكە خودێ مەزنتر دگەل من كری، كو ئەز فێری باشیێ كریم و ئەز هێشتا یێ بچیك.، و ئەڤ كار و بارە حنێرە بو هزرڤانا} (تذكرة الشهادَتَین: 26)، و ئەگەر ئەم بەحسی دیدەڤانیا مەزنترین دوژمنێ وی بكەین، تێرا هەیە كو ئەم بزانین كا ئەو د ژیانا خو دا یێ چەوا بوو، دوژمنێ وی (شێخ محەمەد حوسێن بەتالەوی) بەحسی پەرتووكا مەسیحێ ژڤاندار (البراهین الأحمدیة) دكەت، بەری داخوازیا خو رابگەهینیت، {وەكی ڤێ پەرتووكێ د جیهانا ئیسلامی دا نە هاتینە نڤیسین، و ئەم نوزانین كا خودێ یی َ مەزنتر دێ ل پاشەروژێ چ كەت، و وەكی نڤیسەرێ وێ نینن، كێم مروڤ وەكی وی دجیهانێ دا یێت هەین، دخوراگرتنا خودا و لسەر بەرگریا وی ژ ئایینێ ئیسلامێ و سەرئێخستنا وی بو ئایینێ راست، بگیانێ خو و خامە ی و ئەزمان و گووتنا خو، و یێ باوەر ژ مە نەكەت بلا هەفكیفێ وی نیشا مە بدەت، كا كیژكە؟ و كا ئەو دشێت وەكی وی ئیسلامێ خویا بكەت؟ و دشێت بەرسڤا وان هێرشا بدەت ئەوێت ژ لایێ ئایینێت نە درست ڤە دژی ئیسلامێ و پێغەمبەری (سلاڤێت خودێ لسەر بن) دهێنە كرن؟ ئەو بەرسڤا وان بگروڤێت بهێز ددەت، كو كەسێ بەری وی بەرسڤێت هوسا نە بن، نڤیسەرێ (البراهین الأحمدیة) دسەر بوورێت دوژمنێت خو دا، و دتاقی كرنێت هەڤالێت وی دا، یا دیارە كو ئەڤ مروڤە لپەی یاسا یێت ئایینێ ئیسلامێ دژیت و یێ ژخودێ ترسە، یێ جامێر و راستبێژە} (إشاعة السنة، بەرگێ شەشێ).

هەروەسا مەسیحێ ناسڕی ژی هەر ب وێ ڕێ یێ، هەڤڕكیا مللەتێ خو دكر و گووتنا خو یا ناڤدار د گووت {کی دێ شێت گوننەهەكا من بێژیت و من بێدەنگ كەت}

پیڤانووكێ دووێ:-

ئەوە یا قورئانا مەردین دیاركری ب گووتنا خودێ مەزنتر دەمێ دبێژیت {قُلْ إِنَّ الَّذِينَ يَفْتَرُونَ عَلَى اللَّهِ الْكَذِبَ لَا يُفْلِحُونَ} ئانكو: {بێژە ئەوێت درەوا بدیف خودێ ڤە دنن، سەرناكەڤن} (یونس: 70) و ئەڤ گووتنە ژی یا خودێ مەزنتر {وَلَوْ تَقَوَّلَ عَلَيْنَا بَعْضَ الْأَقَاوِيلِ (*) لَأَخَذْنَا مِنْهُ بِالْيَمِينِ (*) ثُمَّ لَقَطَعْنَا مِنْهُ الْوَتِينَ (*) فَمَا مِنْكُمْ مِنْ أَحَدٍ عَنْهُ حَاجِزِينَ (*)} ئانكو: {و ئەگەر هندەك گووتن بدیف مە ڤەنان، دێ بهێز ژێ ستینین و رەها دلێ وی برین و كەس ژ هەوە نەشێت بەرەڤانیێ ژێ بكەت} (الحاقة: 45_48). ئەڤ هەردوو هەڤووكە و یێت وەكی وان د قورئانا مەردین دا گەلەك ب ئاشكرایی دیاردكەن، كو یێ درەوا بدیف خودێ مەزنتر ڤەنیت، چ جارا دداخوازیا وی بسەرناكەڤیت…  و دیرووك د لاپەرێت خودا بەحسی چ پێغەمبەرێت درەوكەر نە کریە كو داخوازییا ئێک ژوان سەركەفت بیت، یان دیفكەتی یێت وی ل جیهانێ مابن، و چ كەسێ ژ درەو خو كریە پێغەمبەر و درەو بدیف خودێ یێ مەزنتر ڤەناین، دیفكەتی یێت وی یێت تەراوبەرا بووین و داخوازكاریا وی نەمایە، و چ كەسێ باوەریێ بڤی گروڤەی نەئینیت ئەوێ د قورئانا مەردین دا هاتی، بلا بو مە ئێكی بینیت ددیرووكێ كو ژ درەو خو كر بیتە پێغەمبەر و سەر كەفت بیت و شینوارەك ژێ ما بیت، كورێ (قەییم) د پەرتووكا خو (زاد المیعاد) دا دبێژیت {ئەم نابێژین چ زەلام ددیرووكێ دا نە هاتینە كو ژ درەوخو كربیتە پێغەمبەر، لێ دەمەكێ كورت یێت ماین و دەمێ وی درێژ نە بوویە و كارێ وی تەكووز نە بوویە، و خودێ هنارتی یێت خو یێت زالكرین لسەر وی و شینوار و پا شمایێت وی نە هێلاینە. هەر ژ دەسپێكا جیهانێ ئەڤەنە كریار و رەفتارێت خودێ دگەل كوولەیێت وی، و دێ هوسا مینیت تاكو خودێ دبیتە پا شماگرێ ئەردی و یێت لسەر . (زاد المعاد – بەرگێ 1 پ 500)، و خودانێ پەرتووكا (النبراس – 444) دبێژیت: {و هندەكا ژدرەو خو كر بوونە پێغەمبەر وەكی (مسیلمة الیمامي و الأسود العنسي و سجاح الكاهنة)، هندەك ژ وان هاتنە كوشتن و هندەك لخوزڤرین، و كاروبارێت ڤان درەوكەرا بو چەند روژەكا ڤەكێشا}.

د پەرتووكا (شرح العقائد – 100) یا (نەسەفی) دا یا هاتی {ژیرێ مروڤی دزانیت كو ئەڤ سالوخەتە د نە پێغەمبەرا دا كووم نا بن، و خودێ بهنا خو (23) سالا لدرەوكەرا فرەه ناكەت}.

مەسیحێ ژڤاندار (سلاڤێت خودێ لسەر بن) پشتی داخوازكاریا خو دیاركری (30) سالا هەمی مروڤ داخوازدكرنە ئیسلامێ و ب قورئانا مەردین كار بەن، ڤیجا ما چێ دبیت یێ درەوكەر بیت؟!! خودێ نەكەت، و خودێ وی پیڤانووكێ د قورئانا مەردین دا ئینا نا شكێنیت، ئەو تشتێت پێشەوایێت ڤەكوولەرا سەلماندین و یا د دیرووكێ دا هاتی یێ ژ درەو خو بكەتە پێغەمبەر سەرناكەڤیت.

پیڤانووكێ سییێ:-

(حنێر و گرووڤە) (المعجزات و الآیات)

ئەو گرووڤەیێت خودێ مەزنتر داینە مەسیحێ ژڤاندار ژبو راستبێژیا وی گەلەكن، ژ وان حنێران فێربوونا وی بو زمانێ عەرەبی د شەڤەكێ دا، و دەست بنڤیسینا پەرتووك و هوزانا ب زمانێ عەرەبی، بیست و دوو پەرتووكێت بعەرەبی نڤیسین، هەروەسا خودێ حنێرا ئێشا کولا ڕەش (الطاعون) ژی دابوویێ، هێژای پێشبینیا ئێشا کولا ڕەش كربوو، كو ئەڤ ئێشە دێ بەلاڤ بیت و دێ بیتە ئیشكەنجە بو بەرهنگارێت وی و دێ بیتە گروڤە بو راسبێژیا وی، كو ئەو خو ڤاكسین ناكەت و ئێش نا ئێتێ. هەرووسا حنێرا (غەیرینا روژێ و هەیڤێ) ژی یا دایێ، و ئەڤە پێشبینیا پێغەمبەرێ مە یە، (سلاڤێت خودێ لسەر بن) د (سنن – دار القصنی) دا دبێژیت  {مەهدی یێ مە دوو گروڤەیێت هەین، ئەڤە ژ ئافراندنا ئەرد و عەسمانا وەرە چێ نە بوویە، هەیڤ دێ د شەڤا ئێكێ د رەمەزانێ دا دێ غەیریت و دێ روژ د نیڤا وێ دا غەیریت، و ئەڤ تشتە هەر ژ ئا فراندنا ئەرد و عەسمانا تاكو نوكە چێ نە بوویە، و ل سالا 1894 و و ل سالا دیف را ژی 1895 كا چەوا د ئاخفتنا گراڤی دا هاتی هەردوو غەیرین چێ بوون، و ئەڤە د ژیانا مەسیحێ ژڤاندار دا بوو، هەرووسا حنێرێت ساخكرنا گەلەك مروڤان، ژ وان ئیشا كو دوختور ژێ بێ هیڤی ببوون.

پیڤانووكێ چارێ:-

ئەوە یێ قورئانا مەردین گووتی، دەمێ خودێ مەزنتر دبێژیت {عَالِمُ الْغَيْبِ فَلَا يُظْهِرُ عَلَى غَيْبِهِ أَحَدًا (*) إِلَّا مَنِ ارْتَضَى مِنْ رَسُولٍ فَإِنَّهُ يَسْلُكُ مِنْ بَيْنِ يَدَيْهِ وَمِنْ خَلْفِهِ رَصَدًا (*) لِيَعْلَمَ أَنْ قَدْ أَبْلَغُوا رِسَالَاتِ رَبِّهِمْ وَأَحَاطَ بِمَا لَدَيْهِمْ وَأَحْصَى كُلَّ شَيْءٍ عَدَدًا (*)} ئانكو: {زانایێ نەبیناتیێ، نەبیناتییا خو بە كەسێ دیار ناكەت، ژبلی هنارتییەكی ئەو حەز بكەت بو دیار كەت، ئەو لپێش و پاشیا وی زێرەڤانەكی ددانتێ، دا بزانیت كو وان نامێت سەمیانێ خو گەهاندن، و باش دزانیت كا وان چ كریە، و هەمی تشت هژمارتن و یێ پێزانە بهەمی تشتی} (الجن: 27_29)، ئەڤ هەڤووكا پیرووز ب ئاشكرایی دبێژیت كو خودێ گەلەك نەبیناتییا نیشا پێغەمبەرا ددەت، و خودێ مەزنتر ب هزارەها كارێن نەبیناتییێ بو مەسیحێ ژڤاندار (سلاڤێت خودێ لسەر بن) دیاركر بوون، هندەك ژوان یێت رویداین و یێت دی هێشتا دەمێ وان نە هاتیە، ژوان پێشبینیێت د ژیانا ویدا (سلاڤێت خودێ لسەر بن) رویداین و بجههاتین،، خودێ مەزنتر دگووتێ كا دێ وی چ زارووك هەبن بەری زارووك ژ د ایك ببیت و دا ناڤی ژی دانتە سەر. هەروەسا لسەر جەنگێ جیهانی یێ مەزن گووت بوویێ، قە یسەرێ رووسیا دێ كەفتە د سەرووبەرەكێ نەخوش دا، دەنگ و باسێت ئێشا کولا ڕەش گووت بوون بەری بێت، و دەردەسەریا دیمەشقێ، و راهژیانێت ل وولاتێ هندێ، و لسەر (نادر خان) كو دێ ناڤێ وی بیتە (نادر شاهـ)، و لسەر ژیانا خو گووت بو دێ ژیێ من یێ درێژ بیت، وئەڤ گووتنە دناڤ مروڤادا بەلاڤ كربوو بەری مرنا خو ب سیه سالا، و گووت بوو كو دێ دویندەها مامێت وی بریێت و قر بیت و دێ ژوی دەسپێكەت، و خودێ دویندەهەكا دویر نیشا دا بوو، و گووت بوو ئەو دێ مرنەكا ئاسایی مریت و كەس نەشێت وی بكوژیت، چونكو خودێ دێ وی پارێزیت، خودێ ئەڤ هەڤووكا پیرەەز بو هنارت بوو {خودێ گووت: هەی عیسا ئەز دێ تە مرینم} وەكی ڤان نەبیناتییا گەلەكن و هندەك ژوان د ژیانا وی دا یێت بجههاتین و راستبێژیا وی پێ ئاشكرا ببوو.

پیڤانووكێ پێنجێ:-

ئەڤ گووتنا خودێ مەزنترە، دەمێ د بێژیت {كَتَبَ اللَّهُ لَأَغْلِبَنَّ أَنَا وَرُسُلِي إِنَّ اللَّهَ قَوِيٌّ عَزِيزٌ} ئانكو: {خودێ یا نڤیسی ئەز و هنارتیێت خو دێ سەركەڤین} (المجادلة: 22)، سەركە فتن ژی دوو جوینن

١- سەركەفتنا زانستی ب گرووڤە یا، چەوا گووتنا خودێ دبێژیت {قُلْ فَلِلَّهِ الْحُجَّةُ الْبَالِغَةُ} ئانكو: {خودێ گروڤەیێ بهێز یێ هەی} (الأنعام: 150) ئێكەمین تشت خودێ ڤێ ددەتە پێغەمبەرا، و پێ دشێن هەڤركێت خو، و یا گووتیە مەسیحێ ژڤاندار (سلاڤێت خودێ لسەر بن) كو دیفكەتی یێت تە دێ هەر شێنە یێت دی، و كووما ئەحمەدی یا دشێت هەمی وان كوومێت دی ئەوێت وان درەوین دەردئێخن. ئەوێ دئێنە قادا گەنگەشێ و هەڤپەیڤینا برێیێت زانستی یێت درست، و یا ب بەلاڤووكێت خو هەڤركیا هەمی مروڤا دكەت دهەمی دەما دا..

٢- سەركەفتنا دووێ:-

سەركەفتنا متای یە، و ئەڤە ژی پیچ پیچە گەشە دكەت و پتر لێ دهێت، تاكو راستیا خودێ ئاشكراو دیاردبیت، و بلا بدلێ دوژمنێت راستی یێ ژی نە بیت، خودێ مەزنتر دبێژیت {أَوَلَمْ يَرَوْا أَنَّا نَأْتِي الْأَرْضَ نَنْقُصُهَا مِنْ أَطْرَافِهَا وَاللَّهُ يَحْكُمُ لَا مُعَقِّبَ لِحُكْمِهِ وَهُوَ سَرِيعُ الْحِسَابِ} ئانكو: {ما وان نە دیتیە، ئەم ئەردی دگرین و ژ رەخا ڤە كێم د كەین و خودێ زالداریێ دەت و پشتی وی زالداری نینە و خەلاتكرن و سزادانا وی یا بلەزە} (الرعد: 42)