بوچی ناڤێ مەسیحێ ژڤاندار (غولام ئەحمەدێ قادیانی) د حەدیسێت پێغەمبەری دا، كریە “كورێ مریەمێ”!؟
بەرسڤا ئێكێ:
ناڤێ ئەحمەدێ مەسیحێ ژڤاندار، پێغەمبەری یێ كریە (كورێ مریەمێ) (سلاڤێت خودێ لسەر بن). ژبەر گەلەك ئەگەرا،
ئەگەرێ ئێكێ:– خودێ، (مەسیحێ) كورێ مریەمێ پشتی مووسا پێغەمبەری لسەرێ سەدێ چواردێ هنارت بوو، هەرووسا میرزا غولام ئەحمەد (مەسیحێ ژڤاندار) ژی یێ لسەرێ سەدێ چواردێ پشتی محەمەد پێغەمبەری (سلاڤێت خودێ لسەر بن) یێ هاتی.
ئەگەرێ دووێ:– مەسیحێ ئیسرائیلی باوەرژێكری و خزمەتكارێ یاسایێت مووسای شەریعەتا مووسای بوو (سلاڤێت خودێ لسەر بن)، و چ یاسایێت سەربخو نەئیناینە كو پێ یاسایێت بەری خو راكەت، هەروەسا ئەحمەدێ مەسیحێ ژڤاندار ژی باوەرژێكری و خزمەتكارێ یاسایێت محەمەدی بوو و چ یاسایێت نوی و سەربخو كو یاسایێت بەری خو راكەت نە ئیناینە.
ئەگەرێ سیێ – دەمێ مللەتێ ئیسرائیلی لاواز و بێچارە بووی، مەسیحێ ئیسرائیلی دیار بوو. هەروەسا مەسیحێ ژڤاندار ژی ددەمێ لاوازیا ئیسلامێ دا هات.
ئەگەرێ چارێ – كا چەوا مەسیحێ ئیسرائیلی ل بن زالداریا روما پەیدا بوو، ئەها هوسا مەسیحێ محەمەدی ژی ل ژێر زالداریا كرستییانا پەیدا بوو، وپێغەمبەری بخو (سلاڤێت خودێ لسەر بن) ناڤێ (روم) یێ دانایە لسەر كرستییانا: دەمێ گووتی “دێ دەمژمێر رابیت دەمێ رومی پرانیا مروڤان” (صحیح مسلم)
ئەگەرێ پێنجێ – مەسیحێ ئیسرائیلی د خەملاندنا جوانیێ دا هاتە هنارتن و زالداری بدەست خو نە ئێخست چەوا جوهیا د گووت، هەرووسا مەسیحێ ژڤاندار ژی ب خەملاندنا جوانیێ هاتە هنارتن و چ هەییدارییەكا پێشچاڤ لڤێ جیهانێ نە بوو. و بەروڤاژی هیڤیێت وان موسولمانا هات ئەوێت حەژ تشتێت پێشچاڤ دكەن.
ئەگەرێ شەشێ:- مەسیحێ ئیسرائیلی ژلایێ بابی ڤە نە ژ مللەتێ ئیسرائیلێ بوو، چونكو ئەو بێ باب ژ دایك بوو، لێ یێ ئیسرائیلی بوو ژ لایێ دایكێ ڤە، هەرووسا مەسحێ محەمەدی ژی ژ قورەیشییا ژ (عەرەبا) ژ لایێ بابی ڤە نە هاتیە! چونكو ئەو ژ مللەتێ فارسی بوون، و ئەو قورەیشی و عەرەبە ژ لایێ دایكێ ڤە، چونكو هندەك پیرێت وی ژ زارووكێت فاتیمایێ بوون ژمروڤێت پێغەمبەری (سلاڤێت خودێ لسەر بن) .
ئەگەرێ حەفتێ – جوهیا گووتنە عیسای (سلاڤێت خودێ لسەر بن) تو گاووری، و درەوین دەرێخست و حەزكرن بكوژن، و راكێشانە بەر دادگەهێ، هەرووسا هندەك زانایێت موسولمانا ژی ئەڤە بسەرێ مەسحێ محەمەدی ئینان، گوننەهباركرن ب گاووریێ و گووتنێ تو درەوا دكەی و و ل دادگەهێت زالداریێ گازندە نامە دژی وی راكرن، و لبەر كوشتنا وی گەریان، كا چەوا خودێ سوزدایێ و گووتیێ (ئەگەر مروڤ تە نە پارێزن، خودێ دێ تە پارێزیت) هوسا ئەو ژ تەپكێت مروڤا پاراست.
و یا ئاشكرا یە كو پێغەمبەر (سلاڤێت خودێ لسەر بن) زمانڤانترین زمانڤان بوو، ژ بەر ڤێ چەندێ بەحسی مەسیحێ ژڤانداردكەت وەك میناك دبێژیت “هین چ د بێژن ئەگەر كورێ مریەمێ دناڤ هەوە دا هاتە خوار و پێشڤانێ هەوە ژ هەوە یە” (صحیح البخاری – مژارێ هاتنە خوارا عیسایێ كورێ مریەمێ) و دبێژیت “هین چ دبێژن ئەگەر كورێ مریەمێ دناڤ هەوە دا هاتە خوار و پێشڤانیا هەوە كر” (صحیح مسلم – مژارێ دیاركرنا عیسایێ كورێ مریەمێ) دیاردكەت كو ئەو دێ ئێك ژ مللەتێ محەمەدی بیت.
بەرسڤا دووێ:
و د ئاخفتنەكا دی دا پێغەمبەری (سلاڤێت خودێ لسەر بن) گووت بوو هندەك ژنێت خو “هین هەڤالێت یوسڤی نە، هەرن و بێژنە ئەبا بەكری دا نڤێژێ ب مروڤا بكەت” (صحیح البخاري – پەرتووكا بانگا)، بەرێ خو بدێ چەوا پێغەمبەری (سلاڤێت خودێ لسەر بن) ناڤێ هەڤالێت یوسڤی دانا سەر وان، چونكو بتنێ بتشتەكی ڤە وەكی ئێكن.
بەرسڤا سییێ:
جوینەكێ موسلمانێت كەڤنار ئەوێت كویر چووینە دناڤ رامانێت هویر یێت قورئانێ و ئاخفتنێت پێغەمبەری دا، گەهشتنە وی ئەنجامی كو مەبەست ژ هاتنا خوارا عیسایێ كورێ مریەمێ ئەوە هاتنا زەلامەكی وەكی عیسایێ كورێ مریەمێ یە ژلایێ رێز و پایە بلندی یێ ڤە، هەرووسا زانا سیراج ئەلدین بابێ حەفصی عومەرێ كورێ وەردی د پەرتووكا خو (خریدة العجایب و فریدة الغرائب) دا د بێژیت “برەكا موسلمانا دگووت: هاتنا خوارا عیسایێ كورێ مریەمێ ئەوە كو زەلامەكێ وەكی عیسایە ژ لایێ رێز و بهای ڤە، دەمێ دبێژنە زەلامێ باش فریشتە و دبێژنە یێ نەباش شەیتان مەبەستا وان كو وەكی فریشتەیە یان وەكی شەیتانی یە نە ئەو بخویە” (لاپەرێ -205).
بەرسڤا چارێ:
پێغەمبەری (سلاڤێت خودێ لسەر بن) یا دیاركری سالوخوتێ مەسیحێ ژڤاندار یێ جودایە ژ سالوخەتێ مەسیحێ ناسری، دەمێ خودێ پێغەمبەر ب شەڤێ بریە عەسمانا، وی عیسا و مووسا و ئیبراهیم (سلاڤێت خودێ لسەر وان بن) دیتن، بەحسی عیسای كر و گووت” هندیكە عیسایە یێ سورسورەیە و پرچ خەلەكە و سنگ فرەهە، (صحیح البخاري) مەسیحێ ژڤاندار سالوخەت ددەت و دبیژیت ” شڤێدی دخەونێ دا من خو ددیت ئەز یێ لدەف كەعبێ و زەلامەك لوێرێ بوو یێ ئەسمەر بوو و پرچا سەرێ دگەهشتە ملێت وی و زەلامەكێ ب موی بوو وئاڤ ژ پرچا وی دکەت و دەستێت خو دانا بوونە سەر ملێت دوو زەلاما و لدوور خانی دزڤری، من گووت، ئەڤە كی یە؟ گووتن ئەڤە مەسیحێ كورێ مریەمێ یە” (صحیح البخاري – پەرتووكا دەسپێكرنا ئافراندنێ، مژارێ- دپەرتووكێ دا لسەر مریەمێ باخڤە).
نە وەكهەڤیا هەر دوو سالوخەتا گروڤەیە كو مەسیحێ ژڤاندار یێ مللەتێ محەمەدی نە مەسیحێ عیسایێ كورێ مریەمێ یێ ناسری یە (سلاڤێت خودێ لسەر هەردوویا بن).
بەرسڤا پێنجێ:
خودێ یێ مەزنتر لسەر مەسیحێ ناسری (سلاڤێت خودێ لسەر بن) دبێژیت {وَرَسُولًا إِلَى بَنِي إِسْرَائِيلَ} ئانكو: “و هنارتی یە بو مللەتێ ئیسرائیل” (آل عمران: 50) ومەسیح بخو ژی دبێژیت {يَابَنِي إِسْرَائِيلَ إِنِّي رَسُولُ اللَّهِ إِلَيْكُمْ} ئانكو: “هەی مللەتێ ئسرائیل ئەز هنارتی یێ خودێ مە بو هەوە” (الصف: 7) ئانكو مەسیحێ ناسری بو مللەتێ ئسرائیلی بتنێ هات بوو هنارتن. ئەگەر ئەم هزركەین كو عیسایێ ناسری ب خو دێ ڤەگەریێت و ژ عەسمانا ئێتە خوار ودێ بیتە دویڤگرێ هێژایێ مە محەمەد پێغەمبەری (سلاڤێت خودێ لسەر بن) و محەمەد پێغەمبەر بو هەمی مروڤا یێ هاتیە هنارتن، چەوا خودێ یێ مەزنتر دبێژیت {قُلْ يَاأَيُّهَا النَّاسُ إِنِّي رَسُولُ اللَّهِ إِلَيْكُمْ جَمِيعًا} ئانكو: “بێژە، گەلی مروڤا ئەز هنارتی یێ خودێ مە بو هەوە هەمیا” (الأعراف: 159)، ئەگەر مەسیحێ ناسری بێت یا فەرە ئەو بێژیت ئەز بو هەوە هەمی مروڤا یێ هاتیمە هنارتن، و ئە گووتنە بەرووڤاژی گووتنا خودێ یە ئەڤا دبێژیت {وَرَسُولًا إِلَى بَنِي إِسْرَائِيلَ} ئانكو: “هنارتی یە بو مللەتێ ئسرائیل” (آل عمران: 50) ئەڤ گووتنە بەرووڤاژی وێ چەندێ یە كو ناما خودێ بگەهینیتە هەمی مروڤا، و هوسا بو مە دیار بوو كو ناچێبیت مەسیحێ ژڤاندار مەسیحێ ناسری بیت، تڤیا ژ مللەتێ محەمەدی بیت.
بەرسڤا شەشێ:
خودێ یێ مەزنتر دبێژیت {إِنَّا أَرْسَلْنَا إِلَيْكُمْ رَسُولًا شَاهِدًا عَلَيْكُمْ كَمَا أَرْسَلْنَا إِلَى فِرْعَوْنَ رَسُولًا} ئانكو: “مە هنارتی یەك بو هەوە هنارت، دا ببیتە دیدەڤان لسەر هەوە، چوا مە بو فرعەونی ژی هنارتی یەك هنارت بوو” (المزمل: 16). د ڤێ هەڤووكا گراڤی دا، خودێ مەزنتر، پێغەمبەرێ مە (سلاڤێت خودێ لسەر بن) وەكی مووسا پێغەمبەری لێ دكەت (سلاڤێت خودێ لسەر بن)، كا چەوا خودێ مەزنتر محەمەد (سلاڤێت خودێ لسەر بن) وەكی مووسای (سلاڤێت خودێ لسەر بن) لێكر، هەر ووسا مللەتێ محەمەدی وەكی مللەتێ مووسای لێ دكەت، و دبێژیت: {وَعَدَ اللَّهُ الَّذِينَ آمَنُوا مِنْكُمْ وَعَمِلُوا الصَّالِحَاتِ لَيَسْتَخْلِفَنَّهُمْ فِي الْأَرْضِ كَمَا اسْتَخْلَفَ الَّذِينَ مِنْ قَبْلِهِمْ} ئانكو: “خودێ سوز دا ئەوێت باوەری ئینای و كارێت چاككرین، كو لسەر ئەردی ژ وان بكەتە دویڤگر، كا چەوا ژ یێت بەری وان كربوونە دویڤگر ” (النور: 56) و دڤێ هەڤووكا گراڤی دا سوزێ ددەتە باوەردارا كو دێ هندەك ژ وانا كەتە دویڤگر كا چەوا ژ مللەتێ مووسای كربوونە دویڤگر، ئانكو دویڤگرێت مللەتێ محەمەدی دێ وەكی دویڤگرێت مللەتێ ئسرائیلی بن، و هوسا یا فەر بوو مللەتێ محەمەدی مەسیحێ خو هەبیت كا چەوا مللەتێ مووسای مەسیحێ خو هەی، داكو وەكهەڤی دناڤ هەر دوو دویندەها دا، بدرستی وەكی ئێك بیت.