Аллоҳ Таолонинг фазл-марҳамати билан Сенегалдаги Аҳмадия Мусулмон Жамоати Каолак ҳудудининг «Латмингуе» жамоатида бир гўзал масжид қурилишини ниҳоясига етказди. Ал-ҳамдулиллоҳи ало золик!
«Латминге» жамоати Сенегалдаги энг қадимги жамоатларимиздан бири бўлиб, у ерда мухолифларимиз томонидан ҳар йили Жамоатимизга қарши бир конференция ўтказилади. Рақибларимиз томонидан яратилган ноқулай шароит ва фитналарга қарамай, Жамоат аъзолари нафақат ўз эътиқодларида собитдирлар, улар молиявий қурбонликнинг ҳам фаол иштирокчиларидир.
Аллоҳ Таолонинг инояти билан Жамоат бу қишлоқда қарийб бир гектар майдонда янги масжид қуришга муваффақ бўлди, ёпиқ бўлаги 260 квадрат метр. У Латминге қишлоғининг чиқиш йўлида ва бошқа бир қанча яқин қишлоқларга борадиган йўлда баланд жойда жойлашган. Масжид баланд, оппоқ ва олтин рангдаги миноралари туфайли узоқдан гўзал манзарани тақдим этади, бу манзара ҳар бир ўткинчининг қалбини ўзига ром этади. Бу масжид меъморчилиги жиҳатидан ҳам ўзига хос бўлиб, уни тарафдорларимиз ҳам, мухолифларимиз ҳам эътироф этган. Жамоатимиз воизи ва Каулк минтақавий миссионери Кошиф Жавид жаноблари назорати остида масжид қурилиши иши 2023-йил март ойида бошланган ва Аллоҳ Таолонинг марҳамати билан 2023-йил ноябр ойининг биринчи ҳафтасида ниҳоясига етган.
Ҳазрат Имом Маҳдий алайҳиссаломнинг 5-халифаси, Ҳазрат Мирзо Масрур Аҳмад жаноблари (Аллоҳ у зотни Ўзининг азиз ғалабаси ила қўллаб-қувватласин) катта меҳрибонлик билан масжидга «Маҳмуд масжиди» номини бердилар. 2023-йил 10-ноябр, жума куни Сенегалдаги Аҳмадия Мусулмон Жамоати Амири ва миссионерлар раиси, Носир Аҳмад Сидҳу жаноблари ушбу ҳудуднинг имомлари ва минтақавий Амила аъзолари билан бирга лентани кесиб, дуо ўқиб масжидни очдилар. Кейин мукаррам Амир жаноблари жума намозига имомчилик қилдилар. Жума хутбасида масжиднинг мақсадлари ва ҳақ-ҳуқуқларини тушунтириб, масжидлар ҳар бир инсон учун тинчлик хабари ва хавфсизлик маскани эканлигини айтдилар.
Очилиш маросими пайтида яқин атрофдаги қишлоқлар аҳолисидан ташқари, бошқа ҳудудлардан ҳам Жамоат воизлари ва аъзолари қатнашди. Шу муборак тадбир муносабати билан, жума намозидан сўнг Сенегалдаги Жамоатимиз Амири жаноблари масжид ҳовлисига кўчат экиб, дуо ўқидилар, сўнг меҳмонларга таом тортилди.
Бу масжид қурилиши харажатларини Мирзо Исмоил Бег жаноблари (ҳозирда Канаданинг Торонто шаҳрида истиқомат қилувчи) ота-онаси Мирзо Яъқуб Бег жаноблари марҳум, Зубдатун-Нисо марҳум хоним ва ўзининг рафиқаси Осифа Бегам марҳума хоним номидан қоплаган. Мукаррам Мирзо Исмоил Бег жаноблари Гўжра шаҳрининг самимий Аҳмадийлар оиласига мансуб. Бутун оила Аҳмадия халифалиги билан ишқу муҳаббат даражасида яқиндир. Аллоҳ Таоло уларнинг авлодларини ҳам Аҳмадия халифалиги билан самимий муносабатларни давом эттиришни насиб этсин. Омин!
(Ҳисоботни Халқаро «Ал-Фазл» газетасининг Сенегалдаги мухбири, Ҳофиз Мусаввир Аҳмад Музаммил тайёрлаган)