ڤیانا ئیمامێ مەهدی و مەسیحێ ژڤاندار بو خودێ
خودێ پڕ مەزن و بلند، نەهێلا یە جیهان دڤی دەمی دا لدیف سەرێ خو بچیت، بێی كو رێ نیشادەرەكی بو مرووڤا بهنێریت، بەرێ وان بدەتە رێ یا خودێ و پێفێربوونێت وی، و هۆسا خودێ یێ پر مەزن و بلند، هێژایێ مە ئەحمەد (سلاڤ لسەربن) ئیمامێ مەهدی و مەسیحێ ژڤاندار، فڕێكر. دا بو هەمی مرووڤا ببیتە ماموستا و رێبەر بو حەزژێكرنا خودێ یێ پر مەزن و بلند . و هەر كەسێ بڤێت لسەر رێ یا خودێ یا درست بچیت یا گرنگە ئەو بدیف ڤی رێبەری بكەڤیت و ژ پەرداغا وی یا بژین ڤەخوت . ئەڤ مامووستایێ پێشڤان، دلێ وی یێ تژی بوو ژ حەزژێكرنا خودێ یێ پر مەزن و بلند، وی باشترین نموونە و بلندترین میناك پشتی پێغەمبەری (دلوڤانی و تەناهیا خودێ لسەر بن) دڤی بواری دا خویا كر.
ئەگەر ئەم ژیانا وی بخوینین دێ بو مە ئاشكرا بیت كا ئەڤ مرووڤە چەندێ مەزن بوو، ئەوێ خودێ زیندی كرنا ڤێ جیهانێ كریە كارێ وی كو تەناهیێ و حەویانێ بزڤرینتێ ڤە .
حەژێكرنا خودێ بو وی بهاترین تشت بوو دڤێ پەیداگەهێ دا . و د هەمبێزا خودێ پر بلند دا د ژییا و هەر دەم دبن سیبەرا وی ڤە بوو . و هەست دكر كو حەژێكرنا خودێ گەنجینەكە تڤیا مرووڤا هەبیت، چونكو ئەو شینا هەمی گەنجینێت ڤێ جیهانێ د گریت .
د نڤیسینەكا خودا كو داخوازا مرووڤا پێ دكر، د بێژیت ” ئەو مرووڤ چەندێ بەلنگازە ئەوێ نوزانیت كو وی خودایەك یێ هەی، دشێت هەمی كارا بكەت، خودایێ مە بە‌‌‌حشتا مەیە وهەمی خوشیێت مە یێت د سەمیانێ مە دا، چونكو مە ئەو دیت و مە هەمی باشی د وی دا دیتن . یا فەرە هەمی مرووڤا ئەڤ گەنجینە هەبیت خو هەكە هەمی ژیانا خو گووری وێ چەندێ بكەت،….. گەلی نەدارا… زوی وەرنە ڤێ كانیا بلقدار، دا تێنا خو پێ بشكێنن… ئەو كانیا ژیانێ یە و قورتالبوونا هەوە یا تێدا، ئەز چ بكەم و دێ چەوا ڤێ مزگینیێ كەمە ددلێت هەوە دا؟ ل بازارا، ل كیژ دەفێ بدەم وبدەنگەکێ بلند گازی بکەم، دا مرووڤ بزانن كو ئەڤەیە خودێ یێ وان؟ و بكیژ دەرمانی مرووڤا پێ دەرمان كەم دا گوهێت وان بو گوهدانێ ڤەبن؟” (الخزائن الروحانية ج19-كتێبا : سفينة نوح پ21-22)
دلێ وی (سڵاڤێت خودێ لسەر بن) یێ پڕ بوو ژ ئەڤینا خودێ، و قەنجیدار ێ خودێ بوو، ژبەر وان قەنجی و گرووڤەیێت خودێ پر مەزن هەمی دەما لسەر دباراندن.
دگووت: “ئەز نەشێم وان هەمی گرووڤا بهژمێرم ئەوێت ئەز دزانم، لێ جیهان نابینیت و نوزانیت . خودێ من ئەز تە بدرستی دنیاسم چونكو تو خودا یێ منی، ژ بەر وێ چەندێ جانێ من خو دهلاڤێت دەمێ گوه ل ناڤێ تە دبیت، كا چەوا ساڤا خو دهلاڤێت دەمێ دایكا خو دبینیت، لێ بارا پتریا مرووڤا ئەز نەنیاسیم و لبەر من نەهاتن…..” (الخزائن الروحانية ج15- كتێبا: ترياق القلوب پ511)
محەمەد پێغەمبەر (دلووڤانی و تەناهیا خودێ لسەر بن) وی سالوخەت دكەت كو ئەو جەنگا ناهێلیت، ئانكو ئەو جەنگێت ئوولی ناهێلیت و دێ تەناهیێ و حەویانێ پەیداكەت، هێژایێ مە ئەحمەد (سلاڤێت خودێ لسەر بن) هەر ژ سنێلەییا خو یێ گرێدای بوو ب ئوولێ خودێ ڤە، گەلەك دخواند و قورئان و ئاخفتنێت پێغەمبەری وپەرتووكێت ئوولی ڤەدكوولان، چ حەزژێكرن ددلێ خودا نە ددیت كو جهەكێ بلند یان دراڤی بدەست خو بێخیت، حەزژ ڤەدەریێ و مزگەفتێ دكر، دا دەمێت خو ب پەرستنا خودێ ڤە ببەت و هزرێت خو د هەڤووكێت قورئانا مەردین دا بكەت .
حەزژێكرنا وی بو ڤەدەریێ و خوڤەكیشانێ ژ مرووڤا، ئەڤ سالووخەتە یا لدەف هەمی پێغەمبەرا هەی بەری ببنە پێغەمبەر،
چونكو ئەو وی دەمی هەست ب هێزەكێ دكەن كو وان بو خو دكێشیت و وان ژ جیهانێ دویر دكەت، ئەو هێزەكە ب هەبوونا وێ هەست ب تەناهیێ و پشتراستی یێ دكەن، و ددلێ وان دا هەستێت شاد و دلخوشی یێ وەرار دكەن، كو هەمی خۆشیێت ڤێ جیهانێ لبەر وێ خوشیێ نەمینن، و هەمی حەزكرنێت دەروونی بەرامبەر وێ خوشیێ هەر پیچ پیچە كێم دبن تاكو نەمینن، كو ڤێجا ژ بلی ئەڤینا خودێ و نێزیك بوونا وی و خو گەهاندنا وی، چ تشتێ دی دلێ وان تژی نەكەت .
دەمێ (غولام ئەحمەدێ قادیانی) بوویە گەنج، دیت كەسێت مالباتا وی یێت دجهێت بلند دا، و برایێ وی یێ كارەكێ بلند د حوكمەتێ دا دكر، و بابێ وی رێز لدەف كاربدەستا دا هەبوو، دبیت ئەڤ هەمی تشتە وەل برایێ بچیك بكەن كو هەڤركیا وان بكەت، یان هەكە چوننە چاڤلێكرنێ بكەت .هوسا چێ بوو كو بابێ وی هەڤالەكێ خو هنارتە دەف وی، كو بێژتێ بابێ تە دبێژیت: “من رێزەكا تایبەت یا لدەف خوونكاری، خودانێ زالداریێ، یا هەی، و ئەز دشێم بو تە كارەكێ باش پەیدا كەم.”
لێ ئەو گەنجێ دلێ وی تژی ئەڤینا خودێ و ئەوێ خو تەرخان كری بو پەڕستنا وی، چ جه د دلێ وی دا نەماینە بو ئەڤینا ڤێ جیهانێ و خۆشیێت وێ، بەرسڤا هەلگرێ نامێ دا و گووت “ئەز گەلەكێ سوپاسدارم بو هەستێ بابێ خو و دلپێڤەبوونا وی بو من، لێ بێژنە بابێ من، ئەز یێ لدەف وی كار دكەم ئەوێ ئەز حەزدكەم بو كاربكەم، ڤێجا سەرێ من تەناكەن ژ كارێت ڤێ جیهانێ ” دسەر وێ چەندێ را بابێ وی شیا بوو وی بدەتە كاری كو دیڤچوونا هندەك كێیسێت بابێ خو بكەت، و دا كو گوهداریا خودێ بكەت ب گووتنێت بابێ خو دكر، لێ دلێ وی هەر ب ئەڤینا خودێ پربلند ڤە یێ گرێدای بوو، ئەو ئەڤینا هەمی ئەتوومێت ووژدانا وی تژی كرین.
جارەكێ كورێ هێژایێ مە، (ئیمامێ مەهدی و مەسیحێ ژڤاندار) یێ بچیكترێ “موبارەك ئەحمەد” ژییێ وی هەشت ساڵ بوون نساخ بوو، و ژخودێ یێ پر مەزن زانی كو مرنا كورێ وی یا نێزیك بووی، و دسەر وێ چەندێ را هندی ژێهاتی و ب شەڤ و روژ چاڤدێر یا وی دكر، لێ ئەڤێ چەندێ گاڤەكێ ژی ئەو ژ بیرئینانا خودێ دویر نەئێخست، و پشتی كورێ چوویە بەر دلووڤانیا خودێ، وی ب ماڵكەكا هەلبەستێ پێگووت، ئەڤە رامانا وێ یە ب كوردی: “دەمێ خودێ گازی كریێ ژییێ وی، هەشت ساڵ و چەند مەهەك بوون، ئەوێ گازی كریێ، بو من ژ هەمی گەردوونی خوشتڤی ترە، ڤێجا دلێ من خو گووری وی بكە”
جارەكا دی دەمێ د گەل بابێ خو كار دكر، دیڤچوونا چەند كێسێت بابێ خو ل دادگەهێ دكر، روژەكێ ژ روژا ل دادگەهێ ژ كێسەكێ ب دیماهیك هات، و گەلەكێ دلشاد و دلخوش بوو، هەڤالەكێ بابێ وی ئەو دیت، و وی دزانی كو ئەڤ كێسە گەلەكا گرنگە ل دەف بابێ وی، گووتێ: “ئەز یێ تە دبینم تو گەلەكێ بكەیفی، هوسا دیارە تە ئەڤ كێسە بدەست خو ڤە ئینا ” بەرسڤا وی دا و گووت: ” نە ….. مە ژ دەست دا”. ئەو زەلام ما حێبەتی پسیارا وی كر و گووت: “پا تو بووچ هۆسا یێ بكەیفی!” میرزا غولام ئەحمەدی بەرسڤا وی دا و گووت: “ڤێجا دێ من دەم هەبیت پتر دا خودایێ بپەرێسم” (“الحياة الطيبة” للسيد عبد القادر سوداغر مل پ15)
هوسا هەست دكر كو ل ڤێ جیهانێ نەمایە، یێ ژێ باركری، و بتنێ دلێ وی یێ مایە ل ڤێرێ و یێ خو ب ئەڤینا خودێ دقوتیت، و ئەزمانەك یێ مای هەر ب ناڤێ خودێ ڤەدجیت، و هشەك یا مای ب سوپاسیا خودێ یێ دبوهوژیت، و دەروونەك ب ڕۆناهیا خودێ ڕۆن دبیت، جانەك یێ مای دا ب گوهدانا خودێ د فڕیت، و وژدانەك یا مای ب نێزیك بوونا خودێ شاد دبیت، هەر پیتەك ژ ڤان پەیڤێت راست، دیدەڤانن كو ژ دلەك پر باوەری یێت دەركەتین، و ژ سنگەكێ پڕ حەژێكرنا خودێ یێت هلداین، و ژ هش و هزرەكا گەش ب روناهیا خودێ ئافراندكەرێ گەردوونا یێت زاین، دەمێ توورەڤان و زمانزانو نڤیسەر ل سەر مژارەكێ دنڤیسن، دێ چێكرنەكێ و ژێگرتنەكا پەیڤا تیدا بینیت، لێ رێنڤیسا هێژایێ مە ئەحمەد (سلاڤێت خودێ لسەر بن) (رێنڤیسا وی یا نازك بوو، وەكی وێ ئاڤێ بوو ئەوا ژ بەر كانیەكا بلقدار دچیت، ب ئەڤینێ و شەیدا بوونێ بو خوشتڤیێ ژ هەمیا مەزنتر خودقوتیت، ودەمێ ئەڤ ئەڤینە ب هەلبەست ڤەهاندی، مالكێت وێ دلێ مرووڤا د سمیت و دگەهتە كویراتیا وان، و دگەهتە هەمی كونجێت دەروونی، و تێدا هەستێت ئەڤینا خودێ یێ پر بلند و مەزن دلڤینیت، و ئەڤە قەفتەكا مالكێت جوانە ژ هوزانەكا وی، ب رامانا كوردی
(سلاڤ لسەر بن) دبێژیت:
زانینا من ژ دلووڤانێ خودانێ گروڤانە
ب خودێ ئەڤ جوداهیە من وەرگرت نە ب زیرەكیا خو
دێ چەوا شێم درست سوپاسیا تەكەم
ئەم پەسنا خودێ دكەین لێ ئەو هێشتا مەزن ترە
خوزیكێت مە، مە هوگرەك بو خو دیت
سەمیانەكێ دلووڤان، تەنگاڤییا ناهێلیت
دەروونا من خو ژ هەمی تاریاتیا دویركر
و خولبن روناهیا خودێ پاراست بوو
ئەڤینا دێمێ خودێ شیا بوو دەروونا من
تاكو من دەروونا خو هاڤێتی
دەمێ من زانی دەروونا من دێ روناهیێ نخێڤیت
وەكی مریەكی من هاڤێتە بیابانێ
خودێ وەكی شكەفتكێ یە خو لێ بپاریزیت
و وەكی كەسكاتی یە
سەمیانێ من یێ دلووڤانە
و هەوارگەهێ هەمی تشتانە
ئەڤە ئەو ئەڤینە ئەوا من هەلبژارتی
سەمیانێ ژیانێ و نیشادانێ، خودێ من