Ҳузур: “Аҳмадий мусулмонлар Ҳазрат Иброҳим алайҳиссалом ва у зотнинг аҳли оиласидан ибрат олиши лозим, уларнинг қурбонликлари қурбон ҳайити куни нишонланади”, дедилар.
Аҳмадия Мусулмон Жамоатининг Бутун жаҳон Раҳнамоси, 5-Халифа Ҳазрат Мирзо Масрур Аҳмад жаноблари 2020-йилнинг 31-июлида Тилфордга қарашли Исломободнинг “Муборак” масжидида Қурбон ҳайити хутбасини ўқидилар.
“Ижтимоий масофа сақлаш” қоидаларига мувофиқ “Масжиди Муборак”да фақат бир неча Аҳмадий мусулмонлар ҳайит намозини ўқий олишди, бироқ дунё бўйлаб миллионларча Аҳмадий мусулмонлар Халқаро МТА International телеканали орқали бевосита ўз Халифаларининг Қурбон ҳайити хутбасини тинглаб, у зот олиб борган дуоларига қўшила олишди.
Мазкур хутба мобайнида Ҳузур Ҳазрат Иброҳим алайҳиссалом ва у зотнинг ўғли Исмоил алайҳиссалом қурбонликларини ёдга олдилар, унда Ҳазрат Иброҳим алайҳиссалом ўз ўғли Исмоилни Аллоҳ таоло учун қурбонликка сўйишга тайёр бўлган ва у зотнинг ўғли ҳам бунга рози бўлган.
Ҳузур бу воқеа Қуръони Каримда зикр этилганини ва қурбонликнинг энг олий намунаси сифатида абадий сақланишини таъкидладилар.
Ҳазрат Мирзо Масрур Аҳмад жаноблари у зотларнинг ибратлари тўғрисида тўхталиб, шундай дедилар:
“Бу Қурбон ҳайити айёмини нишонлаб, унинг келишини оддийгина айём ва хурсандчилик куни деб кутган инсонлар талай. Улар бошқаларни жўшқинлантириш учун ва хурсандчилик белгиси сифатидагина жониворларни сўйишади. Энди ҳақиқий мўмин-мусулмон инсон эса пайғамбарлар Иброҳим ва Исмоил алайҳимуссалом қурбонликлари ва унинг руҳини хотирлаб, ундан ибрат олади”.
Ҳазрат Мирзо Масрур Аҳмад жаноблари шундай деб қўшимча қилдилар:
“Албатта, биз у зотларнинг қурбонликлари ҳақида эшитганимизда ёки ўқиганимизда, ҳиссиётга берилиб, кўзларимиз ёшларга тўлади. Бироқ, шунинг ўзи кифоя эмас, балки “мен Аллоҳ таоло учун барча қурбонликларни қилишга тайёрман” деган ваъдамизни амалга ошираётганимизга амин бўлишимиз лозим”.
Ҳузур шундай дедилар: “Охири Аллоҳ таоло пайғамбар Иброҳим алайҳиссаломни ўз ўғлини қурбонликка сўйишдан ман этди ва унинг ўрнига Қуръони Карим 37-сурасининг 106-оятида қуйидагича хушхабар берилди:
“Албатта, сен тушингни амалга ошириб бўлдинг. Албатта, Биз эзгу ишлар қилгувчиларни мана шундай мукофотлаймиз”.
Ҳузур шундай дедилар: “Ҳазрат Иброҳим алайҳиссалом аҳли оиласининг қурбонлиги шу билан тугаб қолмайди, балки ҳақиқий эътиқод ва қурбонликнинг янги даври бошланиб, Ҳазрат Исмоил алайҳиссалом онаси Ҳазрат Ҳожиранинг Аллоҳ таолога бўлган ҳақиқий эътиқоди ва таваккулини кўрсатади”.
Ҳузур шундай дедилар: “Ҳазрат Иброҳим алайҳиссалом Аллоҳ таолонинг буйруғига мувофиқ завжаси билан ўғлини Макка чўлига бироз хурмо ва сув билан қолдириб келди.
Ҳазрат Ҳожира ушбу синовга дуч келганда, эридан: “Бизни Аллоҳ таолонинг буйруғи билан ташлаб кетаяпсизми?” – дея сўраганда, Ҳазрат Иброҳим алайҳиссалом тасдиқлагандек жавоб берган”.
Ҳазрат Мирзо Масрур Аҳмад жаноблари у зотнинг тақвоси ва чин муносабатини шундай баён қилдилар:
“Ҳазрат Ҳожира Аллоҳ таолога бутунлай ишониб ва Унга таваккал қилиб: “Агар Аллоҳ таолонинг буйруғи билан бизни ташлаб кетаётган бўлсангиз, унда У бизнинг ҳалок бўлишимизга йўл қўймайди, сиз хоҳлаган томонга кетаверишингиз мумкин”, – деб жавоб берган”.
Аллоҳ таоло уларнинг қурбонликлари учун берган беқиёс ажр-мукофот ҳақида Ҳазрат Мирзо Масрур Аҳмад жаноблари сўз юритиб, шундай дедилар:
“Тарих Аллоҳ таоло Ҳазрат Ҳожира иймонини қандай мукофотлаганини, шу билан бирга, унинг ўғлини қаровсиз қолдирмаганига гувоҳлик беради. Бу билан чекланмай, улар учун ажойиб бир миллат пайдо қилиниб, улар шундай қутлуғ ҳурмат-эҳтиромга сазовор бўлишганки, энг буюк Пайғамбар, пайғамбарларнинг муҳри – Муҳаммад Мустафо саллаллоҳу алайҳи ва саллам улар орасидан чиқиб, бутун инсоният учун Пайғамбар бўлганлар”.
Ҳазрат Мирзо Масрур Аҳмад жаноблари Иброҳим алайҳиссалом ва у зот аҳли оиласининг беқиёс қурбонликлари ҳақида фикр юритиб, шундай дедилар:
“Инсон боласи Иброҳим намунасидан ўрнак олиб, Аллоҳ таолога бўлган ихлос даражасини кўтаргандагина Аллоҳ таолонинг файз-баракаларига эга бўлади. Аёллар Ҳазрат Ҳожира кўрсатган намунадан ўрнак олишга ҳаракат қилишгандагина Аллоҳ таолонинг файз-баракаларига эга бўлишади. Ҳақиқатда, бир ёш инсон Ҳазрат Исмоил алайҳиссалом намунасидан ибрат олишга ҳаракат қилса, Аллоҳнинг меҳрибонликларига ворис бўлади. Ҳақиқий ҳайит ана ўша кунигина бўлади”.
Ҳузур Ҳайит хутбаси ниҳоясида қийинчилик ва мушкулотларга дуч келган барча Аҳмадий мусулмонлар учун дуо қилишга чорладилар.
Ҳузур Аҳмадий мусулмонларни Африканинг баъзи ерларида, Покистонда ва бошқа жойларда диний тазйиқларга учраганлар учун чин қалбдан дуо қилишга чақирдилар.
Ҳузур Қурбон ҳайити айёмида жониворларни қурбонликка сўйиш асосий диний маросимини экстремистлар Покистонда яшаган Аҳмадий мусулмонларга ман этиш керак деган талабни қўяётганларини зикр этдилар.
Ҳазрат Мирзо Масрур Аҳмад жаноблари шундай дедилар:
“Ҳар йили шундай бўлиб турса-да, бу сафар Покистонда бизга тазйиқ қилаётганлар ҳукуматга Қурбон ҳайити мобайнида ҳайвонларни қурбонликка сўйиш каби исломий фарзларни амалга оширишни кўзлаган Аҳмадий мусулмонларга қарши жиноят иши очишга ўзгача ҳаракат қилмоқдалар. Биз ушбу Ислом фарзини амалга оширишни мўлжаллаётганимиз учун улар Аҳмадий мусулмонларнинг ҳаммасини жазолаш керак, деган талаб қўйишмоқда. Аллоҳ таоло Аҳмадий мусулмонларни ана шундай фитначиларнинг ёмонлигидан асрасин!”
Ҳузур хутбани овозсиз дуолари билан якунладилар.
Жорий йил Қурбон ҳайити жума кунига тўғри келиб қолганлиги муносабати билан, кейинроқ Ҳузур ҳафталик жума хутбасини “Масжиди Муборак”да ўқиб, унда Покистонда одамлардан Севимли Пайғамбаримиз Муҳаммад саллаллоҳу алайҳи ва саллам исмларини “Хотаман-Набиййин” (Пайғамбарларнинг муҳри) билан ёзишни талаб қилган янги қонун ҳақида фикр юритдилар.
Ҳазрат Мирзо Масрур Аҳмад жаноблари шундай дедилар:
“Бу одамлар инсонлардан Севимли Пайғамбаримиз Муҳаммад саллаллоҳу алайҳи ва саллам исмлари ёнига “Хотаман-Набиййин” деб ёзишни талаб қилиб, катта ғалабага эришдик, дея ўйлашади ва бу билан Аҳмадий мусулмонлар йўлида турли-туман тўсқинликларни яратдик, деб ўйлашади. Улар ҳақиқатни билмайдилар, чунки биз – Аҳмадий мусулмонлар “Хотаман-Набиййин” саллаллоҳу алайҳи ва салламнинг беқиёс мақом-мартабаларини амалда тушунамиз ва ушбу тушунчага эса фақат Масийҳи Мавъуд ва Имом Маҳдий (алайҳиссалом) таълимотлари орқалигина эришганимизни улар билмайдилар”.
Якуни
Қўшимча маълумот учун: press@ahmadiyya.org.uk
Манзил: 22 Deer Park Road, London, SW19 3TL UK
Tel/Fax: 020 8544 7613 Mob: 077954 90682
Email: press@ahmadiyya.org.uk
Press Secretary AMJ International
(Халқаро Аҳмадия Мусулмон Жамоати редакцияси котиби)