Ҳазрат Мирзо Масрур Аҳмад жаноблари Швециядаги Аҳмадия Мусулмон Жамоатининг Миллий Мажлиси Омиласи билан мулоқот давомида “жирканчли хатти-ҳаракат”ни қоралаб, тинч йўл билан жавоб қайтаришга чорладилар
2020 йилнинг 29 августида Швециядаги Аҳмадия Мусулмон Жамоатининг Миллий Мажлиси Омила аъзолари Аҳмадия Мусулмон Жамоатининг Бутунжаҳон Раҳнамоси, 5 Халифа – Ҳазрат Мирзо Масрур Аҳмад жаноблари билан виртуал мулоқот ва кўришиш имконига эга бўлдилар.
Ҳузур Тилфорддаги Исломободда жойлашган идораларидан йиғилишни олиб бордилар, Швеция Миллий Омила аъзолари эса Мальмёдаги “Маҳмуд” масжиди мажмуасидан йиғилишга иштирок этдилар.
Бир соат давом этган йиғилишда Омила аъзолари ўз бўлимлари тўғрисида ҳисобот бериб, бир қатор масалалар бўйича Ҳузурдан йўналиш ва кўрсатмалар олиш имкониятига эга бўлдилар.
Ҳузур таблиғ (тарғибот) ишлари бўйича миллий котиб билан суҳбат қуриб, бир кун олдин Мальмёда Муқаддас Қуръон нусхасини ёқиб юборган ўта ўнгчи экстремистларни қаттиқ қораладилар.
Ҳузур мусулмонларнинг бундай нафрат уйғотган фитначилик ҳаракатларига зўравонлик ёки ғалаён орқали жавоб қайтариш тўғри эмаслигини ҳам очиқ зикр этдилар. Аксинча, мусулмонларга қарши экстремистлар ўзларининг жирканч мақсадлари ва хатти-ҳаракатларини амалга ошириш учун Қуръоннинг баъзи оятларини контекстдан бутунлай чиқариб, Исломни бадном қилишга уринмаслиги учун одамларга Қуръоннинг ҳақиқий таълимотларини ўргатиш бурчини ўз зиммаларига олишлари зарур.
Ҳазрат Мирзо Масрур Аҳмад жаноблари шундай дедилар:
“Ҳақиқатда, Швеция ва бошқа Ғарб мамлакатларида одамларнинг аксарияти Исломнинг ҳақиқий таълимларини билишмайди ва бу экстремистларга ўзининг ёлғон ақидалари учун Қуръоннинг баъзи оятларини контекстдан бутунлай чиқариб юборишга имконият яратади. Ана шундай нафрат уйғотадиган хатти-ҳаракатларни амалга оширган одамларда Ислом дини борасида ва Муқаддас Қуръонда жиҳод учун қандай шартлар қўйилгани борасида ҳеч қандай маълумот йўқ. Улар “Библия”даги кўпгина оятларни контекстдан чиқариб, куч қўлланишни дастаклаш учун фойдаланиш мумкинлигини эсдан чиқаришади. Нима бўлишидан қатъий назар, одамлар динимиз Исломнинг ҳаққонийлигини тушунишлари учун ҳар бир шаҳар ва қишлоқда унинг ҳақиқий ва тинчликсевар таълимотларини ёйиш ва намуна кўрсатиш Аҳмадий мусулмонларнинг вазифаси бўлиб ҳисобланади”.
Миллий Омила аъзоларига Ҳузур мурожаат қилиб, уларнинг ҳар бирини ўз бурчларига адолатли муносабатда бўлишга ва Қуръоннинг ўз ваъда ва аҳдларини амалга ошириш энг муҳим деган амрини доимо ёдда тутишга чақирди.
Ҳузур шундай дедилар: Мажлиси Омила аъзолари, хоҳ улар миллий, минтақавий ёки маҳаллий даражада Аҳмадия Мусулмон Жамоатининг маъмурмятида ишласалар-да, Аҳмадий мусулмонларга ҳар жиҳатдан ижобий намуна кўрсатишлари ва ўзлари ваъз қилаётган ишларни бажаришлари зарур.
Масалан, бошқаларни хизматга жалб этиш учун Мажлиси Омила аъзолари ўз ихтиёри билан Аҳмадия Мусулмон Жамоатига (Вақфи Арзи) чекланган муддат учун кўнгилли сифатида пешқадам бўлишлари лозим, бу вақт ичида улар даъват орқали Ислом динини ёйишга ёки бошқа аъзоларга Муқаддас Қуръонни ўргатишга ҳаракат қилишлари мумкин.
Шунингдек, Ҳузур Исломий таълимотни ёйиш бўйича саъй-ҳаракатлар оммавий тадбирларни қайта бошлаш хавфсиз бўлгунга қадар онлайн тадбирлар орқали давом эттирилиши зарурлигини таъкидлаб ўтдилар.
Ҳазрат Мирзо Масрур Аҳмад жаноблари шундай дедилар:
“COVID-19 пандемияси мобайнида Аҳмадия Мусулмон Жамоати онлайн даъват орқали Исломни тарғиб этиш фаолиятини кўпайтирди. Албатта, онлайн тадбирларни ҳам уюштириш лозим, шунда бошқаларнинг Исломга ёки бизнинг таълимотларимизга боғлиқ саволларига жавоб берилади”.
Ҳазрат Мирзо Масрур Аҳмад жаноблари шундай дедилар:
“Бундан ташқари, ушбу пандемия инсониятнинг эътиборини Қодир Худога қаратиши кераклигига қатъий ишонамиз деб огоҳлантиришимиз керак. Барча аломатлар пандемия якунлангандан сўнг ҳам, дунёда иқтисодий инқироз рўй бериб, натижада рақобатчилик авж олиб, халқлар ўртасида беқарорлик кучайишига ишора қилмоқда. Бундай зиддиятлар адолатсизликка осонгина йўл очиб, Худо сақласин, охир-оқибат алангаланиб, уруш ва низоларга олиб келиши мумкин”.
Учрашув якунида Ҳузур Мажлиси Омила аъзоларига ўз бурчларини содиқлик ҳамда қалбда мустаҳкам ўрин олган Аллоҳ таоло қўрқуви билан амалга оширишни эслатдилар.
Ҳазрат Мирзо Масрур Аҳмад жаноблари шундай дедилар:
“Маҳаллий миқёсдан миллий миқёсга қадар Аҳмадия Мусулмон Жамоатининг барча хизматчи ходимлари ўз бурчларини амалга оширишга ва Халифатул Масийҳ кўрсатмасига асосан иш олиб боришга ҳаракат қилиши керак. Агар ҳақиқий ихлос, тиришқоқлик ҳамда итоаткорлик билан хизмат қилсангиз, шубҳасиз, бу албатта муваффақият ва тараққиётга олиб келади. Бироқ, агар сизлар биргина обрўга эришиш учун масъул бўлишни истаб, итоаткорлик билан ишлашни ёки бошқалар билан ҳамкорлик қилишни хоҳламасангиз, унда сизлар фақат зарар етказасизлар. Сизлар одамларни алдай оласизлар, аммо Аллоҳ таолони ҳеч қачон алдай олмайсизлар, шунинг учун У Зот бизнинг барча хатти-ҳаракатларимизни кўриб туришини унутманглар. Демак, У Зот учун барча салоҳият ва имкониятларингизни ишга солинглар. Мен Аллоҳ таоло сизларга ҳимоя қилувчи ва йўл кўрсатувчи бўлишини тилайман. Омин!”
Якуни
Қўшимча маълумот учун: press@ahmadiyya.org.uk
Манзил: 22 Deer Park Road, London, SW19 3TL UK
Tel/Fax: 020 8544 7613 Mob: 077954 90682
Email: press@ahmadiyya.org.uk
Press Secretary AMJ International
(Халқаро Аҳмадия Мусулмон Жамоати редакцияси котиби)