Германиядаги йиллик йиғилишда меҳмонларга қилинган мурожаат
Биз, жаҳон урушининг бошланиши тобора кучайиб бораётган «тарихнинг муҳим бир лаҳзаси»да турибмиз. Жанубий Хитой денгизидан Шимолий Корея ва Эронгача портлаш нуқталари кенг кўламли урушга олиб келиши билан таҳдид солган. Оммавий иммиграция Ғарб жамиятларида тартибсизликларни келтириб чиқарди. Иқтисодий савдо урушлари бўлган давлатлар ўртасида янги блоклар пайдо бўлди. Ядро қуроллари кўплаб давлатларга тегишли бўлиб, глобал уруш ақл бовар қилмас оқибатларга олиб келади. Бу нуқтаи назардан Аҳмадия Мусулмон Жамоатининг Бутунжаҳон раҳбари Ҳазрат Мирзо Масрур Аҳмад (Аллоҳ у зотни қўллаб-қувватласин) ҳозирги глобал вазиятда қандай қилиб тинчликка эришиш мумкинлиги ҳақида ўта муҳим рисолани етказдилар. Мазкур мурожаат Германиядаги Аҳмадия Мусулмон Жамоатининг 2019-йил 6-июлда бўлиб ўтган йиллик йиғилиши (Жалса Солона) пайтида, 1000дан ортиқ Аҳмадий бўлмаган тингловчилар олдида қилинган. Биз Ҳузур томонидан сўзланган нутқнинг матнини тақдим этмоқдамиз. Биз ўз ўқувчиларимизни узоқ давом этадиган тинчлик режаси ва жаҳон инқирозининг батафсил геосиёсий таҳлилини тақдим этувчи ушбу нутқни ўқишга чақирамиз.
Аҳмадия Мусулмон Жамоатининг Бутунжаҳон Раҳнамоси, Бешинчи Халифа Ҳазрат Мирзо Масрур Аҳмад (Аллоҳ у зотни қўллаб-қувватласин) ташаҳҳуд, тааввуз ва «бисмиллоҳ»ни ўқиганларидан сўнг шундай дедилар:
«Ҳурматли меҳмонлар, ассалому алайкум ва раҳматуллоҳи ва баракотуҳу, барчангизга Аллоҳнинг раҳмати ва баракоти бўлсин!
Аввало, мен фурсатдан фойдаланиб, ҳар йили ўтказиладиган йиғилишимизга, яъни «Жалса Солона»га ташриф буюрган барча меҳмонларимизга миннатдорчилик билдирмоқчиман. Жалса Солона – бу фақат диний йиғилиш бўлиб, унда Аҳмадий Мусулмонлар маънавият ва ахлоқни ошириш ҳамда диний билимларини ошириш учун йиғилишади. Германияда ўтказиладиган йиғилиш давомида, мусулмон ҳамда ғайримусулмон меҳмонларимиз фойдаси учун махсус сессия ўтказиш биз учун анъана бўлиб қолган ва айнан шу мақсадда биз бу ерда йиғилдик. Сизлардан баъзиларингиз ўтмишда бизнинг тадбирларимизга келган бўлиб, Аҳмадия Мусулмон Жамоатининг эътиқодларидан хабардор бўлгансизлар. Бироқ, бизнинг жамоатимиз, эътиқодимиз ва урф-одатларимиз ҳақида билиш учун бизга биринчи марта қўшилган бошқа меҳмонлар ҳам бор. Ҳозирча бундай меҳмонлар Аҳмадия Мусулмон Жамоати Ислом асосчиси, Пайғамбаримиз Муҳаммад саллаллоҳу алайҳи ва салламнинг башоратларига биноан, охирги замонда инсониятни маънавий ислоҳ қилиш учун ташкил этилган, Исломдаги бир фирқа эканлигини билишлари мумкин.
Бу бир табиий ҳодисадирки, вақт ўтиши билан нафақат дунёвий ташкилотлар тарафдорлари, балки диний жамоалардаги маълум бир оқим ёки эътиқод тарафдорлари ҳам асл таълимотлари ва эътиқодларидан узоқлаша бошлайдилар. Натижада, барча гуруҳлар ёки жамоалар ҳаётида улар қайта жонлантирилишга муҳтож бўлган пайт келади. Акс ҳолда, улар охир-оқибат ўлиб кетишади ёки тадрижан асл манбасига ўхшамайдиган нарсага айланиб қолишади.
Диний жамоалар ҳақида гап кетганда, биз ишонамизки, асл таълимотларни сақлаб қолиш учун Аллоҳ таолонинг суннати шуки, У Ўзининг танлаган вакилларини одамларни ислоҳ қилиш ҳамда асл эътиқодлари ва амалларига қайтариш учун юборади. Ислом нуқтаи назаридан, биз Пайғамбаримиз Муҳаммад саллаллоҳу алайҳи ва саллам Аллоҳ таоло юборган шариъат олиб келган охирги Пайғамбар эканлликларига ишонамиз. 19-асрнинг охирида, у зот саллаллоҳу алайҳи ва саллам ўзлари ўргатган ҳамда амал қилган Исломни қайта жонлантириш ва тиклаш учун Аллоҳ таоло Аҳмадия Мусулмон Жамоатининг асосчисини ислоҳотчи қилиб юборди. Шунингдек, биз ишонамизки, бизнинг жамоатимиз асосчиси ваъда қилинган Масийҳ ва Маҳдийдирлар. Яна у зот алайҳиссаломнинг асосий мақсади Исломнинг ҳақиқий таълимотларини қайта тиклаш ва инсониятни Аллоҳ таолога қайтариш эди. Жамоатимизнинг қисқача таништирувидан сўнг, мен давом этишни ва дунёнинг ҳозирги ҳолати ҳақида гапиришни хоҳлайман.
Инсон табиатан эркинлик, автономия ва фаровонликда яшашни хоҳлайди. Ҳар қандай можаролардан холи, тинч ва шоду-хуррам ҳаётга интилиш табиий ҳол. Ҳамма тинч ва хавфсиз жойда яшашни хоҳлайди. Ҳар бир инсон ўз қишлоғи, шаҳарчаси ёки шаҳрининг уйғун ва хавфсиз бўлишини истайди. Ҳамма ўз миллатининг тинч бўлишини, гуллаб-яшнашини ва ҳаётни фаровон қиладиган барча нарсалар билан жиҳозланишини хоҳлайди. Нима бўлса ҳам, одамлар бутун дунё тинч бўлишини хоҳлашади. Бироқ, тинчлик учун бўлган табиий истакка қарамай, ҳақиқат шуки, бўлиниш, тартибсизлик ва низолар дунёнинг ҳар бир бурчагини қамраб олган. Масалан, фуқаролар уруши натижасида парчаланиб кетган давлатлар бор. Исёнчи гуруҳлар бир-бири билан жанг қилишмоқда ёки давлатни нишонга олмоқдалар. Баъзи мамлакатларда, турли вилоят ёки минтақалар аҳолиси ўртасида қаттиқ рақобат ва душманлик уларнинг жамиятлари тинчлигига рахна солмоқда. Бундан ташқари, иммиграция кенг тарқалган мамлакатларда маҳаллий фуқаролар ва муҳожирлар ўртасида кескинлик ва ғазаб юзага келди.
Касал жамиятлар тобора қутблашиб бормоқда ва тезлик билан бўлиниб парчаланиш нуқтасига етиб бормоқда, кескинликлар қайнаб кетиш билан таҳдид қилмоқда. Халқаро миқёсда турли давлатлар куч ва назоратни қўлга киритиш учун бир-бири билан рақобатлашмоқда. Иқтисодий ёки геосиёсий ҳокимиятга эришиш учун ёхуд турли қадриятлар ва эътиқодга эга бўлган одамларни ўз иродасига бўйсунишга мажбурлаш учун адолатсиз урушлар содир бўлмоқда. Масалан, ҳукмронлик қилиш ва рақиб давлатларнинг ўсишига тўсқинлик қилиш учун иқтисодий ҳамда савдо урушлари бошланган.
Шунингдек, дунёни анъанавий урушларнинг қонга тўла доғи босиб турибди, бунда ҳалокатли оммавий қирғин қуроллари халқларни нобуд ва келгуси авлодларнинг келажагини вайронага айлантириш учун ишлатилмоқда. Бойлик ва ҳокимиятни қўлга киритиш учун бўлган худбинлигимизда биз муттасил адолатсизлик ва якун топмайдиган ваҳшиёна зулмлар тизими орқали бугунги ёшларнинг истиқболини шафқатсизларча йўқ қилмоқдамиз. Ачинарлиси, аммо эътиборга лойиқ аниқ қўрқув шуки, биз бугун кўраётган нарсалар, ҳар қандай вақтда, ҳақиқий глобал фалокатга айланиб кетиши мумкин, унинг даҳшатли оқибатларини биз тасаввур ҳам қила олмаймиз.
Мухтасар қилиб айтганда, дунёнинг хавфсиз, ихтилоф ва низолардан холи қисмларини аниқлаш қийин. Кўпинча, баъзи йирик давлатлар куч-қудрати ва бойлигидан фойдаланиб, заиф давлатларни ўз хоҳиш-иродасини бажаришга мажбурлайди. Ҳатто баъзи кичик кучлар ҳам кучли иттифоқчиларнинг қўллаб-қувватлаши билан қўшни давлатларга нисбатан ноҳақ воситалардан фойдаланиб, минтақавий ҳукмронлигини ўрнатади. Бундан ташқари, террорчи гуруҳлар ўз манфаатларини амалга ошириш учун зўравонлик ва қон тўкишни давом эттирмоқдалар. Яна баъзи номигагина «диний» ташкилотлар алдов йўли билан дин номини қўллаб, экстремизмни оқлайдилар, чунки уларнинг асосий мақсади бойлик ва кучга эга бўлишидан иборатдир.
Борган сари ўта ўнгчилар Европа ва дунёнинг бошқа қисмлари тинчлиги ҳамда фаровонлигига теран ва даҳшатли хавф туғдирмоқдалар. Миллатчилик номи билан ўта ўнг қанот аъзолари замонавий кўп маданиятли ва плюралистик жамиятларга барҳам беришни қўллаб-қувватлайдилар ва бунинг ўрнига ўзларининг ирқчи ҳамда беҳуда қарашларини жамиятга юклашга ҳаракат қилишади. Ўз миллатининг ўзига хослиги ва софлиги деб ҳисоблаган нарсаларини ҳимоя қилиш учун тоқат қилолмайдиган мутаассиблар муҳожирларни шафқатсизларча нишонга олмоқдалар, ҳолбуки, муҳожирларнинг кўпчилиги ўзларини асраб олган мамлакатларда ўнлаб йиллар давомида тинч-тотув яшаб, намунали фуқаролар сифатида унинг муваффақиятига ҳисса қўшган. Бундан ташқари, ахлоқ ва адолатнинг асосий тамойилларини инобатга олмаган ҳолда, айрим давлатлар ёки гуруҳлар бошқалар манфаати эвазига ўзларини бойитиш учун дунёнинг молиявий бозори ва бизнес манфаатларини назорат остига олишга ҳаракат қилишади.
Қисқаси, мен айтганимдек, можаро бутун дунёда кенг тарқалган бўлиб, жамиятнинг ҳар бир даражасида кўзга ташланади. Шундай қилиб, тинчлик ҳукм суришига бўлган табиий хоҳишимизга қарамай, биз унинг аксини кўрмоқдамиз. Мен бир неча йиллардан буён дунёнинг аҳволи ёмонлашаётганидан хавотирларимни билдирганман, ҳозир эса бошқа одамлар ҳам тинчлик ҳамда хавфсизликнинг йўқлиги ҳақидаги қўрқувларини билдириш учун ўз овозларини баралла кўтаришмоқда. Шунингдек, мен ҳозир ўз ташвишларини очиқ-ойдин билдираётган, дунё тинчлиги ҳамда хавфсизлигини сақлаш учун ўзини вазмин тутишга ва шошилинч ислоҳотларга чақираётган баъзи геосиёсий экспертлар, сиёсатчилар ва таҳлилчиларнинг сўнгги баёнотларини эслатиб ўтаман.
Масалан, “The New York Times” учун яқинда чоп этилган мақолада Франциянинг Бирлашган Миллатлар Ташкилотидаги элчиси Франсуа Делатр шундай ёзади:
«Бирлашган Миллатлар Ташкилотининг Хавфсизлик Кенгашидаги сўнгги беш йиллик тажрибам мени аччиқ ҳақиқатни кўришга мажбур қилди; дунё кундан-кунга хавфлироқ бўлиб, олдиндан айтиб бўлмайдиган даражада ўсиб бормоқда. Технологик инқилоб ва Хитойнинг юксалиши таъсири натижасида кучнинг тектоник плиталари оёқларимиз остида силжимоқда. Яна биз йирик давлатлар ўртасида кескин рақобатнинг кучайганига гувоҳ бўламиз. Биз ҳозир дунёнинг янги тартибсизлигига дуч келганмиз».
Катта кучлар вазиятни барқарор сақлаш ёки янги ва такомиллашган дунё тартибини ўрнатиш учун хайрихоҳлик қилаётганини иддао қилишади, лекин бу ерда халқаро муносабатлар ва сиёсатнинг ички таъсирини кўрган, Ғарбнинг юқори мартабали дипломати, очиқчасига: «Аксинча, улар қилаётган ишларининг ҳаммаси дунёни «дунёнинг янги тартибсизлиги» сари етакламоқда», – деб тан олмоқда.
Франция элчиси яна шундай деди:
«Ҳар бир жиддий халқаро инқироз назоратдан чиқиб кетиш кучига эга. Биз Сурияда нима содир бўлганини кўрдик. Эрон, Шимолий Корея ва Жанубий Хитой денгизида унинг олдини олишимиз керак».
Сурия ва Эрон мусулмон давлатлар экани рост бўлса-да, Шимолий Кореянинг ҳам, Жанубий Хитой денгизи тортишувида иштирок этаётган давлатларнинг ҳам Ислом билан ҳеч қандай алоқаси йўқ, шунинг учун ҳам дунёдаги тартибсизликлар фақат мусулмонлар ёки мусулмон давлатлар атрофида айланади, деб айтиш мумкин эмас. Юқорида тилга олинган мақолада Франция элчиси Европанинг дунё тинчлигини сақлашдаги ҳал қилувчи роли ҳақида ҳам гапирди. У шундай ёзади:
«Ишончим комилки, Европа кўп қутбли дунёда асосий амал ва таъсир марказларидан бирига айланиш учун тарихий масъулият ва воситаларга эга. Дунё учун алоқа-восита, боғловчи ва мувозанатлашувчи куч сифатида хизмат қилиш Европанинг бурчидир.
Бир мунча вақт олдин мен муҳожир аҳоли ва маҳаллий немис халқи ўртасида кўприк ўрнатиш учун Германия ҳукумати томонидан тузилган ташкилотда ишлаётган немис сиёсатчиси билан учрашдим. Мен унга бу масалани Германиянинг ўзи ёки бошқа бир халқнинг ўзи ҳал қила олмайди; аксинча, агарда барча Европа давлатлари узоқ муддатли тинчликка эришмоқчи бўлсалар, биргаликда ва бирлик руҳида ҳаракат қилишлари керак, деб маслаҳат берган эдим. Клинтон маъмурияти даврида Оқ Уйда халқаро алоқалар бўйича катта иқтисодчи бўлган профессор Нуриэль Рубини яқинда чоп этган мақоласида Қўшма Штатлар ва Хитой ўртасидаги муносабатлар ҳақида ёзган эди. Профессор Роубини дейди:
«Хитой-Америка совуқ урушининг глобал оқибатлари АҚШ ва Совет Иттифоқи ўртасидаги совуқ урушдан ҳам кескинроқ бўлади».
Профессор Роубини яна шундай дейди:
«Тўлиқ миқёсли совуқ уруш глобализацияга қарши янги босқичини ёки ҳеч бўлмаганда глобал иқтисодиётнинг иккита қарама-қарши иқтисодий блокларга бўлинишини келтириб чиқариши мумкин. Ҳар иккала ҳолатда ҳам товарлар савдоси, хизматлар, пул, ишчи кучи, технология ва маълумотлар кескин чекланади».
Ушбу мақола дунёнинг қудратли давлатлари ўртасидаги савдо ҳамда иқтисодий урушнинг баъзи зарарли оқибатлари ҳақида тушунча беради. Яқинда Хитой ва АҚШ ўртасида келишув имзоланган, унинг қанчалик самарали эканини кўрамиз.
Бундай савдо урушлари бепарволик ва мантиқсиз бўлса-да, менинг энг катта қўрқувим ядро урушининг бошланиши бўлиб қолмоқда. Бундай урушнинг қайғули ва юракни эзувчи оқибатлари тасаввур қилиб ҳам бўлмайди ва у, албатта, келажак авлодларга ҳам тааллуқлидир. Борган сари бошқа одамлар ҳам бу хавфни таъкидламоқда. Жорж Мейсон университетининг иқтисод профессори, профессор Тайлер Коуэн “Bloomberg” учун мақоласида шундай ёзади:
«Ҳозирги дунёнинг энг ёрқин фактларидан бири шуки, ёшлар ядровий уруш ҳақида унчалик ташвишланмайдилар. Иқлим ўзгариши энг катта ташвишга айланган, аммо ядро уруши эса ўтмишдаги таҳдид сифатида кўрилмоқда…»
«… Бундан фарқли ўлароқ, мен фикримча, ядро уруши хавфи дунёда биринчи ўринда туради, аммо кундалик ҳаётда бу муаммога жиддий эътибор қаратилмаяпти».
Унинг сўзларига кўра, баъзи кичикроқ давлатлар ядро қуролларига эга бўлган, бошқа давлатлар эса уларни олишга интилмоқда ва шунинг учун ядровий уруш хавфи ортиб бормоқда. У жиддий таъкидлаб дейдики, дунёни абадий ўзгартириш учун ядровий ракета учиришга фақат битта давлат ёки гуруҳ керак бўлади. Яқинда “Deutsche-Welle” томонидан эълон қилинган сўров шуни кўрсатдики, немис халқини энг кўп ташвишлантираётган муаммо – иқлим ўзгаришидир, лекин шахсан мен юқорида тилга олинган олимнинг уруш хавфи, айниқса, ядро уруши хавфи энг катта эканлиги ҳақидаги фикрига қўшиламан. У замонамизнинг долзарб муаммоси.
Жорий йилнинг бошида Германиянинг собиқ ташқи ишлар вазири Зигмар Габриэль ҳам ядровий қуролларнинг тарқалишидан хавотир билдирган. Унинг таъкидлашича, Қўшма Штатлар, Россия ва Хитой ҳозирда янги ядровий қурол пойгаси билан банд. Эҳтимол, АҚШ ва Россия томонидан ядровий ракеталар Европага жойлаштирилар, бундай ҳолатда ядровий устунликка интилишда Европа давлатлари «емаган сомсаларига пул тўлайди».
Бундан ташқари, Қўшма Штатлар ҳамда Эрон ўртасидаги таранглик кучайиб бормоқда ва улар ўртасида уруш бўлиши мумкинлиги ҳақида кучли тахминлар мавжуд. Қўшма Штатлар ва Эрон ўртасидаги эҳтимолий уруш диний уруш эканлигини ҳеч ким жиддий даъво қила олмайди. Аксинча, бу миллионлаб одамларнинг ҳаётини хавф остига қўйган масъулиятсиз тортишув ва кераксиз жанговарликнинг ёрқин намунасидир. Сиёсий таҳлилчиларнинг таъкидлашича, агар АҚШ ва Эрон ўртасида уруш бошланса, унинг таъсири икки давлат билан чекланиб қолмайди, балки анча узоқроққа ҳам тарқалади. Шубҳасиз, Германия ва бошқа Европа мамлакатлари бундай урушнинг фалокатидан албатта таъсирланади. Демак, Германия ҳукумати ҳамда бошқа Европа давлатлари вазминликни сақлаш ва кескинликни пасайтиришга ундашда етакчилик қилиши керак.
Бундан ташқари, глобал молиявий инқироздан ўн йил ўтгач, Европа давлатлари ўзларининг миллий иқтисодиётлари хавфсиз ёхуд капиталистик тизим гуллаб-яшнамоқда деб ўйламасликлари керак. Ҳатто Ғарб экспертлари ва иқтисодчилари ҳам ўз молиявий тизимининг камчиликларини тан олишмоқда. Масалан, таниқли иқтисодчи Пол Кирнс “Economia” журнали учун яқинда чоп этилган мақоласида шундай ёзади:
«Капитализмдан ҳаммамиз фойда кўрдик, аммо бу тизим энди ўзини тузатиш учун қайта ишлаб чиқилиши керак. Фойдага эмас, балки жамият қадриятларига таяниши керак».
Демак, капиталистик тузум аста-секин ўз мавқеини йўқотмоқда ва одамлар унинг ичига ўзига хос хавф ва адолатсизликлар борлигини англаб етмоқда. Бинобарин, Европа давлатлари ва бошқа йирик давлатлар ўзларининг иқтисодий тизими абадий устунлик қилади, деб такаббурлик билан тахмин қилмасликлари керак; аксинча, улар адолат ва тенглик жаҳон молиявий тизимини асослашини таъминлаш учун ҳаракат қилишлари керак. Европадаги ноаниқликни кучайтираётган яна бир муаммо – бу «Брексит» ва унинг юз бериши мумкин бўлган оқибатларидир. Яқинда «Деутсче Велле» (Deutsche Welle) «Брексит» инқирозининг Европа Иттифоқидаги зарарли оқибатларини кўрсатадиган тадқиқотни келтирди. Ҳисоботда айтилишича, Германия «Қаттиқ Брексит»дан ўзгача таъсирланади ва бу Германиянинг автомобилсозлик ҳамда технология саноатига осонликча катта зарар етказиши мумкин ва биргина Германияда 100000 иш ўрни йўқолиши мумкин.
Хафагарчиликка сабаб бўлган ва дунёнинг кўп жойларида, шу жумладан, Германияда ҳам низо қўзғатиш учун қайта-қайта фойдаланилган яна бир муаммо – иммиграциядир. Бундай мунозарали масала бўлишига қарамай, ҳақиқат шуки, иммиграция ривожланаётган иқтисодиётлар учун ажралмас эҳтиёждир. Мисол учун, «Бертельсман» жамғармаси томонидан яқинда ўтказилган тадқиқот шуни кўрсатдики, Германияда асосий ишчи кучига бўлган талабни қондириш учун ҳар йили 260000 иммигрант ишчи кучи танқислигининг олдини олиш учун ушбу мамлакатга кўчиб ўтиши керак эди. Ҳисоботда айтилишича, аҳолининг қариши туфайли Германияда ишчи кучи иммиграциясиз 2060-йилга келиб учдан бир қисмга ёки 16 миллион кишига қисқариши мумкин. Шундай қилиб, мамлакатнинг барча муаммолари учун иммигрантларни айблаш мутлақо ноинсофликдир, ҳақиқат шуки, кўплаб бадавлат Ғарб давлатлари иммиграциясиз катта хавф остида бўлади.
Дарҳақиқат, барча халқлар бир-бирига таянади ва биз ҳозир тобора ўзаро боғланган ҳамда глобаллашган дунёда яшамоқдамиз. Тўсиқлар қуриш ёки ўзимизни изоляция қилишга интилиш ўрнига, турли миллатларга мансуб халқлар ҳамда одамлар умумий манфаатлар учун ҳамкорлик ва биргаликда ҳаракат қилишлари керак. Бунинг учун ҳукуматлар мамлакатларнинг бир-бири билан ҳамжиҳатликда ишлашини ва маҳаллий даражада муҳожирларнинг ассимиляция ва интеграциялашувига ёрдам бериш учун тегишли режалар тузиши керак.
Ўнлаб йиллар давомида Яқин Шарқдаги вазият беқарор ва қизғин бўлиб келган. Исроил ва Фаластин ўртасида музокаралар йўли билан келишувга эришишга қаратилган сон-саноқсиз тинчлик режаларининг барчаси муваффақиятсизликка учраган. Сўнгги пайтларда Қўшма Штатлар ва унинг иттифоқчилари томонидан ишлаб чиқилгани айтилаётган янги тинчлик режаси ҳақида қизғин миш-мишлар тарқалди. Бироқ, сиёсатчилар ва экспертлар янги режанинг ҳали расман эълон қилинмаслигидан олдинроқ, унинг асоси ноҳақлик ва шунинг учун ҳеч қандай ижобий натижага эриша олмаслигини айтишмоқда. Дарҳақиқат, Франциянинг АҚШдаги элчиси сифатида яқинда нафақага чиқишидан олдин, Жерар Аро муваффақиятсизлик режанинг пешонасида битилганлигини айтди. Демак, ўз шахсий ва миллий манфаатларини адолат ҳамда тенгликдан устун қўювчи сиёсий етакчилар ва ҳукуматларнинг бир томонлама сиёсати каби турли омиллар дунё тинчлигига путур етказмоқда. Бундай адолатсизлик ҳеч қачон тинчлик ва фаровонликка олиб келмайди.
Мен келтирган турли тадқиқотлар ва мақолалар шуни кўрсатадики, дунёда тинчлик ва хавфсизлик йўқлиги учун айбни Исломга ёки бирор бошқа динга тўнкаб бўлмайди, балки дунё тинчлигига путур етказишда муҳим роль ўйнайдиган кўплаб иқтисодий, геосиёсий ва ижтимоий муаммолар мавжуд.
Тарихнинг ушбу оғир лаҳзасида мен чин қалбимдан ишонаманки, замонамизнинг буюк синовларига барҳам беришнинг фақатгина ягона йўли бор. Бизни нажотга олиб борадиган ва бу уруш ҳамда низолар оламидан қутқарадиган ягона йўл бор, у ҳам бўлса, Аллоҳ таолонинг йўлидир. Тинчлик ҳокимиятда ёки бойликда эмас, балки тинчлик Аллоҳ таолонинг бешигидадир. Шунингдек, инсоният ўз Яратгувчисини тан олиши замон талабидир. Аллоҳ таоло Ўзи энг яхши хилқат қилиб яратган одамларнинг тинч-тотув яшашини ва бир-бирларининг ҳақ-ҳуқуқларини бажаришини истайди.
Ислом динининг муқаддас китоби ва исломий қонуннинг энг йирик манбаси бўлган Қуръони Карим, бизнинг эътиқодимизга кўра, Аллоҳ таоло томонидан Пайғамбаримиз Муҳаммад саллаллоҳу алайҳи ва салламга нозил қилинган ва биз уни қиёматгача қоладиган охирги диний қонун деб биламиз. Аллоҳ таоло Қуръони Каримда бўлиниш ҳамда тартибсизликлар дунёнинг ҳамма жойларига ёйилишининг асл сабаби инсоният ва унинг Яратгувчиси ўртасидаги узоқлашиб бораётган масофа эканлигини таъкидлаган.
Дунё фалокат ёқасига талпинаётган шундай пайтларда Аллоҳ таоло Ўзининг чексиз фазли ва марҳмати ила инсониятни динга қайтариш учун Ўзининг танлаган вакилларини юборади. Қадимда пайғамбарлар ўз қавмларига йўл-йўриқ кўрсатиш учун дунёнинг турли бурчакларига келишган. Сўнгра, бизнинг эътиқодимизга кўра, охир-оқибат, Аллоҳ таоло Пайғамбаримиз Муҳаммад саллаллоҳу алайҳи ва салламни умумжаҳон ва абадий таълимот билан бутун инсониятнинг маънавий ҳамда ахлоқий ислоҳоти учун юборди.
Аввал айтиб ўтганимдек, биз Аҳмадий Мусулмонлар ишонамизки, Аллоҳ таоло бу даврда Аҳмадия Мусулмон Жамоатининг асосчисини ислоҳотчи сифатида инсониятни ҳидоят қилиш ҳамда узоқ вақтдан бери тарк этилган ва ўзгартириб юборилган Ислом динининг ҳақиқий таълимотларини ёритиш учун юборди. У зот мусулмонларга ҳам, ғайримусулмонларга ҳам Ислом тинчлик, муросасозлик, биродарлик ва дўстлик дини эканлигини ҳамда Аллоҳ таоло инсониятнинг тинч-тотув яшашини, барча инсонлар Яратувчисининг ва бир-бирларининг ҳақ-ҳуқуқларини бажаришини исташини кўрсатиш учун юборилган.
Масийҳи Мавъуд алайҳиссалом Аллоҳ таоло яратган махлуқотининг ҳақ-ҳуқуқларини адо қилмай туриб, Унинг ҳақ-ҳуқуқларини бажариш мумкин эмаслигини қайта-қайта таъкидлаганлар. Дарҳақиқат, Қуръони каримда Аллоҳ таоло яратган махлуқотининг ҳақ-ҳуқуқларини адо қилмаган кимсаларнинг намози ва ибодати беҳуда бўлиб, Аллоҳ таоло томонидан рад этилиши ҳақида айтилган.
Масийҳи Мавъуд алайҳиссалом инсониятни ҳар қандай уруш ва хавф-хатарлардан халос бўлиш учун Аллоҳ таолонинг соясидан бошпана излашга чақирдилар. Шу билан бирга, у зот алайҳиссалом агарда инсоният ўз Яратгувчисини таниб олиш бурчини бажармай қолса, катта хавф остида бўлишини ҳам огоҳлантирганлар. У зот алайҳиссаломга кўра, ўзларининг қудрати, бойлиги ва қуч-қувватига қарамай, на Европа, на Америка ҳалокатдан омон қолади. Осиё, Австралия ёки Ороллар ёхуд дунёнинг бошқа қисмлари ҳам омон қолмайди.
Шу нуқтаи назардан, инсоният бу моддий дунёни, унинг жозибадорлиги ва қулайликларини борлиқнинг якуний шакли сифатида кўришни давом эттирмасдан, ўз Яратгувчисини тан олиши ва Унга юзланиши учун чин дилдан дуо қиламан.
Мен умид ҳамда дуо қиламанки, бутун дунё одамлари ўз Яратгувчиси ва ўз биродарлари олдидаги бурчларини англаб етсинлар, токи дунё барчамиз табиий равишда орзу-ҳавас қиладиган тинчлик диёрига айлансин.
Мен бизга эргашганлар учун ижобий ўрнак бўлишимиз учун дуо қиламан. Токи, келажак авлодлар тўқнашув ва бўлинишни қўзғатувчи бўлишларидан ва фаровонлик ҳамда муваффақиятга олиб борадиган барча йўллар тўсилган бўлишларидан кўра, тинчликда ҳаёт кечирсинлар. Атрофимиздаги даҳшатли уруш ва адоватнинг қора булутлари тарқалиб кетишини ва унинг ўрнини дунёнинг барча бурчакларида абадий тинчлик ва фаровонликнинг мовий осмони эгаллашини тилайман.
Аллоҳ таоло инсониятга кеч бўлмасдан туриб Ўзига юзланишга ва келаётган офатдан ўзини қутқаришга куч-қувват ато этсин. Омин!
Охирида, бугун тушда бизга ҳамроҳ бўлганингиз учун барчангизга яна бир бор раҳмат айтмоқчиман. Сизга катта раҳмат!»