بسم اللہ الرحمن الرحیم
Аллоҳ таоло муборак Рамазон ойи хусусида Қуръони Каримда шундай марҳамат қилади:
{يَا أَيُّهَا الَّذِينَ آمَنُوا كُتِبَ عَلَيْكُمُ الصِّيَامُ كَمَا كُتِبَ عَلَى الَّذِينَ مِنْ قَبْلِكُمْ لَعَلَّكُمْ تَتَّقُونَ (184) أَيَّامًا مَعْدُودَاتٍ فَمَنْ كَانَ مِنْكُمْ مَرِيضًا أَوْ عَلَى سَفَرٍ فَعِدَّةٌ مِنْ أَيَّامٍ أُخَرَ وَعَلَى الَّذِينَ يُطِيقُونَهُ فِدْيَةٌ طَعَامُ مِسْكِينٍ فَمَنْ تَطَوَّعَ خَيْرًا فَهُوَ خَيْرٌ لَهُ وَأَنْ تَصُومُوا خَيْرٌ لَكُمْ إِنْ كُنْتُمْ تَعْلَمُونَ (185) شَهْرُ رَمَضَانَ الَّذِي أُنْزِلَ فِيهِ الْقُرْآنُ هُدًى لِلنَّاسِ وَبَيِّنَاتٍ مِنَ الْهُدَى وَالْفُرْقَانِ فَمَنْ شَهِدَ مِنْكُمُ الشَّهْرَ فَلْيَصُمْهُ وَمَنْ كَانَ مَرِيضًا أَوْ عَلَى سَفَرٍ فَعِدَّةٌ مِنْ أَيَّامٍ أُخَرَ يُرِيدُ اللَّهُ بِكُمُ الْيُسْرَ وَلَا يُرِيدُ بِكُمُ الْعُسْرَ وَلِتُكْمِلُوا الْعِدَّةَ وَلِتُكَبِّرُوا اللَّهَ عَلَى مَا هَدَاكُمْ وَلَعَلَّكُمْ تَشْكُرُونَ } (البقرة 184-186)
“Эй, иймон келтирганлар! Сизлардан илгари ўтган кишиларга рўзалар фарз қилингани сингари сизларга (ҳам) фарз қилинди, токи тақводор бўлингиз. (Бас), саноқли кунларда (рўза тутинглар). Бас, сизлардан кимдир касал ёки сафарда бўлса, у бошқа кунларда шунча муддат рўза тутиши керак. Ва бунга қурби етган кишиларга фидя (сифатида) бир мискинни овқатлантириш вожибдир. Бас, кимки қўшимча яхши амал қилса, бу ўзига жуда яхшидир. Ва агар билсангизлар, рўза тутишингиз сизлар учун яхшироқдир. Рамазон ойи Қуръон инсоният учун бир буюк ҳидоят ва ҳидоят тафсилоти ҳамда ҳақ ва ботил ўртасида фарқ қиладиган амрлардан иборат бўлган оят-аломатлар сифатида нозил этилган ойдир. Бас, сизлардан кимки бу ойни кўрса, унинг рўзаларини тутсин. Ва кимки бемор ёки сафарда бўлса, шунча (кун) миқдорида бошқа кунларда рўза тутиши лозим. Аллоҳ сизларга енгиллик истайди ва сизларга оғирликни истамайди. Ва (бу кунлар) сонини (осонликча) тўлдиришингизни истайди. Ва сизларни ҳидоят қилгани учун Аллоҳ(га ҳамду сано айтиб) улуғланглар ва шукр қилинглар”. (“Ал-Бақара”: 184-186)
Расулуллоҳ саллаллоҳу алайҳи ва салламнинг Рамазон ойи фазилатларини акс эттирадиган баъзи ҳадисларини эътиборингизга ҳавола қиламан.
Расулуллоҳ саллаллоҳу алайҳи ва саллам: “Рамазон ойи кирганда жаннат эшиклари очилади, жаҳаннам эшиклари қулфланади ва шайтонлар кишанланади”, – дедилар.
(“Бухорий”)
Расулуллоҳ саллаллоҳу алайҳи ва саллам: “Кимки иймон билан савоб умидида Рамазон рўзасини тутса, ўтган гуноҳлари мағфират қилинади”, – дедилар.
(“Бухорий”)
Расулуллоҳ саллаллоҳу алайҳи ва саллам: “Бу ойнинг аввали раҳматдир, ўртаси мағфират ва охири эса дўзахдан нажотдир”, – деб марҳамат қиладилар.
(“Бухорий”)
Расулуллоҳ саллаллоҳу алайҳи ва саллам: “Аллоҳ таоло “Одам боласининг ҳамма амали ўзи учундир, фақат рўза Мен учундир ва унинг мукофотини Мен – Ўзим бераман”, – деди. Рўза қалқондир. Қачон қайси бирингиз рўзадор бўлса, фаҳшдан гапирмасин ва бақир-чақир қилмасин. Агар бирортаси у билан сўкишмоқчи ёки уришмоқчи бўлса: “Мен рўзадор одамман”, – десин. Муҳаммаднинг жони қўлида бўлган Зотга қасамки, албатта, рўзадор оғзининг ҳиди Аллоҳнинг наздида мушкнинг ҳидидан ҳам хушбўйроқдир”, – дедилар”.
(“Бухорий”)
Расулуллоҳ саллаллоҳу алайҳи ва саллам: “Жаннатда Райён номли эшик бор. Қиёмат куни рўза тутгувчилар қаерда дейилганда, улар туришади. Райён эшигидан рўза тутгувчилардан бошқа ҳеч ким кирмайди. Рўзадорлар жаннатга кириб бўлганларидан кейин эшик ёпилади”, – дедилар.
(“Бухорий”)
Расулуллоҳ саллаллоҳу алайҳи ва саллам: “Кимки ёлғон гапиришни ва унга кўра амал қилишни тарк этмаса, унинг таоми ва ичимлигини тарк этишига Аллоҳнинг эҳтиёжи йўқ”, – деганлар.
(“Бухорий”)
Суюкли Пайғамбаримиз Муҳаммад Мустафо саллаллоҳу алайҳи ва салламнинг ҳаққоний қуллари Масийҳи Мавъуд ва Имом Маҳдий – Ҳазрат Мирзо Ғулом Аҳмад Қодиёний алайҳиссалом рўзанинг фалсафасини баён этиб шундай дейдилар:
“Бундан Аллоҳ таолонинг мақсад-муддаоси шуки, бир озуқани камайтириб, иккинчисини кўпайтиринглар. Бу нарса доимо рўзадор кишининг кўз олдида туриши керакки, рўзанинг мақсади фақат оч қолиш эмас, балки инсон Аллоҳ таолонинг зикри билан банд бўлиб туриши лозим, токи у дунёдан узилиб, Аллоҳ таологагина мурожаат қилсин.
Демак, рўзадан мақсад шуки, инсон баданни озиқлантирадиган озуқани тарк этиб, руҳни суғорадиган ҳамда унга таскин сабабчиси бўладиган иккинчи озуқани ҳосил қилсин. Қуруқ расм-русум сифатида рўза тутмай, фақатгина Аллоҳ таоло учун рўза тутгувчи одамлар Аллоҳ таолога тасбеҳу таҳлил айтиб туришлари керак”.
(“Малфузот”, 9-том, 123-бет)
Аллоҳ таоло биз – барчамизни муборак Рамазон ойининг фазилатларидан баҳраманд қилсин. Омин!