Аллоҳ

Аллоҳ – Худойи таолонинг номидир. Араб тилида «Аллоҳ» сўзи Худойи таолодан бошқа ҳеч бир нарса ёки одам учун ишлатилмайди. Бошқа тилларда Худойи таоло учун ишлатиладиган барча номлар сифатли ёки изоҳли номлардир. Улар кўпинча кўплик шаклида ишлатилади, лекин «Аллоҳ» сўзи ҳеч қачон кўплик шаклида ишлатилмайди. Бошқа тилларда «Аллоҳ» сўзининг синоними учрамаганлиги сабабли таржималарда асл ном – «Аллоҳ»нинг ўзи ёзилади.

1. Беқиёс раҳм қилгувчи, сўрамасдан бергувчи (ва) қайта-қайта раҳм қилгувчи Аллоҳ номи билан.
2. Барча ҳамду санолар бутун оламлар Парвардигори бўлмиш Аллоҳ учундир.
3. Беқиёс раҳм қилгувчи, сўрамасдан бергувчи (ва) қайта-қайта раҳм қилгувчидир.
4. Жазою мукофот кунининг Хожасидир.
5. Биз фақат Сенгагина ибодат қиламиз ва Сендангина мадад сўраймиз.
6. Бизни тўғри йўлга бошлагин –
7. Сен инъом қилган, ғазабга дучор қилинмаган ҳамда гумроҳ бўлмаган зотларнинг йўлига.

(Ал-Фотиҳа 1: 1-7)

8. Осмонлар ва ердаги барча нарсалар Аллоҳгагина тасбеҳ айтади. Ва Ул Зот энг ғолиб (ва) ҳикмат соҳибидир.
9. Осмонлар ва ернинг подшоҳлиги Уникидир. У ҳаёт ва ўлим беради ва У Ўзи хоҳлаган барча нарсаларга доимий қодирдир.
10. Аввал ҳам, охир ҳам, зоҳир ҳам, ботин ҳам Унинг Ўзидир. Ва Ул Зот барча нарсани доимий билгувчидир.
11. Осмонлар ва ерни олти даврда яратган Зот Унинг Ўзидир. Сўнгра У аршда қарор топди. Ул Зот ерга кирадиган нарсаларни ҳам, ундан чиқадиган нарсаларни ҳам, осмондан тушадиган нарсаларни ҳам, унга кўтариладиган нарсаларни ҳам билади. Қаерда бўлишларингиздан қатъий назар Ул Зот сизлар билан бирга бўлади. Ва Аллоҳ нима қилаётганларингизни доимо теран кузатгувчидир.
12. Осмонлар ва ернинг подшоҳлиги Уникидир ва ҳамма ишлар Аллоҳгагина қайтарилади.
13. Ул Зот тунни кунга киритади ва кунни тунга киритади. Ва Ул Зот кўкраклардаги барча гапларни ҳам доимий билгувчидир.
14. Аллоҳга ва Унинг Пайғамбарига иймон келтиринглар ва Ул Зот сизларни ворис қилиб қўйган нарсалардан сарф қилинглар. Ва ораларингиздан иймон келтирган ҳамда (Аллоҳ йўлида) сарф қилган зотлар учун улкан мукофот бор.

(Ал-Ҳадид 57: 2-8)

15. Осмонлар ва ердаги бор нарсалар Аллоҳгагина тасбеҳ айтмоқда. Подшоҳлик Уникидир. Барча ҳамду сано Унинг учундир. Ва У Ўзи хоҳлаган барча нарсага доимий қодирдир.
16. У сизларни яратган Зотдир. Бас, ораларингизда кофирлар ҳам бор ва мўминлар ҳам. Ва Аллоҳ қилаётган амалларингизни теран кузатгувчидир.
17. Ул Зот осмонлар ва ерни ҳақ билан яратди ва сизларга сурат-шакл берди ва суратларингизни жуда гўзал қилди ва Унинг Ўзигагина қайтиш бордир .
18. Ул Зот осмонлар ва ердаги барча нарсаларни билади. Ва У сизлар яширадиган нарсани ҳам, ошкор қиладиган нарсани ҳам билади. Ва Аллоҳ кўкраклардаги барча нарсани доимий билгувчидир.

(Ат-Тағобун 64: 2-5)

19. Албатта, Аллоҳ дон ва данакларни ёргувчидир. У ўликдан тирикни чиқаради ва тирикдан ўликни чиқаргувчидир. Мана шу Аллоҳингиздир. Бас, қаёққа адаштирилмоқдасизлар?
20. У тонгларни ёритгувчидир. Ва У тунни сокин қилди ва Қуёш ҳамда Ой эса бир ҳисоб бўйича айланмоқда. Бу энг ғолиб (ва) билгувчининг (жорий этган) тақдиридир.
21. Ва сизлар учун юлдузларни яратган Зот Унинг Ўзидир, токи улар ёрдамида қуруқлик ва денгиз зулматларида тўғри йўлни топингиз. Албатта, билим эгалари учун Биз оят-аломатларни майда тафсилотларигача баён этдик.
22. Ва У сизларни битта жондан бунёд қилган Зотдир. Бас, сизларга вақтинча қароргоҳ ва абадий бехатар маконни барпо қилди. Албатта, фаҳм-фаросат эгаларига Биз оят-аломатларни майда тафсилотларигача баён этдик.
23. Ва У осмондан сув туширган Зотдир. Сўнгра унинг ёрдамида ҳар хил набототни ўстирдик. Сўнгра ундан майсани чиқардик. Ундан қатма-қат уруғларни чиқарамиз. Ва хурмо дарахтларидан ҳам унинг бошларидан пастга осилиб тургувчи қатор мевалар, шунингдек, узум ва зайтун ҳамда анорни чиқарамиз – (улардан баъзилари) бир-бирига ўхшайди ва (баъзилари эса) бир-бирига ўхшамайди. Улар мева тукканда, мевасига ва пишишига қаранглар. Албатта, бу-ларнинг барчасида иймон келтирадиган қавм учун катта оят-аломатлар бордир.
24. Ва улар жинларни Аллоҳга шерик қилиб олдилар, ваҳоланки, У уларни яратгандир. Ва улар ҳеч қандай билимга эга бўлмасдан туриб, Унга ўғил ва қизларни тўқиб оладилар. У покдир ва улар баён этаётган нарсалардан жуда юксакдир.

(Ал-Анъом 6: 96-101)

25. Аллоҳ! Ундан ўзга ҳеч қандай маъбуд йўқдир. Ҳамиша барҳаёт (ва) Зотан қоимдир. Уни на мудроқ ва на уйқу босади. Осмонлар ва ердаги барча нарсалар Уникидир. Унинг ҳузурида Унинг изнисиз ким ҳам шафоат қила олади?! У уларнинг олдлари ва ортларидаги нарсаларни билади. Ва улар Унинг билимининг Ўзи истаганидан ўзгани қамраб ололмайдилар. Унинг подшоҳлиги осмонлар ва ерда ёйилгандир. Ва улар иккаласини муҳофаза қилиш Уни чарчатмайди. Ва У энг юксак шонли (ва) жуда буюкдир.

(Ал-Бақара 2: 256)

26. У Аллоҳдир, Ундан ўзга бирорта маъбуд йўқдир. У ғайб ҳамда ошкорни билгувчидир. У беқиёс раҳм қилгувчи, сўрамасдан бергувчи (ва) қайта-қайта раҳм қилгувчидир.
27. У Аллоҳдир, Ундан ўзга бирорта маъбуд йўқдир. У подшоҳдир, покдир, саломдир, омонлик бергувчидир, назоратчидир, энг ғолибдир, бузилган ишларни ўнглагувчидир (ва) улуғ шонлидир. Аллоҳ улар Унга шерик қилаётган нарсалардан покдир!
28. У яратгувчи, яратишни бошлагувчи ҳамда мусаввир бўлмиш Аллоҳдир. Барча гўзал исмлар Уникидир. Осмонлар ва ердаги барча нарсалар Унга ҳамду сано айтмоқда. Ва Ул Зот энг ғолиб (ва) ҳикмат соҳибидир.

(Ал-Ҳашр 59: 23-25)