Ҳазрат Амирул мўминин (аййадаҳуллоҳу таоло би-насриҳил азиз)нинг Ҳиндистондаги «Лажна Имоиллоҳ»нинг 2024 йилги «Салона Ижтимоа»си муносабати билан маърифий пайғомлари

Ҳиндистондаги «Лажна Имоиллоҳ»[1] аъзолари!

Ассалому алайкум ва раҳматуллоҳи ва баракотуҳу

Ал-ҳамдулиллоҳ, «Салона Ижтимоа»[2]нгизни ташкил қилиш имкониятига эга бўлмоқдасиз.  Аллоҳ таоло буни ҳар томонлама муваффақиятли қилсин ва бу муборак имкониятдан тўлиқ фойдаланишингизга тавфиқ берсин. Омин!

Шу муносабат билан мендан хабар юборишни сўрашди. Бу муносабат билан менинг хабарим шуки, Аллоҳ таоло сизларга алоҳида фазлу карам қилиб, Ваъда қилинган Масийҳ ва Маҳдий[3] алайҳиссаломга иймон келтириш ва хилофат билан боғланиш тавфиқини берди. Сизнинг зиммангизга жуда кўп масъулиятлар тушади. Сизлар ўз ҳаётларингизни ҳам Ислом таълимотлари асосида ўтказишингиз ва фарзандларингизга ҳам буни насиҳат қилишда давом этишингиз керак. Ислом таълимотидаги бир жуда ҳам муҳим ҳукм – бу намоздир. Ваъда қилинган Масийҳ ва Маҳдий алайҳиссалом марҳамат қиладилар:

«Намоз Аллоҳ таолонинг ҳаққи, уни яхшилаб адо этинг… У динни ислоҳ қилади. Ахлоқни тўғрилайди. Дунёни ислоҳ қилади. Намознинг лаззати дунёнинг ҳар қандай лаззатидан устундир. Жисмоний лаззатлар учун минглаб (рупия) сарфланади ва кейин натижаси касалликлар бўлади. Бу (намоз) эса унинг қўлига тегадиган текин жаннатидир. Қуръони Каримда иккита жаннат зикр қилинган. Улардан бири, бу дунё жаннати ва у намознинг лаззатидир».

(«Малфузот» 3-жилд, 591-592-бетлар)

Расулуллоҳ саллаллоҳу алайҳи ва саллам намозни кўзлар қувончи сифатида кўрсатганлар. Маълумки, фарзандлар учун қилинадиган бир дуо бор: Аллоҳим, уларни кўзларимиз қувончи қилгин. Бу дуони Аллоҳ таолодан сўраганингизда, Расулуллоҳ саллаллоҳу алайҳи ва салламнинг покиза ўрнаклари асосида кўзлар қувончини излашингиз керак. Ва бу кўзлар қувончини фақат Аллоҳ таолонинг ҳақларини бажариш билангина намоз орқали олиш мумкин. Шундай экан, фарзандлар тарбияси учун аёлларнинг ўз намозларини асраб-авайлашлари ва намознинг олий сифатига эришишлари муҳим. Аллоҳ таолонинг амрларига амал қилиб, ўз намозларингизни асраганингизда, эрлар ва фарзандларингизни намозга жалб қилганингизда, албатта, намоз сизни асрайди ва ҳар хил ёмонлик ва ёвузликдан сақлайди. Аллоҳ таоло «Ал-Анкабут» сурасида марҳамат қилади:

اِنَّ الصَّلَاةَ تَنْهٰى عَنِ الْفَحْشَاءِ وَالْمُنْكَرِ

Намоз беҳаёлик ва макруҳ нарсалардан қайтаради. («Ал-Анкабут» сураси: 46-оят)

Намозни ўз вақтида ўқиш дарвоқе бизни ёмон ишлар қилишдан сақлайди. Бу руҳоний ҳимоя девори нафақат биз билан чекланади, балки бутун оила ундан ҳимояланади ва хавфсиз бўлади. Аллоҳ таолога тўғри маънода ибодат қилганларга Аллоҳ дўст бўлиб қолади ва улардан рози бўлади.

Шуни ёдда тутингки, аёллар фарзандларнинг таълим-тарбия олишлари учун асбоб-ускуналар муҳайё қиладилар, шунинг учун уларнинг ўз намозларига эътибор беришлари шарт. Ўз намозини қўриқлаган аёл, албатта, ўз фарзандларининг жаннатга киришига кафолат бўлади.

Ҳазрат Абдурраҳмон ибн Авф разияллоҳу анҳу Расулуллоҳ саллаллоҳу алайҳи ва салламнинг бундай деганларини ривоят қиладилар: «Беш вақт намозини ўқийдиган, Рамазон рўзасини тутадиган, ўзини ёмон ахлоқлардан сақлайдиган ва эрига сидқи дилдан ва садоқат билан хизмат қиладиган аёл – бундай аёл жаннатга истаган эшигидан киришга ҳақлидир».

Ибодатнинг хилофат билан катта алоқаси борлигини ҳам доимо ёдда тутинг. Қаерда мўминларга қалблар таскини ва хилофат ваъда қилинган бўлса, ўша ерда кейинги оятда қуйидаги буйруқ ҳам бор:

اَقِیمُوا الصَّلوٰةَ (النور : 57)

Намозни адо этинг. («Ан-Нур» сураси: 57-оят)

Демак, таскин топиш ва хилофат тузумидан файз-барака олишнинг биринчи шарти намозни тўлиқ адо этишдир. Шундай экан, буни яхшилаб ёдда тутингки, Аллоҳ таолонинг хилофат шаклида давом этаётган бу инъомидан фақат намозларингизни ҳимоя қилгувчи бўлганингиздагина баҳраманд бўла оласиз.

Аллоҳ таоло сизга мана шу панд-насиҳатларимга амал қилиш тавфиқини ато этсин. Омин!

[1] Аҳмадия Мусулмон Жамоатидаги аёллар ташкилоти.

[2] Йиллик йиғилиш.

[3] Ҳазрат Мирзо Ғулом Аҳмад Қодиёний алайҳиссалом (1835-1908).