14/05/2020

Рамазон нафсни поклаш учун хусусиятли ой

بسم اللہ الرحمن الرحیم

Рамазон нафсни поклаш учун хусусиятли ой

(Жамоат аъзолари бундан кўпроқ фойда олишлари зарур)

 Муаллиф: Ҳазрат Мирзо Башир Аҳмад соҳиб (Аллоҳ у зотдан рози бўлсин)

 Демак, аввало, одамларнинг эътиборини ушбу муқаддас ойнинг моҳиятини тушунишга тортмоқчиман. Улар бу тушунчага эга бўлганларидан сўнг, бу муборак кунларни Аллоҳ ва Унинг Пайғамбари саллаллоҳу алайҳи ва саллам улардан кутганларидек ўтказсинлар. Яъни, биринчидан, шаръий узрлар сабабли рўза тутмаслик ҳуқуқига эга бўлганлар бундан мустаснодирлар; қолган барча одамлар бу рўзаларни тутишлари керак. Рўза тутишда ҳар доим Ислом англатган рўза тутишнинг муборак моҳиятини ёдда тутиш лозим. Рўза фақатгина оч ва чанқоқ қолишнинг номи эмас, балки ундан чинакам руҳий моҳият намоён бўлиши керак.амазон ойи яқинлашмоқда ва, эҳтимол, ушбу мақола нашр этилганда, Рамазон аллақачон бошланган бўлар. Рамазон ойи ўзгача ой эканлигини ҳамма билади, бу ҳақда Аллоҳ таоло, бундай вақтда бандаларига Ўзининг жуда яқин эканини айтади. Рамазоннинг ўзгача ой бўлишининг сабаби шундаки, унда ибодат қилиш ва Аллоҳ таолони зикр этишга катта эътибор қаратилади. Яна бу ойда муборак ибодат бўлган рўза тутишдан ташқари, одамлар қўшимча намозлар ҳам ўқишади, Қуръонни кўпроқ тиловат қилишади ва Аллоҳни кўпроқ зикр этишади. Шунинг учун Аллоҳ таоло наздида бу ой катта фазилатга эга ҳамда баракалидир.

Иккинчидан, таровиҳ намози мунтазам ўқилиши керак. Унинг учун энг афзал вақт саҳар пайти (Бомдод намозидан сал олдинроқдаги вақт) ҳисобланади. Ушбу ибодатни енгиллаштириш учун хуфтон намозидан кейин ҳам ўқишга рухсат берилган, аммо бу камроқ аҳамиятли бўлади.

Учинчидан, бу ойда Қуръони Каримни ўқишга алоҳида эътибор қаратилиши керак. Рамазон ойи мобайнида Қуръони Каримни камида бир марта хатм қилиш учун махсус саъй-ҳаракат талаб этилади.

Тўртинчидан, Рамазон ойида дуоларга алоҳида эътибор берилиши керак. Дуо – буюк ибодат эканлигидан ташқари, мақсадларга эришишнинг энг чиройли воситасидир. Дуолардаги энг биринчи дуо Ислом ва Аҳмадиятнинг ривожланиши учун бўлиши керак. Ундан кейин шахсий эҳтиёжлар учун дуо қилиш мумкин.

Бешинчидан, бу ойда садақа-эҳсон қилишга алоҳида эътибор қаратиш керак. Зеро, садақа балони қайтаради ва ривожланиш воситасидир.

Умид қиламанки, агар Рамазон ойида биродарларимиз юқорида келтирилган 5 нарсага риоя қилиб, уларни фақат анъана сифатида эмас, балки самимийлик ҳамда хушуъ ва хузуъ билан бажарсалар, унда иншааллоҳ, буюк руҳий баракалардан баҳраманд бўла оладилар.

Шунингдек, мен жорий йил яна олдинги йилларда ташлаган чақириққа чорламоқчиман. У ҳам бўлса, биродарларимиз Рамазон ойида ўзларининг бирон-бир камчилигини мўлжаллаб, уни бартараф этиш ва ундан сақланиш учун Аллоҳга қатъий ваъда беришлари керак.Токи, Рамазон ойи тугаганда, ҳеч бўлмаса, улар ўз камчиликларидан бирига барҳам бериб қўйган бўлсинлар.

Ҳазрат Масийҳи Мавъуд алайҳисалом ҳам бу чақириққа чорлаган эдилар. Аллоҳ таолонинг иноятлари ила бу тамойил нафсни поклаш учун ўта фойдали ва баракалидир.

Баъзи биродарларимиз ўз нафсларини ҳисоб-китоб қилишмайди. Улар ўзларида қанақа камчиликлар борлигига қарамай, уларни бартараф этишга эътибор қаратишмайди. Шунинг учун бундай биродарлар учун шу даврда кенг тарқалган баъзи камчилик-нуқсонларнинг қисқача рўйхати қайд этилади. Улар ўз нафсларини ҳисоб-китоб қилиб, ўзларида мавжуд бўлган камчиликлардан бирортасини танлаб олиб, биз Аллоҳ таолонинг ёрдами билан мазкур камчиликка барҳам берамиз ва ундан сақланиб турамиз, деб Аллоҳ таолога қатъий ваъда берсинлар.

Ушбу камчиликларнинг рўйхати қуйидагича:

  1. Фарз қилинган беш вақт намозни адо этишда дангасалик қилиш.
  2. Жамоат намозларини адо этишда дангасалик қилиш.
  3. Имом билан келишмовчилик туфайли жамоат намозларини тарк этиш.
  4. Намоз ўқишнинг шарти бўлган покликка риоя қилишда лоқайдлик кўрсатиш.
  5. Суннат намозларини адо этишда дангасалик қилиш.
  6. Таҳажжуд намозини адо этишда ялқовлик қилиш.
  7. Рўза тутишда сусткашлик қилиш, яъни бирон-бир сабабсиз рўза тутмаслик.
  8. Рамазон ойида бирон-бир сабаб туфайли қолдирилган рўзаларнинг ўрнига рўза тутиш ёки улар учун фидя тўлашда дангасалик қилиш.
  9. Зиммасига закот фарз бўлган кишининг уни тўлашда дангасалик қилиши.
  10. Закот зиммасига фарз бўлгани ёки бўлмаганини билишда дангасалик қилиш.
  11. Жамоат белгилаган чандаларни тўғри фоизларда тўлашда сусткашлик қилиш.
  12. Жамоат чандаларини вақтида тўлашда сусткашлик қилиш.
  13. “Васият” тизимига аъзо бўлиш имкониятига эга бўлган ҳолида ҳам, аъзо бўлмаслик.
  14. Ўз ўлимидан кейин “Васият” тизимидаги чандаларни тўлашда низо келиб чиқиши мумкинлигини билиб туриб ҳам, ҳаётлигида бу тўловларни тўламаслик, ёки ўлимидан кейин ушбу чандаларнинг тўланиши учун шароитлар яратмаслик.
  15. Имкониятлар мавжудлигига қарамай, “Васият” тизимида юқори даражаларга эришиш учун интилмаслик.
  16. Ҳақ динга даъват қилиш масаласида дангасалик қилиш.
  17. Оила аъзоларининг, қўшниларининг ва дўстларининг таълим-тарбияларида дангасалик қилиш.
  18. Ўз уйларида Қуръони Карим дарсларини ташкил қилишда, Масийҳи Мавъуд алайҳиссаломнинг китобларини ўқишда (ва Замон Халифасининг хутбаларини мунтазам тинглашда) дангасалик қилиш.
  19. Болаларни беш вақт намоз адо этишга одатлантириш ва уларни жамоавий ибодатлар учун масжидга олиб боришда дангасалик қилиш.
  20. Маҳаллий Жамоат ишларини бажаришда дангасалик қилиш.
  21. Маҳаллий Амирга ёки Жамоат Президентига итоат этишда лоқайдлик кўрсатиш.
  22. Имконият мавжудлигига қарамасдан Жамоат марказига доимий равишда ташриф буюришда ва Хилофат ҳамда Жамоат марказининг баракотларидан баҳраманд бўлишда бепарволик қилиш.
  23. Имконият борлигига қарамай, “Ал-Фазл” газетасига ва Жамоатнинг бошқа журналлари ва газеталарига обуна бўлмаслик.
  24. Фитначи ва мунофиқларнинг суҳбатларини эшитиб, бу ҳақда Жамоат марказини хабардор қилмаслик ва уларнинг ёнини олиш.
  25. Қариндошчилик ёки дўстлик муносабатлари туфайли ҳаққоний гувоҳлик беришдан бош тортиш.
  26. Ёлғон гапириш.
  27. Бошқаларга туҳмат қилиш.
  28. Ишлашга куч ва имконият борлигига қарамай, бундай иш менга тўғри келмайди ёки кам ҳақ тўланади деб ўйлаб, ўз вақтини зое қилиш.
  29. Жамоатга ўзининг ихтиёрий хизматларини тақдим этиш учун бўш вақт ва қобилиятнинг борлигига қарамасдан, ўз вақтини бекор ўтказиш.
  30. Ёмон назар билан қараш.
  31. Инсоний куч-қувватлардан нотўғри фойдаланиш.
  32. Исломий ҳижоб қоидаларини бузиш.
  33. Кимдандир пул ёки нарсаларни қарзга олиб, уни ўз вақтида қайтармаслик ва ёлғон баҳоналар билан уларнинг қайтарилишини кечиктириш.
  34. Ёмон сўзларни гапириш, яъни ғазабланиб, ахлоқсиз ва фуҳуш сўзларни айтиш.
  35. Сигарет ёки чилим чекиш.
  36. Бошқа зарарли тамакилардан фойдаланиш.
  37. Янги урфнинг таъсири натижасида исломий урф-одатларга қарши бориш ва соқол қўймаслик.
  38. Масийҳи Мавъуд алайҳиссаломнинг таълимотларига қарши иш тутиб, Аҳмадий қизни ғайриаҳмадий кишига турмушга узатиш.
  39. Ғайриаҳмадий қизга Марказнинг рухсатисиз уйланиш.
  40. Жамоат таълимотларига қарши чиқиб, Жамоат душманларининг жанозасини ўқиш.
  41. Имконият ва барча шароитлар мавжуд бўлса ҳам, ҳаж қилмаслик.
  42. Ота-оналарга итоат ва хизмат қилмаслик.
  43. Эрнинг ўз завжасига ёмон ва қаттиқ муносабат кўрсатиши ва завжанинг турмуш ўртоғига бўйсунмаслик ва хизмат қилишда лоқайдлик кўрсатиши.
  44. Пора олиш.
  45. Пора бериш.
  46. Ўз мажбуриятларини бажаришда ноинсофлик қилиш.
  47. Спиртли ва бошқа маст қилувчи ичимликлар истеъмол қилиш.
  48. Судхўрлик қилиш. Ҳозирги вақтда рибо (судхўрлик) борасида кўп тушунмовчиликлар мавжуд ва ёлғон баҳоналарга таянилиб, дарҳақиқат, судхўрлик ҳукмига тўғри келадиган олди-берди қилинмоқда.
  49. Етимлар мол-мулкига хиёнат қилиш ёки уни мантиқсиз сарфлаш.
  50. Етимларни тарбиялашда дангасалик ва бепарволик қилиш.
  51. Ўз қўл остида бўлганларга нисбатан ҳаддан зиёд қаттиққўллик ва ноинсофлик муносабатида бўлиш.
  52. Арзимаган нарсалар учун суд ишларини қўзғатишга ҳаракат қилиш. Яъни, низони ҳал қилиш учун яхшироқ усуллардан фойдаланмай, дарҳол судга бориш.
  53. Дангасалик ва ялқовлик қилиш. Яъни, ўз вақтини қадрламаслик.
  54. Исрофгарчилик қилиш ва пулни даромадидан кўпроқ сарф қилиш.
  55. Ўз вақтини бефойда ишларга сарф қилиш.
  56. Еб-ичишда исроф қилиш.
  57. Фарзандларни ҳаддан зиёд эркалаш.
  58. Ёмон гумон қилиш. Яъни, ҳар бир одамнинг ишидан ёмон ният билан камчилик излаш.
  59. Қариндошлар ва дўстлар вафот этганларида дод-вой солиш.
  60. Тўйларда ўз имкониятларидан кўпроқ пул сарфлаш.
  61. Қарз олишда эҳтиётсизлик қилиш. Яъни, кичик ва арзимаган сабаблар учун ҳам қарз олиш.

 

Юқорида қайд этилган камчилик-нуқсонлар маълум бир тартибда келтирилмаган. Ака-ука ва опа-сингиллар ушбу камчиликлардан биттасини ёки бир нечтасини танлаб, жорий Рамазон ойида улардан ҳар ҳолда халос бўламиз деб Аллоҳ таолога қатъий аҳд қилишлари лозим. Сўнгра дунёдаги ҳеч бир куч уларга аҳдларини амалга ошириш йўлида ғов бўла олмасин. Аллоҳ таоло биз барчамизга бунинг учун куч-қувват ато этсин!

 

(“Ал-Фазл”, 1937 йил 05 ноябрь).