2025 ЙИЛНИНГ ҲАР ТОМОНЛАМА БАРАКОТЛИ БЎЛИШИ УЧУН ДУО!
Ҳазрат Имом Маҳдий (алайҳиссалом)нинг 5-халифаси, Ҳазрат Мирзо Масрур Аҳмад (аййадаҳуллоҳу таоло би-насриҳил азиз) 2025 йилнинг илк жума хутбаси – 3-январ куни Янги йил муносабати билан дуоларга чорлаб, шундай дедилар:
«Бу йил, яъни 2025 йил Жамоатимиз учун баракали йил бўлиши учун ҳам дуо қилинг.
Аллоҳ таоло Жамоатимизни ҳар қандай ёмонликдан асрасин.
Покистондаги экстремистик гуруҳлар ва уларнинг тўдалари вақти-вақти билан «қайнаб» турадилар ва Жамоатимиз мухолифатида, қонун ниқоби остида ҳар хил зулмларни амалга оширишга уриниб турадилар. На қабристон хавфсиз, на уйлар хавфсиз.
Аллоҳ таоло бу золимларни тез орада тутсин. Аҳмадийларни Ўз ҳимояси остида сақласин.
Бу одамлар Рабваҳ (шаҳри)га ҳам ёмон ният билан қарашади. Уни ҳам Аллоҳ таоло асрасин.
Бироз вақт олдин мен салавот айтишга ва баъзи дуоларга эътиборингизни қаратган эдим. Покистон ва ер юзидаги барча Аҳмадийлар ҳам бунга алоҳида эътибор қаратишлари керак.
Бангладешлик Аҳмадийлар учун ҳам дуо қилинг. Аллоҳ таоло уларни ҳам экстремистлар ёмонлигидан асрасин.
Сурияда ҳам энди янги ҳукумат пайдо бўлди. Аллоҳ таоло у ердаги Аҳмадийларни ҳам ҳар хил ёмонликлардан асрасин.
Шунингдек, бошқа давлатлар бор. Африка давлатлари бор. Аллоҳ таоло ҳамма жойда Аҳмадийларни Ўз паноҳида асрасин.
Бунинг учун алоҳида кўп-кўп дуо қилиш ҳар бир Аҳмадийнинг бурчидир. Ўз мамлакатларингиз учун ҳам (дуо қилинг) ва чет элда яшаб келаётган (покистонлик)лар Покистон учун ҳам (дуо қилсинлар).
Шунингдек, дунёнинг умумий вазияти ва урушлар ҳолати юзасидан ҳам дуо қилинг.
Аллоҳ таоло ҳар бир бегуноҳ ва мазлум инсонни унинг ёмон таъсиридан асрасин.
Бу одамлар Янги йилни катта жўшқинлик билан нишонлайдилар. Катта оташинлар бўлади. Салютлар отилади. Лекин ҳар ким фақат ўз байрамини ўйлайди. Бошқаларнинг дардини улар сезмайдилар. Камбағал бўлганлар, камбағал бўлган халқлар, мазлум бўлган одамлар – уларга кучли давлатлар зулм қилишда давом этиб келмоқда.
Аллоҳ таоло бу йилда мана шу барча қудратли халқларнинг режаларини барбод қилсин ва Аллоҳ таоло тавҳидининг дунёда барпо этилаётганини кўрайлик.
Аллоҳ таоло бизларга ҳам бунинг учун тавфиқ берсин. (Омин)