Këto ajete ndër të tjera përmendin katër kritere, të cilat janë domosdoshmëri për një send që të quhet i përsosur, qoftë ai libër: 1) kriteri autorial, 2) kriteri material, 3) kriteri strukturor dhe 4) kriteri objektiv-kulminant. Shkurtesat Elif.Lam.Mim tregojnë përsosmërinë e Kuranit për sa i përket kriterit autorial, pra, thotë: “Unë jam Allahu, më i Dijshmi”. Kriteri material i Kuranit është në fjalët “Ky është Libri”, domethënë, ky libër buron prej Zotit që di më shumë se të gjithë. Emri libër duke qenë në trajtën e shquar gjithashtu nënkupton se ky është ai Libër i shumëpritur, shpallja e të cilit ishte e parashikuar në Librat e shenjtë të mëparshëm. Kriteri strukturor i Kuranit është ai që përmendet në fjalët “nuk ka dyshim në të”. Çdo fjalë e tij është e qëndrueshme dhe çdo pohim që bën ai është i argumentuar dhe i qartë. Pastaj, kriteri objektiv-kulminant, d.m.th. çfarë ndikimi bën ky Libër, përmendet në fjalët: “Është udhëzim për ata që kanë druajtje”, pra që kanë frikë dhe turp të mëkatojnë dhe ta refuzojnë të vërtetën. Pasi i përmend këto katër kritere, Kurani tregon vetitë më të hollësishme të atyre që kanë këtë druajtje, dhe sqaron se kush janë ata, që do të udhëzohen.