- وَ قٰتِلُوۡہُمۡ حَتّٰی لَا تَکُوۡنَ فِتۡنَۃٌ وَّ یَکُوۡنَ الدِّیۡنُ لِلّٰہِ ؕ فَاِنِ انۡتَہَوۡا فَلَا عُدۡوَانَ اِلَّا عَلَی الظّٰلِمِیۡنَ ﴿۱۹۴﴾2 : 194 Luftoni kundër tyre, derisa të mos mbetet trazirë dhe feja të bëhet për Allahun. Pra, nëse ata tërhiqen, atëherë nuk duhet të shtrëngoni askënd, përveç atyre që janë mizorë.Shpjegime
1) Edhe ky ajet e thekson se muslimanëve iu lejua të luftonin vetëm për vetëmbrojtje, dhe ta vijonin luftën derisa të vendosej plotësisht liria fetare. Ka komentues që interpretojnë fjalën arabe fitne (trazirë) si idhujtari dhe më pas justifikojnë se gjoja Kurani i lejuaka të luftojnë të gjithë jomuslimanët derisa të largohet idhujtaria nga faqja e dheut. Ky nuk është aspak kuptimi i ajetit. Po të ishte kështu, Profeti Muhammed s.a.v.s. nuk do të mund të kishte lidhur një sërë traktatesh paqeje me jobesimtarët. Realisht, ky ajet porosit të kundërtën, që lufta të bëhej vetëm derisa feja dhe çështja e fesë të mos ishte më në dorën e njerëzve, të cilët i persekutonin ashpër muslimanët, por të ishte tërësisht në dorën e Allahut. Këtë mesazh e jep në mënyrë të theksuar edhe ajeti 22:40 dhe 2:257.
2) Këto katër ajete (191-194) përmbajnë disa kushte për muslimanët për të bërë xhihadin me armë, që janë: a) lufta fetare të bëhej vetëm për hir të Zotit dhe për asnjë motiv personal; (b) muslimanëve iu lejua të luftonin vetëm kundër atyre, të cilët e bënë të parët sulmin; (c) edhe në rastin kur armiku i sulmoi i pari, muslimanët ishin të obliguar të mos i kalonin limitet dhe të mos e përhapnin atë përtej objektivit të nevojshëm; (ç) ata ishin të obliguar të luftonin vetëm kundër ushtrisë dhe jo kundër njerëzve civilë dhe të pambrojtur; (d) gjatë luftës duhej t’u mundësonin imunitet nga lufta të gjitha ceremonive dhe riteve fetare; (dh) lufta në një vend të shenjtë të ishte tërësisht e ndaluar, madje as në rrethinat e tij; (e) muslimanët mund të luftonin në një vend të shenjtë ose në rrethinat e tij vetëm kur armiku ta përdorte atë si bazë të tij për luftë; (ë) luftën ta vijonin për aq kohë sa të siguronin lirinë fetare. Lexoni edhe 8:40; 9:4-6; 22:40.